119
Yuse chichame pachisar warartustin
- 1 -
1 Aints tunaarinchau ainauka ii Apuri nuikiartamurin nintimtinau asar,
nekasar warasartin ainawai.
2 Tura Yus chichaman akupamun páchina nuka tura tuke nintijai niin nintimtina nuka nekasar warasartin ainawai.
3 Tura pasé aa nuna takatsuk pujusar,
ii Apuri jintin amainauka nekasar warasartin ainawai.✡ Sal 1.1-2
4 Apuru ame chichaakum:
Wina chichamur tuke umirtuktaram timiame.
5 Tura asakmin wiki nintimsanka:
Tuke inaitsuk ame chicham akupamurmin umirkatasan wakerajai tajai.
6 Wikia ami chichammin mash umirkanka pengké natsaarchatnuitjai.
7 Tura ame chicham akupkamiame nuka timiá pengker ainia nuna nuimiarnaka,
amincha tuke nintirjai maaketai titatjame.
8 Ame chicham akupkamiame nuna umiktasan wakerajai.
Tura asamtai ajapruamka pengké ukurkiip.
- 2 -
9 ¿Natsa ainausha itiur tunaarinchausha pujusarminuita?
Ami chichammin umirinak nekasar tunaarinchau pujusarminuitai.
10 Wikia aminka tuke nintirjai nintimtajme.
Ameka wi chicham akupamurun
umitsuk pujusti tusamka tsangkamrukaip.
11 Wikia amin umirtsuk pujusai tusan,
ami chichammin nintirun tuke ukuyajai.
12 ¡Apuru aminka pengkeraitme tajame.
Tura asamtai ame chicham akupamuram nuiturta!
13 Ame chicham akupame nunaka aints ainaun mash ujakartatjai.
14 Ame chicham akupamurmin umirkunka,
chikich aints ainau ni kuikiarin nintimsar waraina nuna nangkamasnak wikia warastinuitjai.
15 Ame chicham akupamurmin nintimsan pujakun,
ami wakeramurmin nintimsan pujustinuitjai.
16 Tura ame umirkatin chichamnasha nintimsan warastinuitjai.
Tura ami chichamminka kajinmarchatnuitjai.
- 3 -
17 Apuru wikia aminu inatiram asamtai ¡tuke pujut surusta! Turakminka ami chichammin umiktatjai.
18 Ami unuikiartutiram timiá pengker aa nuna nintimratasan wakerau asamtai,
ame jiiru uratrita.
19 Wikia ju nungkanmaka irawa nunisnak pujau asamtai,
amin umirkatin chichamka uutrukaip.
20 Wikia ame chicham akupamurmin nekaatasan timiá wakerau asan,
nekachkun kintajai metek napchau nintimsan pujajai.
21 Aints miajuitjai tumamin ainauka ami chichammin umirtan nakitinau asar yumingkramu ainawai.
Tura asaramtai nu aints ainauka ni tunaari inaisarti tusam chicharkatnuitme.
22 Wikia ami chichammin umirkau asamtai,
wina jiyatkar pasé awajtusartin ainauka winiangka kiishmakta.
23 Aints timiá kakaram ainauka wina pasé awajtusartas wakerutinau wainiatun,
wikia aminu inatiram asan,
ami chichammin nintimratatjai.
24 Tura ame chicham akupkamu ainaun nintimran wikia waraajai.
Ame chicham akupamuram wina chichartuktin ainawai.
- 4 -
25 Yusru wikia jakamin nekapeajai.
Tura asamtai ame timiame nunismek yamaram pujut surusta.
26 Wikia itiur pujaja tusan amin ujakmajme.
Wi turamtai ameka airkamame.
¡Wait aneasam ami wakeramuram nuiturta!
27 Ami wainchati takatirmin nintimratasan wakerajai.
Tura asamtai wina umirtuktin chichaman umirtukat tusam nekamtairam surusta.
28 Wikia timiá wake mesekan pujau asan juutkamaikiakun pujajai.
Tura asamtai ame turutmiame nutiksamek kakamtikrurta.
29 Tura wait chichamtinu jintin amakai tusam surimrukta.
Antsu wait aneasam nuiturta.
30 Nekas chichamtinu jintin wekaasatasan wakerajai.
Turasha ami umirkatin chichammin umiktasan wakerajai.
31 Apuru wikia ame chicham akupamurminka inaiyatsjai.
Tura asamtai winaka inatsatraip.
32 Wina nintir waramtikrusu asakmin,
ami umirkatin chichammin miatrusnak umiktasan wakerajai.
- 5 -
33 Apuru ami chichamem nuiturta.
Ame turakminkia iwiaaku pujaknaka tuke umiktasan wakerajai.
34 Ami nuikiartutirmin umiktasan wakerau asamtai,
nekamtairam surusta.
Tura asakmin tuke mash wina nintirjai umiktasan wakerajai.
35 Ame chicham akupamur umikiam,
wina jintiar amakta tusam nintimtikrurta.
Ame turakminkia,
wikia pengker nintimsan pujustatjai.
36 Apuru ame wina chichamrun wakerukat tusam nintimtikrurta.
Antsu kuikianka wakerutsuk asati tusam nusha nintimtikrurta.
37 Tura chikich aints ainau wakerina nuna nintimrai tusam surimrukta.
Antsu wina jintiar amakta tusam pujut surusta.
38 Wikia ami inatirmetjai.
Tura asamtai amin umirtaminak pujuinaun:
Wi turatnuitjai timiame nuka winasha turuttia.
39 Wikia ami chichammin umiktasan timiá wakerau asamtai,
inatsararai tusam ame pasé aa nuka kiishmakta.
40 Wikia ami chichammin wakerau asamtai,
ame pengker asam yamaram pujut surusta.
- 6 -
41 Apuru ame timiame nunismek ami anengkratairam inaktursata,
turam uwemtikrurta.
42 Aints wina inatsatratas wishikrinamtaisha,
wikia ami chichammin nekasampita tau asan kajertsuk aiktinuitjai.
43 Wina chichamur umirtukta tame nuna nintimsan pujau asamtai,
nekas chicham aa nuka jurutrukiip.
44 Wikia ami chichammin tuke inaitsuk umiktasan wakerajai.
45 Tura ami chichammin umirkau asan,
angkan pujustinuitjai.
46-47 Wikia ame chicham akupamurmin aneau asan,
nuna nintimsan waraajai.
Tura asan ami chichammin apu ainauncha ujaaknasha natsaarchatatjai.
48 Wikia amin umirkatin chichaman timiá wakerau asan,
pengker nintimsan umiajai.
Tura ami chichammin nukap nintimsan pujajai.
- 7 -
49 Apuru wikia ami inatirmetjai.
Yaanchuik turutmiame nuka ame nintimrata.
Nu chichamka winaka nintimtikrurmiame.
50 Wi wake mesekan pujamtai:
Amin tuke pujutan susatnuitjame tusam turutmiame nu chichamjai kakamtikrurmiame.
51 Aints miajuitjai tumamin ainauka winaka tuke inangnatsuk wishikrinawai.
Tura wainiatun ame nuiturmiame nunaka wikia tuke kajinmatsjai.
52 Apuru ame yaanchuik chicham akupkamiame nunaka kajinmatsjai.
Tura nuna nintimran pengker nintimsan pujajai.