7
Israel ts'u haindene 144,000ne, 'enne buninta bube hoodat'en hutileh
1 'Et hukw'elh'az dine lizas ndi yun k'ut didun nódilhya whe ubutís'en. Ndi nilhtsi dunghi ndi yun k'ut 'ink'ez yatoo k'ut, 'ink'ez duchun cha, 'ohwhi ook'ut noolhts'i ha, 'et whuch'a k'oh húyoontun.
2 'Et 'uyoon lizas ndaz de ndo út'oh whe tís'en. Yak'usda khuna-un ye hóodalh'eh-i, 'i yi'alh. 'Et ndunne dine lizasne, 'enne yun cha 'ink'ez yatoo bulh ninta' hotálh'elh ha bughá whults'ut. Soo 'ultus whe
3 'enne ubulhni, “Mbene la neYak'usda be 'ulhna unline, 'enne 'et Yak'usda ye 'ehóodalh'eh-i, 'i be buninta bube hóodat'en buts'u tilhtselh, 'et whutso ndi yun, ya too cha, 'ink'ez duchun cha ninta' oolh'en junih!” ubúlhni.
4 'Et dáltsukne buninta bube hóodat'en suli'ne whudásts'o. Israel ts'u haíndene bubuzkeh, lhelhdoh didowhne, 'enne ts'iyawh 144,000ne hinli. 'Enne ts'iyawh buninta bube hoodat'en bubuhulhtsi.
5 Judah bulh didowhne ts'u haíndene,
'enne 12,000ne bube hoodat'en bubuhulhtsi.
Reuben bulh didowhne ts'u haíndene,
'enne 12,000ne bube hoodat'en bubuhulhtsi.
Gad bulh didowhne ts'u haindene,
'enne 12,000ne bube hoodat'en bubuhulhtsi.
6 Asher bulh didowhne ts'u haindene,
'enne 12,000ne bube hoodat'en bubuhulhtsi.
Naphtali bulh didowhne ts'u haindene,
'enne 12,000ne bube hoodat'en bubuhulhtsi.
Manasseh bulh didowhne ts'u haindene,
'enne 12,000ne bube hoodat'en bubuhulhtsi.
7 Simeon bulh didowhne ts'u haindene,
'enne 12,000ne bube hoodat'en bubuhulhtsi.
Levi bulh didowhne ts'u haindene,
'enne 12,000ne bube hoodat'en bubuhulhtsi.
Issachar bulh didowhne ts'u haindene,
'enne 12,000ne bube hoodat'en bubuhulhtsi.
8 Zebulun bulh didowhne ts'u haindene,
'enne 12,000ne bube hoodat'en bubuhulhtsi.
Joseph bulh didowhne ts'u haindene,
'enne 12,000ne bube hoodat'en bubuhulhtsi.
Benjamin bulh didowhne ts'u haindene,
'enne 12,000ne bube hoodat'en bubuhulhtsi.
Ndunne ulhyul-i be dilhts'ine
9 'Et hukw'elh'az whunis'en 'ink'ez lhane dune, huldlai k'et 'aw ubuts'olhto ait'oh, 'enne ubunus'en. Lhelhdun keyoh whut'enne, lhelhdoh didowhne cha. Yinka dune'ne cha. Ts'iyawh lhelhts'un un'a yalhdukne 'uhint'oh. 'Enne ts'iyawh kw'uts'uzda cho dizti'-i 'ink'ez 'usbaiyaz hibut núdilhya. Ts'iyawh ulhyul-i nahuyits'uz-i be dune hinli 'ink'ez 'ul tl'otel ndoút'en-i, 'i nuhídule.
10 'Et 'enne tube cho 'uhutni
“NeYak'usda kw'uts'uzda cho dizti'-i k'usda-un
'ink'ez 'usbaiyaz cha,
be uzdujih-i, 'enne buts'u hahóolts'ut!”
11 'Ink'ez 'utso whudilhdzulhne, 'ink'ez dunghi usjiz-i cha, 'ink'ez lizasne cha, 'enne ts'iyawh ndi kw'uts'uzda cho dizti'-i, 'i hinat núdilhya 'ink'ez hibut nacháhunildil 'ink'ez Yak'usda hits'u teni' nalhdzin.
12 'Ink'ez 'uhutni,
“Ndo honeh! Uzdólhti'.
'Et huwa ye dizti'-i cha,
'ink'ez be whútnih-i,
be ts'ílhtus 'ink'ez nut'i cha,
be musi ts'utni cha,
'ink'ez be uzdizti'-i,
'ohwhi neYak'usda ooch'e' yole' 'ilhiz 'ink'ez 'ilhiz wheni.
'Et ndo honeh!”
13 'Awet 'ilhoghun 'utso whudilhdzulh-un, 'en 'usúlhni, “Ndunne ulhyul-i be dilhts'ine, mbene whe' hint'oh? 'Ink'ez nts'ez de hahándil?”
14 'Et 'udúsni, “SMoodih nyun t'eoonínzun.” 'Et 'usúlhni, “'Oh de soo 'uk'enus dune dzoh nuhutidoh, 'enne 'uhuja 'oh da' whuz un'a dzoh nuhuzde. 'Ink'ez 'usbaiyaz buzkai' be dunaih tunáhuyuzguz 'ink'ez ulhyul suli'.
15 'Et huwa Yak'usda ookw'uts'uzda cho dizti'-i hinat núdilhya.
'Ink'ez dzin 'ink'ez 'ulhdzis ibulh hilugliz whucho hiba ne'ut'en.
'Ink'ez mbe la ndi kw'uts'uzda cho dizti'-i yuk'ut usda-un,
'en butoh 'unt'oh 'ink'ez bughu tileh.
16 'Aw 'on 'un buyelhé'tilhts'ul
'ink'ez 'aw 'on 'un ta'hósda ait'oh.
'Aw sa zul niz cha 'uhoot'e' ait'oh,
'ink'ez 'aw tube cho buba whunoolwus ait'oh.
17 'Et huwa 'ubinla, 'usbaiyaz kw'uts'uzda cho dizti'-i butoh 'unt'oh,
'en bughu tileh whe butso tiyalh
'ink'ez ndi too 'ilhiz wheni ook'u ts'ukhuna-i,
'i ts'un úbutilelh.
'Ink'ez Yak'usda bunatsul too' ts'iyawh buna k'et whúnaitilhdoh.”