Jeroboam Israela apuri pujai, tura Uzías, nunia Jotam, nunia Acaz, nunia Ezequías Judá apuri pujuinai, Yuse chichame etserin Oseas naartin cuarenta (40) musach Israel ainamunam Yuse chichamen etserak pujuyayi.

Turamtai Yus Oseasan chicharak:

—Ami aintsrum ainau winaka umirtutsuk Yuschau waininayat wina Yusruitme tinak winaka pengkerka awajtinatsui. Tura asar kungkatpia nunisarang ainawai. Kungkatip nuwa aintsun ninumchayat tuke chikich aintsjai tsanirmini tusam: Ami aintsrum ainau nu tunau nintimtai inaisarat tusam, kungkatip nuwa ame nuwatkata, —timiayi.

Yus tamati Oseas ayu tusa, kungkatip nuwa Gomer naartinun nuwatkamiayi. Tura nuwatkam nu nuwaka japrukmiayi, tura uchin jurermiayi. Uchin jureramtai, Yus Oseasan chicharak:

—Uchiram Jezreel inaikiata. Wikia Israela apuri ainaun Jezreel nungkanam amumtikiatnuitjai. Wi turamtai nu nungkanam Israela nemase ainau tariar wina aintsur ainaun nepetkartin ainawai, —Yus timiayi.

Nunia Oseasa nuwari nuwan jurermiayi. Turamtai Yus Oseasan chicharak:

—Nawantrum Lo-ruhama inaikiata. Nuka wait anentrashtin taku tawai. Wikia yamaikia Israel ainaun wait anentrashtin asamtai, nawantrum tu inaikiata, —Yus timiayi.

Nunia Oseasa nuwari ataksha uchin jurermiayi. Turamtai Yus Oseasan chicharak:

—Uchiram Lo-ami inaikiata. Nuka wina aintsruchuitai taku tawai. Yamaikia wina aintsruka wajaschatatrume. Tura wisha atumi Yusringkia wajaschatatjai, tawai tusam ujakta. Tura asamtai uchiram tu inaikiata. Tura wainiatnak nukap arusan Israel ainau pengké nekapmarchamin naikmia nunisarang arti tusan yujrartinuitjai. Tura atumi tunaari inaisakrumningkia, wina aintsruchuitrume tajarme nunaka tutsuk, ataksha wina aintsur ainaun ukunam: Nekasrum wina uchiruitrume titinuitjarme. Wi turamtai Israel ainau Judá nungkanmaya ainaujai mash iruntrar apun kichik inaikiartinuitai.

Wikia Yus asan, wina aintsruchu ainaun wina aintsur arti titatjai. Tura aints wina anentsuk puju armia nunasha wina aneetir arti titatjai, —Yus Oseasan timiayi.✡ Rom 9.25-26

Nunia Yus ataksha Oseasan chicharak:

—Israel ainau yuschau ainaun tuke: Ameka wina yusruitme tinau wainiatum, ame nuwaram kungkatip au wainiatum ataksha eakam jeemin jukita, tura anen ata, —Yus timiayi.

Tamati Oseas ni nuwarin chikich aintsnum pujau wainiat ataksha sumakmiayi, tura ni jeen juki chicharak:

—Ameka tuke wina nuwaruitme. Chikich aintsjaingkia yamaikia tsanirmawaip. Turakminka aminka japashtatjame, —timiayi.

Nunia Oseas aints ainaun chicharak:

—Wina nuwarun aitkaja nu nintimrataram. Wina nuwar kungkatip au wainiatun, ni tunaari inaisat tusan, tura ataksha wina jearun pujusat tusan jukimjai. Atumsha nunisrumek atum tunau nintimtairum inaisaram ataksha Yus umirkataram. Ii weari ainau apuri atsuartin ainawai, tura Yusen pengker awajsartas tangkuri ainaunka epetsuk pujusartinuitai. Tura ataksha ni Yusrin nintimrar, Davidta wearin ukunam tatinua nuna chicharinak: Ame nekasam ii Apurinme tusar pengker awajsartin ainawai, —timiayi.

Nunia Oseas sacerdote ainaun chicharak:

—Sacerdote ainautiram anturtuktaram. Atumka aints ainau pasé nintimtikrau asaram, nukap wait wajaktinuitrume. Tura asakrumin Yus atumin chichartamak: Wikia nekasan atumin pengker awajsatasan wakerayatun, atumi tunaari tuke inaitsuk takau asakrumin, atumin pengker awajsatatkaman tujintajai, Yus turamrume, —Oseas timiayi.

Nunia Oseas Israel ainaun ataksha chicharak:

—Israel nungkanam pujuinautirmin tajarme: Yus umirat nakitau asaram, juningkia tukeka pujuschatnuitrume, antsu atumi uchirijai tura atumi tirangkijaisha chikich chikich nungkanam wekaikinij wajatnuitrume, —timiayi.

Nunia Yus ataksha Oseasan chicharak:

—Israel ainau uchia nunisarang pujuarmia nuna aneemiajai. Tura wina uchir asaramtai, Egipto nungkanmaya untsukmiajai.✡ Mat 2.15 Tura wi niin nukap untsuinamaitiat, wina umirtutan nakitinau asar, winiangka kanakarmiayi. Tura Yuschau waininayat ni yusrin nakumkar tura tangkurin maawar ni yusrin susartas epeu armiayi. Tura wainiatun aints uchin yama wekaaraun wekamtikua nunisnak atumin pengker pujustaram tusan nuiniarmiajrume. Tura wainiatrumek atumka Yus aitkawai, tuuka nintimtsuk pujuyarme. Wikia nuwa uchirin aneak minakas yurua nunisnak atumin: Wini winitaram tusan aneemiajrume. Tura wainiatrum wini winit nakitau asaram Egiptonam waketkitnuitrume. Turakrumin Asiria apuri ainau atumin inatmarartinuitai. Tura atumi yaktarin wayaawar, atumi aintsrin nangkijai maawartinuitai, tura atumi jeen yumpungkartinuitai.

Wina aintsur aiyatrumek kanákrum wina umirtutsuk pujustasrum wakeru wearme. Tura wainiatrumning ¿itiur wisha atumin inaisatjarme? ¿Itiur atumnasha ajapancha ukuktajrume? Wikia atumin nukap wait anentajrume. Wikia ainchawaitjai, antsu Yusetjai. Pengké tunarinchawaitjai. Tura asan atumin kajerayatun, atumin amutnaka pengké nakitajrume, —Yus Israel ainaun timiayi. Oseas tu aarmiayi.