21
Iisa wannganii aahiiɓe mum jeeɗiɗo
1 Gaɗa bannganol Tomas ngool Iisa wannganii *aahiiɓe mum hadde peta Tiberiya.* 21.1 Peta Tiberiya kam woni Peta Galili. Daaru dewtere ndee 6.1. Ndaa no o wanngiri nii : 2 Simon Piyer, Tomas bi'eteeɗo Funeejo, Natanayel mo wuro Kaana nder leydi Galili, ɓiɓɓe Jebede worɓe e *aahiiɓe ɗiɗo gom, no tawaa toon. 3 Sey Simon Piyer wi'i ɓe :
—Mi nanngowan liƴƴi.
Ɓe mbi'i :
—Minen duu, min njahdan he maa.
Ɓe njehi, ɓe naatowi laana. Jemma oon, ɓe keɓaay baafuy.
4 Wakkati pooyngol umminoo, Iisa wari darii fonngo maayo ngoon, amma *aahiiɓe ɓeen anndaay hala kanko non. 5 Sey Iisa wi'i ɓe :
—Sukaaɓe, on keɓii liƴƴi ?
Ɓe njaabii mo ɓe mbi'i :
—Min keɓaay !
6 Nden o wi'i ɓe :
—Paɗɗee taaruwol ngool nyaamo laana kaan, on keɓan.
Ko ɓe paɗɗi ngol, ɓe keɓi liƴƴi ɗuɗɗi faa ɓe keppi naatinde ngol nder laana kaan.
7 Aahiijo mo Iisa hiɗi oon wi'i Simon Piyer :
—Joomiraawo non !
Nde Simon Piyer nanunoo Joomiraawo non, o hooƴi jabbaare makko, o ɓornii sabu o ɓoortakeno, o fitti, o jikki nder ndiyam ɗaam. 8 Amma *aahiiɓe ɓeeto ngardi he laana kaan, iɓe ndaasa taaruwol keewngol liƴƴi ngool. Ɓe mboɗɗaaki fonngo ngoon ko waɗata kuule hemre. 9 Wakkati ɓe ƴeenyunoo fonngo ngoon, ɓe ngi'ii pette, liƴƴi no ndekii dow mum. Ɓe ngi'ii buuru duu no resii.
10 Iisa wi'i ɓe :
—Ngaddee seɗɗa nder liƴƴi ɗi nannguɗon ɗiin.
11 Simon Piyer naati laana kaan, fooɗi taaruwol keewngol liƴƴi mawɗi ngool. Liƴƴi hemre e woygu e tati ngol ƴeenyini. No ɗi keewiri nii fuu, taaruwol ngool serkaay.
12 Iisa wi'i ɓe :
—Ngaree, pummee !
Nden ɓe annditi mo amma baa gooto nder *aahiiɓe ɓeen suusaay ƴamude mo wi'aa : « Aan woni moy ? » 13 Nden Iisa ɓadii, o hooƴi buuru o hokki ɓe. O hokki ɓe liƴƴi ɗiin duu. 14 Ɗum woni tataɓere nde Iisa wanngani *aahiiɓe mum gaɗa ummitaaki mum.
Iisa haaldi he Simon Piyer
15 Gaɗa pummaari, Iisa wi'i Simon Piyer :
—Simon ɓii-Yahaaya, aɗa ɓuri ɓe hidde kam naa ?
Piyer jaabii mo wi'i :
—Ayyo ! Joomam, aɗa anndi miɗo hiɗi ma.
Nden Iisa wi'i mo :
—Duru ɓiɓɓe baali am !
16 Iisa wi'i mo kaden :
—Simon, ɓii-Yahaaya, aɗa hiɗi kam naa ?
O jaabii mo o wi'i :
Ayyo ! Joomam, aɗa anndi miɗo hiɗi ma !
Nden Iisa wi'i mo :
—Duru baali am !
17 Iisa wi'i mo kaden :
—Simon, ɓii-Yahaaya, aɗa hiɗi kam naa ?
Sey ɓerne Piyer metti, sabu o wi'i mo nde tati : « Aɗa hiɗi kam naa ? »
Piyer wi'i mo :
—Joomiraawo, aɗa faamani huune fuu, aɗa anndi duu miɗo hiɗi ma.
Iisa wi'i mo :
—Duru baali am. 18 Mi haalante goonga, nder njokollaaku maa, a haɓɓanan hoore maa duhol, njahaa to welii ma. Amma nde a naywi, a ɓantan juuɗe maa, kaɓɓaneɗaa duhol maa njaareɗaa to welaa ma.
19 Iisa wi'i haalaaji ɗii ngam hollude no Piyer maayirta, e no o teddinirta Alla. Gaɗa ɗum, o wi'i Piyer :
—Tokkam.
20 Piyer yeeƴitii, hi'i aahiijo mo Iisa hiɗi oon no tokki ɓe. Aahiijo oo woni gonnooɗo no wahi hadde Iisa wakkati ɓe kiirtotonoo. Kanko ɓagginoo ƴami Iisa, wi'i : « Moy woni jammbotooɗo ma ? »
21 Wakkati Piyer hi'unoo mo, wi'i Iisa :
—Joomam, oo nee ɗume o laatoto ?
22 Iisa jaabii mo wi'i :
—Se mi hiɗii o wuura faa mi warta, ko hilli ma ? Aan kay, tokkam tan !
23 Haala kaan sankitii hakkune goonɗinɓe Iisa fuu ko *aahiijo oo maayataa, amma Iisa wi'aay o maayataa. O wi'aana tan : « Se mi hiɗii o wuura faa mi warta, ko hilli ma ? »
24 Aahiijo oo woni aahiijo ceedaniiɗo kujje ɗee ko winndi ɗee, eɗen anndi duu ko seede makko no goonga. 25 Iisa waɗi kujje ɗuɗɗe gom duu laatiiɗe se mbinndanooma gootel, gootel, miɗo miila duuniyaaru nduu waawaa hooƴude dewte majje.