1 Panthawe imweyo pakhana wanthu omwe adawuza Jezu nkhani ya agalileu omwe adaphedwa ndipo Pilato adasanganiza mulopa na ntsembe zawo. 2 Na tenepo iye adawabvundza kuti: “Kodi mun'kumbuka kuti agalileu omwe adaphedwa akhali anyakuphonya kwene-kwene kuposa andzawo, kuti abonere tenepoyo? 3 Ndiri kukuwuzani kuti, akhali lini. Tsono mukasaya kukhumbula mun'mala mwentse ninga iwombo. 4 Ayai kodi mun'kumbuka kuti wanthu khumi na asere omwe adagweredwa na cinyumba ca Silowee ciciwapha, akhali anyakuphonya kwene-kwene kuposa wanthu wentse wa kuJeruzalema? 5 Ndiri kukuwuzani pomwe kuti akhali lini. Tsono imwepo mukasaya kukhumbula mun'mala mwentse ninga iwombo.

6 Ndipo Jezu adawatsikira matere aciti: “Munthu m'bodzi akhadabzala mkuyu m'munda mwace. Ndipo adayenda kuti akache nkhuyu, tsono iye adazisaya. 7 Na tenepo iye adawuza nyakulindira mundayo kuti: 'Kwapita magole matatu pomwe ndidaubzala mkuyuyu. Lero ndanyang'ana-nyang'ana mwentsenemu tsono ndiribe kuwona cinthu. Ugwate! Thangwe ranyi uli kundodya mbuto pamwepa?' 8 Tsono iye adatawira kuti: 'Ulekeni, Mbuya, gole lino lokha. Ine-pano nin'ucerera-cerera ndicikha manyowa.' 9 Penu un'dzabala, n'psabzabwino basi. Ayai ukadzasaya kubala ndipo mudzaugwate bwino.”

10 Pasabudu linango Jezu akhapfundzisa m'nyumba ya kupembera ibodzi. 11 Ndipo m'mwemo mudabwera mkazi omwe akhadapundusidwa na ciwanda magole khumi na masere. Na tenepo akhafamba kota-kota nakuti iye akhakwanisa lini kuthamula na pang'onopo. 12 Pomwe Jezu adamuwona, adamucemera aciti: “Mkaziwe! Watsudzuka pakuborena kwako na matendaya.” 13 Pamwepo adam'sanjika manja. Ndipo iye adathamuka, na tenepo adapasa mbiri Mulungu. 14 Tsono mkulu wa nyumba ya kupembera pomwe adawona kuti Jezu adamulimbisa pasabudupo iye adakalipa, aciwuza wanthu kuti: Imwepo muna ntsiku zitanthatu zokha za basa. Mukafuna mubwere ntsiku zimwezo mudzalimbisidwe, si kuti pasabudu. 15 Ndipo Mbuya adamutawira kuti: “Mpfakafakamwe. Kodi imwepo mumbafungulira lini pasabudu ng'ombe na mabulu m'mathanga mwanu kuti mukamwese? 16 Kodi bzikhali lini bwino kumutsudzula ntsingazi mwana wa Abramuyu pasabudu? Nakuti Sathani akhadam'manga magole khumi na masere. 17 Pomwe iye adamala kulewabzimwebzo anyakumuwenga wentse adanyala. Ndipo wanthu wentse adakomedwa na bzinthu bzomwe Jezu adacitabzo.

18 Ndipo Jezu adawabvundza kuti: “Kodi Umambo bwa Mulugu mudakhala ninga ciani? Ningadzabulinganize nanyi?” 19 Budakhala ninga njere ya mtowe yomwe munthu adabzala m'munda mwace. Ndipo iyo idamera icisanduka muti ukulu. Na tenepo mbalame zidakondza bzitsa m'mithawi mwawene.” 20 Na tenepo adawabvundza pomwe kuti: Kodi ningandendemeze nanyi umbambo bwa Mulungu? 21 Ningabundendemeze na cimera comwe mkazi m'bodzi adasanganiza na phala m'mitsoko mitatu, mpaka bzentse bziciwira.”

22 Pomwe Jezu akhayenda kuJeruzalema adapita na m'mizinda na m'mii acimbapfundzisa. 23 Ndipo munthu m'bodzi adam'bvunza kuti: “Mbuya! Kodi wanthu omwe an'dzapulumusidwa mbang'ono-ng'ono?” Iye adamutawira kuti: 24 “Pitiratuni pomwe msuwo ukali bwandzupa. Ndiri kukuwuzani cadidi kuti wanthu azinji an'dzafunambo kupita tsono an'dzakwanisa lini. 25 Nakuti mwenekaciro nyumba akadzalamuka acifunga msuwoyo. Ndipo imwepo mun'dzasala kunja. Na tenepo mukadzagugudza msuwoyo mucikuwa kuti: 'Mbuya! Mbuya! Tifungulirenimbo!' Ndipo iye an'dzatawira kuti: 'Nin'kudziwani lini kuti ndimwe yani imwepo.' 26 Na tenepo imwepo mudzadandaula kuti: 'Ndife-pano omwe tikhadya ticimbamwa namwe pabodzi, ndipo imwepo mukhambatipfundzisa m'miseu mwathu. 27 Tsono iye an'dzakutawirani kuti: 'Ndinikudziwani lini ine. Cokani pano! Thangwe imwepo mwentse ndimwe anyakuphonya.' 28 Pamwepo ndipo mun'dzalira mucikeketa mano pomwe mukadzawona Abramu, Izaki, Jakobi na apolofeta wentse ali mu umambo bwa Mulungu. Ndipo imwepo mucisala kunja. 29 Na tenepo wanthu azinji an'dzabwera kucokera kumabvadzuwa na kumadokero, kudzaulu na kunyantsi acidzakhala m'mipando ya pacikondweso ca umambo bwa Mulungu. 30 Ndipo wanthu winango omwe mbakumalizira an'dzakhala wa kuyamba. Na winangombo wakuyamba an'dzakhala wa kumalizira.

31 Panthawe imweyo adabwera afalizeu winango acimuwuza kuti: “Coka pano! Thangwe Herodi an'funa kukupha.” 32 Ndipo iye adatawira kuti: “Ndokoni mukamuwuze kalikhooyo kuti: 'Ine-pano lero na mangwana ndinizula bziwanda na kulimbisa atenda. Tsono mkuca ndipo ndin'dzamaliza.' 33 Na tenepo ndiri kuphata njira lero, mangwana na mkuca. Nakuti mpolofeta wentse bzin'funika lini kuti afera kunja kwa Jeruzalema. 34 Jeruzalema! Jeruzalema! Umbapha apolofeta na kuboma atumiki wa Mulungu. Kodi ni kangasi ndikhafuna kale kukumbatirira wana wako, ninga momwe nkhuku imbabwamira tutiyo twayene, m'mapapidwe. Tsono imwepo mudalamba mwekha! 35 Ndipo nyumba yanu in'dzasala iribe munthu. Na tenepo ndiri kukuwuzani cadidi kuti mun'dzandiwona lini pomwe mpaka imwepo mucidzalewa kuti: “Wakusimbidwa ni ule omwe ali kubwera mudzina la Mbuya.”