1 เญือม เซ พะเยซู ไม่ ลุกซิก อื ฮอยจ โบ ย่วง เบ่ตฟาเก ไม่ ย่วง เบ่ทานี, เอีจ ซดิ ไม่ เวียง เยรูซาเลม. เญือม เอีจ ฮอยจ อื ชวง บลาวง กาวก เกอ ดวน ลุกซิก แตะ โฮว กา แตะ ลอา ปุย. 2 อัฮ เฮี ละ อื, “โฮว เลียก ฮอยจ โตะ ย่วง ลั่กกา เปอะ เซ. เญือม เลียก เปอะ ย่วง เซ ซ ยุ เปอะ กวน บรัง ติ, ปุก ลั่ง ปุย อาึง. มัฮ กวน บรัง โอ ปุย ดิ บุก ติ ชวง. ไมจ เปอะ กัฮ เมือะ โรวก ฮอยจ นา เฮี. 3 ดัฮ ปุย ไฮมญ ไลลวง กัฮ เปอะ บรัง เซ, ไมจ เปอะ อัฮ ละ อื ตอก เฮี, ฆวต โกว พะโองจาว ติ เตะ. เนฮ โล่ว ซ ตาว แม อื ฮอยจ นา เฮี ตอก ไพรม อื, ไมจ เปอะ อัฮ เซ ละ,” อัฮ เซ.

4 ลุกซิก ลอา ปุย เซ โฮว รโตฮ เนอึม ยุ กวน บรัง เซ โบ คระ ติ. ปุก ปุย โบ รเวือะ เญือะ. กัฮ อื. 5 ป ชุง นา เซ ไฮมญ อื, “กัฮ เปอะ กวน บรัง เซ ละ เมอ?” อัฮ เซ. 6 ลุกซิก ลอา ปุย เซ โลยฮ อื ตัม ป อัฮ พะเยซู อาึง ละ แตะ. เญือม เซ โปง อื โรวก อื.

7 ลุกซิก ลอา ปุย เซ เมือะ โรวก กวน บรัง เซ ฮอยจ เคะ พะเยซู. ตุย เครอึง เซอึก แตะ ตุม อื นึง ตังโฆระ บรัง เซ. เญือม เซ พะเยซู บุก ปุ โฮว บรัง เซ. 8 ไก โฮวน ปุย ป ตุย ตุม เครอึง เซอึก แตะ ตัม คระ ซ โฮว อื เซ. ง่อน อื บิฮ ฮละ โคะ เน่อึม คระ ชิจ, ตุม โรฮ อื ตัม คระ เซ โรฮ. 9 โม ป โฮว รกา ไม่ โม ป ฟวต ลั่กเคะ อื อัฮ ปุ โฮว เฮี เรียง, “โฮซันนา, ปัว เกือฮ ป ฮอยจ นึง มอยฮ พะจาว ไมจ ลอป ป ยุ เคราะ ลอป ป ฮมอง. 10 ปัว พะจาว เกือฮ บั่นเมือง ยุฮ ด่าวิต ป มัฮ จัตเจือ ไพรม เอะ อาวต ไมจ อาวต มวน. มัฮ บั่นเมือง เซ ป ซ ฮอยจ ละ เอะ เอ. โฮซันนา, ลืลาว พะจาว ป อาวต เมือง มะลอง,” อัฮ เซ ปุย โฮวน เซ.

11 พะเยซู เลียก เวียง เยรูซาเลม, ฮาวก ฮอยจ นึง ควง วิฮัน. ซาวป แลน โอเอีฮ เตือง โอยจ อื. ฟวยจ เซ โอก โฮว ฮอยจ ย่วง เบ่ทานี ไม่ ลุกซิก แตะ เตือง กาว ลอา ปุย อื เซ นึง เอีจ ปู พริ ละ แตะ.

12 ปวยฮ พริ เซ แม เญือม โอก พะเยซู ไม่ โม ลุกซิก อื ฮา ย่วง เบ่ทานี พะเยซู ฆวต โซม. 13 ชวน โคะ เม ติ ก ซไง อื. เกลอึม ฮละ. โฮว แลน เปลิ อื ไม่ โอ อื เปลิ. เมือต เอีจ ฮอยจ นึง เน่อึม อื ยุ โตว เปลิ อื ติ โม่ว เนอึม. ไก ฮละ โน่ง, นึง โอ อื ดิ มัฮ เมือ เปลิ โคะ เม. 14 พะเยซู อัฮ เฮี ละ โคะ เม เซ, “เฆิม เฮี โฮว ไป นา เยอ ไก โตว ป ซ โฮลฮ โซม เปลิ เปอะ,” อัฮ เซ ละ อื. โม ลุกซิก อื ฮมอง โรฮ ป อัฮ อื เซ.

15 เญือม เอีจ ฮอยจ อื นึง เวียง เยรูซาเลม พะเยซู ฮาวก เอิน ฮอยจ นึง ควง วิฮัน. โครฮ ป โชะ ป นาวง โอเอีฮ ไม่ ป รวี โอเอีฮ โอก ฮา ควง วิฮัน เซ. รเคอึป โตะ ยุฮ โม ป เปียน มาื ไม่ ตังอี ยุฮ โม ป โชะ รโกะเกอื. 16 คัต ปุย โอ โฮว ไม่ รบุยฮ ลกลอม แตะ โตะ ควง วิฮัน เซ. 17 พะเยซู เพอึก โม เซ, อัฮ เฮี ละ อื, “พะทัม โม่ เอีจ อัฮ อื ตอก เฮี, ‘วิฮัน ยุฮ อาึ ปุย ซ อัฮ อื มัฮ ก ไววอน ปุย โครยญ เจือ ปุย,’ โม เปะ ปังเมอ เกือฮ เปอะ แปน ‘โตะ ทัม อาวต คะมุย’ ” อัฮ เซ.

18 โม ซตุ ระ ไม่ โม คู เพอึก พะทัม เมือต เอีจ ฮมอง ลปุง เซ, ซาวป เอิน ง่อต ตอก ซ ยุฮ แตะ ยุม ไม่ พะเยซู ฆาื อื. โม เซ บระ ฮลัต นึง พะเยซู ฆาื เงอึต โม ลัปซด่อน นึง รซอม เพอึก ตอม อื ปุย. 19 เญือม เอีจ ปู พริ อี พะเยซู โอก ฮา เวียง เซ, ยุฮ อื ตอก เซ โครยญ บู.

20 ปวยฮ พริ เซ เญือม งาวป ลั่ง อื พะเยซู ไม่ ลุกซิก อื โฮว แม คระ ไก โคะ เม เซ. ยุ โฮรง ซออฮ เอิน อื ฮอยจ ละ แรฮ แตะ. 21 เปโตร โตก ละ บวยจ พะเยซู ละ อื, อัฮ เฮี ฆาื อื, “ปอคู, ตึต แตะ โคะ เม บวยจ ปะ ละ โฮ เอีจ ยุม,” อัฮ เซ.

22 พะเยซู โลยฮ อื ละ ลุกซิก แตะ, “ไมจ เปอะ เจือ พะจาว. 23 อาึ อัฮ ละ โม เปะ ตัม เนอึม อื, ปัง ดวน เปอะ บลาวง เฮี เฌาะ ติ แตะ ฮอยจ นึง ปลัฮ รอาวม, ดัฮ เปอะ เจือ เนอึม ซ แปน อื ตอก อัฮ แตะ เซ, ไม่ โอ เปอะ ซองไซ รพาวม นึง, ซ เกียฮ แปน เนอึม ละ เปอะ ตัม เซ. 24 มัฮ เซ ป อัฮ อาึ ละ เปอะ ฆาื อื ตอก เฮี, เญือม ไววอน เปอะ ปัว โอเอีฮ นึง พะจาว เยอ, ไมจ เจือ เนอึม เอีจ มัฮ แตะ นัม โฮลฮ. โอเอีฮ เซ ซ โฮลฮ เนอึม เปอะ ฆาื อื. 25 เญือม ชุง เปอะ ละ ซ ไววอน แตะ ดัฮ ปุย ไก พิต ไก โฌวะ ละ เปอะ, ปุ ทื โซะ โระ โกลยจ, ดัฮ เปอะ โอ ทื โซะ โระ โกลยจ โฮ, เปือะ เปอะ เมือง มะลอง ทื โตว โรฮ โม เปะ โซะ, โระ โตว โรฮ โม เปะ โกลยจ โรฮ. 26 (ดัฮ เปอะ ทื ปุย โซะ โระ ปุย โกลยจ, เปือะ เปอะ เมือง มะลอง ซ ทื โรฮ โม เปะ โซะ, โระ โรฮ โม เปะ โกลยจ,” อัฮ เซ.)* 11:26 ลปุง ไก กไน โวงเลป เซ มัฮ ป โอ ไก นึง พะทัม ป ไซฮ ปุย ไพรม ง่อน อื.

27 พะเยซู ไม่ โม ลุกซิก อื ฮอยจ แม นึง เวียง เยรูซาเลม แม. ลไล โฮว อื โตะ ควง วิฮัน เนอ, โม ซตุ ระ ไม่ โม คู เพอึก พะทัม ไม่ ป กวต ป เฮียง เอีญ เคะ พะเยซู. 28 อัฮ เฮี, “ปะ มัฮ โฮลฮ เปอะ อัมนัต แตะ เน่อึม ก เมอ ยุฮ เปอะ กัน ตอก เซ? ปุย ป ดวน ปะ ยุฮ ตอก เซ?” อัฮ เซ ละ อื.

29 พะเยซู โลยฮ อื ละ อื, “อาึ ซ ไฮมญ โรฮ โม เปะ นึง ติ เจือ. โลยฮ เนิ. ดัฮ เปอะ โลยฮ เนิ โฮ, อาึ ซ รโฮงะ โรฮ ละ เปอะ ตอก เกียฮ ยุฮ แตะ กัน ตอก เซ. 30 กัน เกือฮ โยฮัน ปุย รัป บั่ปติซมา, อัม มัฮ พะจาว ป เกือฮ อื เกียฮ ยุฮ ฮู? อัม มัฮ ปุย ปลัฮเตะ? โลยฮ เนิ,” อัฮ เซ ละ อื.

31 โม เซ ซิงซา อื ไม่ ปุ แตะ ฆาื อื. อัฮ เฮี, “เอะ ซ โลยฮ ละ อื ตอก เมอ แล? ดัฮ เอะ ซ อัฮ มัฮ พะจาว ป เกือฮ อื เกียฮ ยุฮ ฮู, ตึน ซ ไฮมญ แม เอะ ตอก เฮี, ‘เมอยุ โอ โม เปะ เจือ โยฮัน เนอ?’ ตึน ซ อัฮ เซ เนิ. 32 ดัฮ เอะ ซ อัฮ มัฮ ปุย ปลัฮเตะ ป เกือฮ อื เกียฮ ยุฮ ฮู แปน โตว,” อัฮ เซ ละ ปุ แตะ. มัฮ อัฮ อื ตอก เซ นึง ฮลัต แตะ นึง ปุย โฮวน เซ นึง อัฮ ปุย โฮวน เซ โยฮัน มัฮ ป ซึป ลปุง พะจาว เตือง โอยจ แตะ. 33 โม เซ โลยฮ อื ฆาื อื ละ พะเยซู ตอก เฮี, “โม เอะ ยุง โตว,” อัฮ เซ. พะเยซู อัฮ เฮี ละ อื, “ดัฮ มัฮ ตอก เซ อาึ ซ รโฮงะ โตว โรฮ ละ เปอะ ตอก โฮลฮ แตะ อัมนัต แตะ ละ ยุฮ แตะ กัน เซ,” อัฮ เซ.