1 ฟวยจ เซ ยาโคป ชวน ซ ฮอยจ เอซาว เคะ แตะ ไม่ ปรเมะ ปาวน รอย ปุย. รฆุ กวน แตะ ฆาื อื เกือฮ อาวต ไม่ เลอา ไม่ ราเชน ไม่ กวนไจ รโปวน แตะ ลอา. 2 เกือฮ กวนไจ แตะ ไม่ กวน อื โฮว รกา. เกือฮ เลอา ไม่ กวน อื โฮว ซน่ะ. เกือฮ ราเชน ไม่ โยเซป โฮว รเคะ. 3 โกะ อื โอก โฮว กา โม เซ. เญือม ซ ฮอยจ อื โบ เอียกระ แตะ เซ, นุ่ม ติ แตะ ฮอยจ ลังเตะ อาแลฮ โฮน.

4 เอซาว ตอ ฮอยจ เคะ อื. โอม เอิน อื. ฮงาึต อื. เยือม ดิ เตือง ลอา แตะ. 5 เอซาว แก โม ปรโปวน เซ ไม่ กวน อื เตือง โอยจ อื. “โม ป ฮอยจ ไม่ เปอะ เฮี มัฮ ปุย?” อัฮ เซ. ยาโคป อัฮ เฮี, “โม เฮี มัฮ กวน เนอะ ป โพต พะจาว ละ กวนไจ ยุฮ เปอะ เบือ กุนมุ่น ยุฮ อื,” อัฮ เซ.

6 เญือม เซ กวนไจ รโปวน ยุฮ ยาโคป ฮอยจ ไม่ กวน แตะ นุ่ม ไว เอซาว. 7 ฟวยจ เซ เลอา ฮอยจ โรฮ ไม่ กวน แตะ นุ่ม โรฮ ไว อื. ป ฮอยจ รเคะ นึง อื มัฮ ราเชน ไม่ โยเซป เญือะ อื, นุ่ม โรฮ ไว อื.

8 เอซาว อัฮ เฮี, “คอง เลียง เปอะ โฮวน มู ป ยุ อาึ เนาะ ออ มัฮ ตอก เมอ?” อัฮ เซ. ยาโคป โลยฮ อื ตอก เฮี, “มัฮ เกือฮ ละ ปะ นึง มัฮ เปอะ จาวไน ยุฮ อาึ ละ ซ ปัว ปะ เลียก พาวม นึง แตะ,” อัฮ เซ ละ อื.

9 เอซาว อัฮ แม เฮี, “อาึ เอีจ กุม เอีจ ปอ โรฮ คาวคอง ยุฮ ฮุ, ไอฮ ปะ ไอฮ เมิฮ,” อัฮ เซ ละ ปุ แตะ เซ.

10 ยาโคป โลยฮ แม อื ตอก เฮี, “แปน โตว ตอก เซ. ดัฮ เปอะ เลียก พาวม นึง อาึ โฮ, ปัว เปอะ ไอฮ ป เกือฮ อาึ ละ เปอะ เฮี. เญือม ยุ อาึ นา ปะ ป มัฮ เอียกระ เกอะ, ไม่ ยุ อุ เปลีฮ เปอะ กุนมุ่น ยุฮ เปอะ เนิ อี, เมาะ เอิน โฮลฮ โฮะ ยุ นา พะจาว. 11 ปัว เปอะ ไอฮ ป เกือฮ อาึ ละ เปอะ เฮี. พะจาว เอีจ เลียก พาวม เนอึม นึง อาึ. อาึ เอีจ กุมปอ โอเอีฮ ยุฮ ฮุ,” อัฮ เซ ยาโคป เปอ. เญือม เซ เอซาว ไอฮ เนอึม อื นึง ฆวต เกือฮ เนอึม ยาโคป อื ละ อื.

12 เอซาว อัฮ เฮี, “ซ ไมจ เอะ โฮว ยุ่ง. อาึ ซ โฮว ดิ ไม่ เปอะ,” อัฮ เซ. 13 ยาโคป อัฮ แม เฮี, “ปะ ป มัฮ จาวไน ยุฮ ฮุ ตึน ซ ยุง เปอะ ไอฮ แตวะ ลั่ง กวนดุ โม เฮี. คอง เลียง เงอะ เฮี โฮวน โรฮ ไม่ จัว ลั่ง กวน อื. ดัฮ โครฮ เกือฮ โฮว ไกลจ โฮ, ปัง มัฮ ติ ซเงะ โน่ง ตึน ซ ยุม เอิน ฆาื อื. 14 ปัว ปะ ป มัฮ จาวไน ยุฮ แตะ โฮว รกา. อาึ ป มัฮ กวนไจ ยุฮ เปอะ ซ กวย โฮว รเคะ เปอะ. ซ โฮว ไน่ ไม่ ซัตซิง โม เฮี เมาะ ปุน อื. ซ ซไบ่ โรฮ ละ กวนดุ โม เฮี ฆาื อื. ซ ยุ แม ปุ แตะ นึง เมือง เซอี ย่วง อาวต เปอะ เซ,” อัฮ เซ ยาโคป เปอ.

15 “ดัฮ ตอก เซ อาึ ซ เกือฮ ลุกจัง แตะ โฮว ไม่ เปอะ ง่อน,” อัฮ เซ เอซาว. ยาโคป อัฮ เฮี, “จัมเปน เปอะ โตว เกือฮ โฮว ไม่ เยอะ. ดัฮ เปอะ เอีจ เลียก พาวม นึง เงอะ เอีจ ปอ เนิ เมาะ เซ,” อัฮ เซ.

16 ซเงะ เซ เอซาว เอีญ ฮอยจ นึง เมือง แตะ เมือง เซอี. 17 ยาโคป ฮอยจ นาตี ย่วง ซุกโคต. ยุฮ เญือะ แตะ นา เซ. ยุฮ โรฮ คอก ละ คอง เลียง แตะ. มัฮ เซ ป อัฮ ปุย ย่วง ซุกโคต ไม่ อื ฆาื อื.

18 ฟวยจ เอีญ อื ฮา เมือง ปัตดั่น อารัม, ยาโคป ฮอยจ ไมจ ฮอยจ มวน โบ ย่วง เชเคม เมือง คะนาอัน. กัง พากัง ยุฮ แตะ โบ ย่วง เซ. 19 รวี เตะ ติ เบือง นึง กวน เฌือต ฮาโม ป มัฮ เปือะ เชเคม. รวี อื นึง มาื นัมนัก เมาะ ติ รอย แทป. มัฮ นา เซ นา ก กัง อื พากัง ยุฮ แตะ. 20 ยุฮ คัน ทไว นา เซ. อัฮ “คัน พะจาว ป มัฮ พะจาว ทื อิซราเอน” ไม่ อื.