GIN MIGID E BABYOR NI PI’ PAUL NGE YAN NGAK E GIRDI’ NU
KORINTH
Gin migid e babyor ni pi’ Paul nge yan ngak girdi’en e galesiya nu Korinth e yoloy ko ngiyal’ ni gathi rib fel’ thilrad. Boch girdi’en e galesiya u rom e ra togopluwgad ngak Paul, machane ri ba’adag ni nge fel’ thilrad bayay, ma ri felfelan’ ko ngiyal’ ni fel’.
Tin tom’on e guruy ko re babyor ney e be weliy Paul ko mangfan nike yol ngorad nike puwan’ ngorad ni bochan e togopluw ni ur ted ngak, ma ki weliy nike felfelan’ ya ke kolngan’rad ma kefel’ thilrad bayay. Ma aram e yog Paul ngorad ni ngar pi’ed e ayuw ngak e pi’in gafgow ni girdi’en Kristus u Judea. Tin tomur e guruy e be weliy Paul ni ir reb e apostel ni Got e mel’eg, ni aram e be togopluw ngak boch e girdi’ u Korinth ni yad be yog ni yad e tin riyul’ e apostel, me Paul e de riyul’ ni ba apostel.
Tin ni bay riy
Tabolngin 1:1–11
Paul nge galesiya u Korinth 1:12—7:16
Salpiy ni ka ni kunuy ni fan ngak girdi’en Kristus u Judea 8:1—9:15
Paul ni be weliy mat’wun ni bay nrogon ba apostel 10:1—13:10
Tomuren e thin 13:11–14
1
1 Re babyor ney e yib rok Paul, ni mang apostel rok Kristus Jesus ni Got e leamnag, nge rok Timothy ni walagdad ni girdi’en Kristus —
Ngak girdi’en e galesiya rok Got u Korinth, nge ngak urngin e girdi’ rok Got u Greece ni polo’:
2 I Got ni Chitamangidad nge Somol ni Jesus Kristus e ngu’ur ayuwegew gimed ma yow be pi’ e gapas nga lanin’med.
Paul ni pining e magaer ngak Got
3 Ngad pininged e magaer ngak Got ni Chitamngin e Somol rodad i Jesus Kristus, me ir e Chitamangiy nrib tarunguy e girdi’, ni ir fa’anem i Got ni urngin mit e ayuw me ir e be yib rok ngodad! 4 Ma ayuwegdad u urngin e gafgow nge kireban’ nma yib ngodad, ni fan e nge yag nda ayuweged e pi’in ke yib urngin mit e gafgow nge kireban’ ngorad, ni gadad be maruwel ko fare ayuw ni yib ngodad rok Got. 5 Ni bod rogon ni bay e f’oth rodad ko pi gafgow ni tay Kristus, ere ku errogon nu daken Kristus e ra yib e ayuw riy ngodad ni ba ga’ ni birodad e f’oth. 6 Fa’an gamad ra gafgow, ma bochan e nggu ayuweged gimed ngam thapgad ngak Got; ma fa’anra kan ayuwegmad, me ere ku errogon gimed ni kkun ayuwegmed ma kan pi’ gelngimed ni ngam athamgiliyed u fithik’ e gumaen’ e re mit i gafgow ni ku ir e gamad be athamgiliy. 7 Ere der maruwaran’mad ngomed; ya gamad manang nrogon ni kam uned ngomad ko tin ni gamad be gafgow riy, e ku aram rogon ni bay e f’oth romed ko ayuw ni be pi’ Got ngomad.
8 Ya gamad ba’adag ni nggu puged u ran ngomed, pi walagmad ni girdi’en Kristus, e gafgow ni yib ngomad u lan e nug nu Asia. Ya gafgow ntay ngomad e rib gel nib gel nda kug fineyed ni ka gamad ra fos. 9 Gu leam niged ni gamad e girdi’ ni kem’ay i turguy ni ngan thang e pogofan romad. Machane ni yodorom nagmad ni bochan e gathi gamad e nggu toergad ngomad, ya kemus ni Got ni ir e ma faseg e girdi’ ko yam’ e ir e nggu toergad ngak. 10 Susun e nggu m’ad, machane ir e ayuwegmad nda gu m’ad, ma bay i ayuwegmad i yan; me ir e ke l’agan’mad ngak ni bay ki ayuwegmad ko riya’ bayay, 11 ya gimed be pi’ e meybil romad ni pire’. Ere pi meybil nir ni fan ngomad e bayi pi’ Got e fulweg riy ngomed, ya bayi ayuwegmad Got; ma aram e bo’or e girdi’ ni bay ra pininged e magaer ngak ni bochmad.
Paul ni thiliyeg e tin nike leamnag ni nge rin’
12 Ba’aray e ren’en ni gamad ba felfelan’ ngay: lanin’mad e be micheg ngomad ni ngongol romad u roy u fayleng, ni ba ga’ nrogon e ngongol romad ngomed nrogon feni tamilang nge rogon feni yul’yul’ e thin romad ngomed, e Got e i gagiyegnag me ir e pi’ gelngimad nge yag, ma gathi yib ko gonop rok e girdi’. 13 Ya kemus nthin nrayag ni ngam be’eged mi gimed nang fan e kug yoloyed ke yib ngomed. Ma gu be finey ni bay mu nanged fan ni polo’ 14 e n’en ni kemus ni bochi yang e gimed manang fan riy e chiney, ni bochan e nge Chirofen ni sul Somol Jesus mrayag ni ngari mfelfelan’gad ngomad ni bod rogon ni bay gu felfelan’gad ngomed.
15 Rib mich u wun’ug e re bugithin ney, aram fan ni gu leamnag ko som’on ni ngug guymed ni fan e nge gaman l’agruw yay ni gu ayuwegmed. 16 Ya gu finey ni nggub ni nggu wan nga Macedonia mu gu tal ngug guymed mu gu sul mu kug tal ngam ayuweged gag ko tin ni nge yag ngog ni fan ko milekag rog nga Judea. 17 Gimed be finey ni re bugithin ney ni kug leamnag e be maruwar u wun’ug? Fa’anra gu turguy ban’en ni nggu rin’ ma gimed be finey ni kug leamnag ni kemus ni gag e nge fel’ ngog ma kug duwgiliy u wun’ug ni nggog e “Kefel’, kefel’ ” nge “Danga’, danga’ ” u ta’ab ngiyal’? 18 Rogon feni yul’yul’ Got, e aram rogon e thin ni gog ngomed ni gathi ba “Kefel’ ” nge ba “Danga’.” 19 Yi Jesus Kristus, ni Fak Got, ni ir e kug machib niged Silas, nge Timothy murung’agen ngomed e gathi be’ ni ir e “Kefel’ ” nge “Danga’.” Gathi errogon, ya ir e “Kefel’ ” rok Got; 20 ya ir e aram e “Kefel’ ” rok Got ngak urngin ban’en ni yog Got ni bay rin’ ngak e girdi’. Ireray fan nu daken Jesus Kristus e ka dogned e “Amen” rodad riy, ni aram e gadad be tayfan Got. 21 Ya Got e ke ngongliymad nge gimed kad muduwgilgad ko wok rodad u fithik’ Kristus; i Got e ir e ke faldad ngabang, 22 me ir e ke tay e pow rok ngodad ni aram e ke mil fadad ngak, me ir e ke pi’ fare Kan Nthothup nga fithik’ i lanin’dad ni aram e mich riy ni gubin ban’en nike tay ni fan ngodad e ra pi’ ngodad.
23 Gu be yog e re bugithin ney u p’eowchen Got — ye ir e manang lanin’ug! Gu duwgiliy ndab ku gub nga Korinth ni fan e nge dab gu kirebnag an’med ko puwan’ ni gu ra tay ngomed. 24 Gathi gamad be guy rogon ni nggogned ngomed e n’en ni ir e thangri mich u wun’med, ya ke muduwgil u wun’med e n’en nike michan’med ngay. Machane gamad be ayuwegmed ni fan ko felfelan’ romed.
DRAFT VERSION — Proofreading in progress