28
Alaa falan Tire mangan xili ma
1 Alatala yi falan ti n xa, a naxa, 2 “Adamadina, a fala Tire mangan xa, i naxa, ‘Marigina Alatala ito nan falaxi n xa, a naxa:
I waso ayi nɛn,
i yi a fala, i naxa,
“Alana nde nan n na,
n dɔxi alane dɔxɔden nin fɔxɔ igen tagini!”
Koni i tan, muxun nan i ra,
ala mi i ra,
anu i bata i yɛtɛ xaxinla yatɛ Ala xaxinla ra.
3 I fe kolon Daniyɛli xa ba?
Wundo fe yo mi luxunxi i tan ma ba?
4 I bata nafunla sɔtɔ i ya fe kolonna nun i ya xaxilimayaan xɔn,
i xɛmaan nun gbetin malan i ya nafulu ramaradeni.
5 I bata tɔnɔ gbeen sɔtɔ i ya yulaya xaxinli,
i yi findi wasoden na na nafulu kanyani.
6 Nanara, Marigina Alatala ito nan falaxi, a naxa:
Bayo i yɛtɛ miriyaan yatɛxi Ala miriyaan nan na,
7 n xɔɲɛne rafama nɛn i xili ma,
naxanye ɲaxu siyane birin xa.
E silanfanna tongoma nɛn i ya fe kolon faɲin xili ma
e yi i ya nɔrɔn kala.
8 E i radinma nɛn gaburun na,
i yi faxa xɔlɛni fɔxɔ igen tagini.
9 Nayi, i mɔn a falɛ i faxa muxune yɛtagi ba,
fa fala a ala nan n na?
I fa kolonma muxun nan na i faxa muxune yii,
ala mi i ra.
10 I faxama yarabin nin xɔɲɛne yii,
alo Ala kolontarene faxama kii naxan yi.
Amasɔtɔ n tan bata falan ti.
Marigina Alatalaa falan nan na ra.’ ”
11 Alatala yi falan ti n xa, a naxa, 12 “Adamadina, sunu sigin sa Tire mangan ma! I xa a fala a ma, i naxa, ‘Marigina Alatala ito nan falaxi, a naxa:
I yi findixi muxu dɛfexin misaala nan na,
i yi lugo fe kolonna ra,
i ya tofanna yi dɛfexi.
13 I yi Eden nakɔɔn nin,
Alaa nakɔna.
Gɛmɛ faɲin sifan birin yi i rayabuxi:
saridon gɛmɛn nun topasi gɛmɛn nun dayimu gɛmɛn
nun kirisoliti gɛmɛn nun onixi gɛmɛn nun yasipi gɛmɛn
nun safiri gɛmɛn nun esikaribukili gɛmɛn nun emerodi gɛmɛna.
I yi maxidixi xɛmane ra
naxanye radaxa i xa xabu i da lɔxɔni.
14 I yi luxi nɛn alo kantan ti malekan
naxan gabutɛye yi yifulunxi.
N na i ti nɛn Alaa geya sariɲanxin fari,
i yi mɛnna nin,
i masiga tima gɛmɛ tɛɛ wolonne tagi.
15 Fɛ mi yi i sigati kiin na
xabu i da lɔxɔni
han tinxintareyaan yi so i yi.
16 I ya yulayaan tɔnɔn ma,
i yi rafe gbalon na,
i yi yulubin liga.
Nayi, n na i kedima nɛn Alaa geya sariɲanxin fari
n yi i ralɔ ayi,
i tan naxan yi luxi alo kantan ti malekan
naxan yi gɛmɛ tɛɛ wolonne tagi.
17 I bata waso ayi i bɔɲɛni
masɔtɔ i ya tofanna xɔn,
i bata i ya fe kolonni fu i ya binyen xɔn.
Nayi, n na i rabirama nɛn bɔxɔni,
n yi i findi yɛɛ ramaxa seen na mangane xa.
18 I bata i ya yire sariɲanxine raxɔsi i ya hakɛ wuyaxine
nun i ya tinxintareyaan xɔn yulayani.
Na ma, n tɛɛn naminima nɛn i xili ma i konni,
a yi i gan,
n yi i findi xuben na bɔxɔn fari
muxune birin yɛtagi naxanye i matoma.
19 Naxanye birin yi i kolon siyane yɛ,
ne birin yigitɛgɛma nɛn i ya fe ra,
i raɲanna magaxuma ayi nɛn.
I mi fa luma na sɔnɔn!’ ”
Alaa falan Sidɔn taan xili ma
20 Alatala yi falan ti n xa, a naxa, 21 “Adamadina, i yɛɛ rafindi Sidɔn taan ma, i nabiya falan ti a xili ma! 22 I a fala, i naxa, ‘Marigina Alatala ito nan falaxi, a naxa:
N bata keli ɛ xili ma Sidɔn kaane!
N binyama nɛn ɛ konni!
Ɛ a kolonma nɛn a Alatala nan n na,
n na n ma kiti ragidixine rakamali ɛ xili ma waxatin naxan yi
n yi n ma sariɲanna mayita ɛ konni.
23 N fitina furen nafama nɛn ɛ xili ma
n yi tin muxune xa faxa ɛ taan kirane xɔn ma,
faxa muxune yi lu biraxi ɛ konni,
yɛngɛn yi lu kelɛ ɛ xili ma ɛ rabilinna birin yi.
Nayi, e a kolonma nɛn
a Alatala nan n na.’ ”
24 “ ‘Nayi, Isirayila rabilinna siyane mi fa a tɔrɛ alo ɲanla naxan sɔxɔnna tima alo tansinne. Nayi, e a kolonma nɛn a Marigina Alatala nan n na.’ ”
25 “ ‘Marigina Alatala ito nan falaxi, a naxa: N na Isirayila yamaan malan waxatin naxan yi keli siyane yɛ, e raxuyaxi ayi dɛnaxanye yi, n na n ma sariɲanna mayitama e xɔn nɛn siyane yɛtagi. E dɔxɔma nɛn e bɔxɔni, n naxan so n ma walikɛɛn Yaxuba yii. 26 E luma nɛn bɔɲɛ xunbenli, e banxine ti, e manpa binle si. E luma nɛn bɔɲɛ xunbenli, n na n ma kiti ragidixine rakamali e rabilinna siyane xili ma waxatin naxan yi, naxanye birin yi e raɲaxuxi, e yi a kolon a Alatala nan n na, e Ala.’ ”