1 Bêc lemeŋ teŋ gêjaŋa acgom, go ŋac dabuŋsêga Anania kêkôc laumata ŋagêdô to ŋac teŋ, nê ŋaê Tertulu, taŋ gêjam lau aweŋ gêdêŋ gôliŋwaga naŋ, ma ac sêsêp sêja e sêjac miŋ nêŋ biŋ, taŋ sêgôliŋ kêpi Paulu naŋ, gêdêŋ gôliŋwaga. 2 Êsêac sêmôêc Paulu gêmêŋ su, ma Tertulu gêôc awa sa gebe êŋgôliŋ biŋ êpi eŋ, tec kêsôm gebe

“O ŋac towae Peliki, aôm gômoa, tec aêac amoa tobiŋmalô ŋajam. Aôm ŋac tokauc, tec kômoasiŋ lau gamêŋ tonecŋa ŋapep. 3 Aêac lau samob aŋga gamêŋ samob akôc moasiŋ tonaŋ sa to ajam daŋge ŋanô. 4 Aê gabe janam aôm tôŋ atom, gabe jateŋ aômgeŋ gebe ôlic ŋajam ma ôkêŋ taŋam ma biŋ dambê. 5 Ŋac tonec aêac ajala eŋ ŋac kalomtêna sec. Eŋ gêli Judawaga aŋga nom ŋagamêŋ samob sa ma kêtu lau mêtê-geowaga Nasaretŋa nêŋ ŋamata. 6 Galoc eŋ gêgôm gêŋlêlôm gebe êŋgôm lôm dabuŋ êtu sec êwiŋ, tec aêac akôc eŋ tôŋ abe amêtôc ênê biŋ êtôm aêacma biŋsu. 7 Mago kapitaisêga Lusi kêsêp e jakêjaŋgo eŋ su aŋga aêacma 8 ma kêsôm gebe lau, taŋ sêgôliŋ biŋ kêpi eŋ naŋ, dêndêŋ aôm sêmêŋ. Galoc aôm taôm ôtu lesu eŋ, go ôŋô biŋ samob, taŋ aêac agôliŋ kêpi eŋ naŋ ŋam.” 9 Ma Judawaga sêpuc biŋ tôŋ sêwiŋ eŋ ma sêlôc gebe biŋ tau amboac tonaŋ.

10 Go gôliŋwaga gêjac gêsu gêdêŋ Paulu gebe êsôm nê biŋ. Tec Paulu kêsôm gebe

“Aê kajala gebe kôtu lau tonec nêŋ mêtôcwaga jala taêsam su. Amboac tonaŋ jamansaŋ êôc biŋ êndêŋ aôm totêtac êpa sugeŋ. 11 Aôm embe ôpuc biŋ tau ŋam, oc ôjala gebe aê kapi Jerusalem gaja kêtu jateŋ mecŋa naŋ bêc taêsam gêjaŋa atom, bêc 12geŋ. 12 Judawaga têtap aê sa gebe aê to lau teŋ aweŋsuŋ gêôc ka tau aŋga lôm dabuŋ atom. Ma têtap aê sa gali lau teŋ sa aŋga Judanêŋ lôm ŋagêdô to malacluŋ atom. 13 Biŋ samob, taŋ galoc lau tônê sêgôliŋ kêpi aê naŋ, êsêac têtôm gebe sêkip ŋam teŋ sa atom amboac tonaŋ. 14 Tageŋ tonec jasôm lasê êndêŋ aôm gebe Aê gajam sakiŋ tamocinêŋ Anôtô kêdaguc mêtê wakuc, taŋ êsêac sêsam gebe mêtê geo teŋ naŋ. Aê kakêŋ gêwiŋ biŋ, taŋ gêc Mosenê biŋsu to teto kêsêp propetenêŋ buku naŋ samob. 15 Aê kakêŋ matoc kêtôm êsêac tec sêkêŋ mateŋ sêmoa gebe Anôtô êŋu lau gêdêŋ to lau keso sêndi sa. 16 Amboac tonaŋ tec katu mêtê tauc gebe jamoa toŋoc ŋalêlôm ŋawageŋ êndêŋ Anôtô to ŋamalac ŋapaŋ.

17 “Aê gamoa e jala ŋagêdô gêjaŋa acgom, go sêkêŋ awa kakôc gadêŋ ŋoc lau gamêŋ ma gabe jakêŋ da êwiŋ. 18 Tec kamasaŋ biŋ jatu selecŋa gamoa lôm dabuŋ ma gabe jakêŋ da, tec têtap aê sa. Aê kasêp lau teŋ ŋasawa atom to gali lau teŋ sa atom. 19 Judawaga Asiaŋa nêŋ ŋagêdô sêmoa lôm sêwiŋ. Lau tônê nêŋ biŋ êndêŋ aê embe ênêc, naŋ sêmêŋ sêsôm sêkô aôm laŋômnêmŋa, go ŋajam. 20 Me êsêac tauŋ sêsôm acgom. Êsêac têtap ŋoc keso ondoc sa gêdêŋ taŋ kakô laumata laŋô nêmŋa. 21 Moae keso tageŋ tonec gebe kakô êsêac ŋaluŋ ma gamôêc gebe Galoc amac amêtôc aê gebe kakêŋ gêwiŋ gebe ŋacmatê oc sêndi sa.”

22 Peliki kêjala mêtê tonaŋ ŋam su, tec gebe ênam êsêac tôŋ ma kêsôm gebe “Kapitaisêga Lusi êsêp êmêŋ acgom, go tamêtôc amacnêm biŋ êmbacnê.” 23 Go kêsôm gêdêŋ kapitai gebe ejop Paulu êmoa awêgeŋ, ma ênê lau embe taêŋ ênam gebe sêmoasiŋ eŋ, naŋ ênac jao atom.

24 Bêc ŋagêdô gêjaŋa acgom, go Peliki agêc nê awê Judao Drusila sêja ma kêsôm sêkôc Paulu dêdêŋ eŋ sêja, go gêŋô eŋ gêwa sêkêŋ gêwiŋ Kilisi Jesu ŋam sa. 25 Paulu kêsôm biŋ kêpi biŋgêdêŋ to têtu mêtê tauŋ ŋapep ma Anôtô êmêtôc ŋamalacnêŋ biŋŋa. Eŋ kêsôm biŋ tonaŋ, tec Peliki kêtêc tau ma kêsôm gebe “Galoc aôm ôna acgom. Ŋoc ŋasawa teŋ embe ênêc, go jamôêc aôm êtiam.” 26 Eŋ taê kêka gêwiŋ gebe Paulu ênac da tau ŋa awa êndêŋ eŋ, tec kêsôm sêkôc eŋ sêja sêmu mêŋgêjam biŋgalôm gêdêŋ eŋ. 27 Jala luagêc gêjaŋa ma Porki Peste mêŋgêjô Peliki su. Peliki gebe Judawaga sêlic eŋ ŋajam, tec gedec Paulu tokapoacwalôgeŋ gêmoa.