1 Ndipo Mbuya adamuwuza pomwe Jona kaciwiri kuti: 2 “Lamuka uyende ku m'zinda ukulu wa Niniva ukaupalizire mafala yomwe ndakuwuzaya.”

3 Ndipo iye adayenda ku Ninivako, ninga momwe adamuwuzira Mbuya. Tsono Niniva ukhali m'zinda ukulu omwe ukhana m'thantho wa ntsiku zitatu kuti auyambuke na minyendo. 4 Pomwe Jona adapita mum'zindamo, adafamba ntsiku yentse acimbapaliza acimbalewa kuti: “M'kati mwa ntsiku makumi manai, Niniva in'pfudzidwa.”

5 Wanthu wentse wa m'Ninivamo, akulu na wana adabvuma Mulungu.

Iwo adapangana kuti abzimane kudya, acibvala mausakala kuyambira nkulu mpaka mwana.

6 Pomwe mambo wa ku Niniva adaibva nkhani imweyo, adalekeza basa lace la umambo, acikabvalambo mausakala, na kukabvunvulikambo pa dotha.

7 Iye adadziwisa wanthu wentse wa mu m'zindamo mu dzina lace, na la nthena zace Kuti: “Palibe munthu m’bodzi yekha omwe anidya, ayai kumwa cinthu; kudyesa na kumwesa bzifuwo, zingakhale ng'ombe ayai mbuzi.

8 Tsono wanthu na bzifuwo kubodzi an'dzabvala mausakala acipemba na mphanvu kuna Mulungu, acileka kucita bza kuipa bzawo, na kuleka pomwe kuphana wokha-wokha. 9 Kodi mbani an'dziwa kuti Mulungu angatibvera ntsisi, acipepa ukali bwace; kuti tisaye kufa?

10 Thangwe Mulungu adaona, kuti iwo aleka kucita bza kuipa bzawo, aciwabvera ntsisi, acileka kucita bzomwe akhadakumbuka kuti awacitebzo. Ndipo iye alibe kubzicita.