1 ฟวยจ เซ ไก ป เลีฮ เน่อึม นึง จังวัต ยูเดี่ย ง่อน, ฮอยจ นึง เวียง อันทิโอก. เพอึก ตอม โม เอียกปุ แตะ ไน พะจาว. อัฮ เฮี, “โม เปะ ดัฮ เปอะ โอ ไอฮ ริตกิต ตัม ปซี ปซา ยุฮ ไอ โมเซ โฮ, เกียฮ โปน เปอะ โตว มั่ป ฆาื อื,” อัฮ เซ ละ อื. 2 ปาวโล ไม่ บ่าระนาบ่า เก เนอึม เก แนม ปุ แตะ ไม่ โม เซ ฆาื อื. ฟวยจ เซ ปุย ไน พะจาว เวียง เซ โตก โลง เกือฮ ปาวโล ไม่ บ่าระนาบ่า ไม่ ปุย ไฮญ ลลาึง แตะ ง่อน, ฮาวก เคะ โม ป โฮว ฆรอ ลปุง ตัง พะเยซู ไม่ โม ป กวต นึง เวียง เยรูซาเลม ฆาื อื. 3 เญือม เซ คริตซจัก ไจไซ เนอึม เกือฮ อื โฮว. เญือม โฮว อื คระ แควน ฟีนิเซีย ไม่ จังวัต ซามาเรีย, รโฮงะ ไลลวง เอีจ ไอฮ ปุย ตังเมือง รพาวม โคระ แตะ ละ โม เอียกปุ แตะ ไน พะจาว. โม เซ ไมจ มวน เนอึม รพาวม เบือ อื โครยญ โฆะ แตะ. 4 เญือม เอีจ ฮอยจ อื นึง เวียง เยรูซาเลม เมอ, คริตซจัก นา เซ, เตือง โม ป โฮว ฆรอ ลปุง ตัง พะเยซู ไม่ โม ป กวต นึง อื, รโนฮ รชึง อื. เญือม เซ โม ปาวโล รโฮงะ ไลลวง ป เกือฮ พะจาว แตะ ยุฮ ละ อื โครยญ เจือ.

5 นา เซ ไก โม ฟาริซี ป เอีจ เจือ พะเยซู นึง ง่อน. โกฮ ชุง อัฮ เฮี, “ปุย ตังเมือง จัมเปน อื ไอฮ ริตกิต. ไมจ ดวน ยุฮ อื ตัม โกตไม ไซฮ ไอ โมเซ อาึง,” อัฮ เซ.

6 โม ป โฮว ฆรอ ลปุง ตัง พะเยซู ไม่ โม ป กวต โพรม ดิ ละ ซ ง่อต แตะ ไลลวง เซ. 7 เญือม เอีจ เลี่ญ เก อื ปุ แตะ เปโตร โกฮ ชุง. อัฮ เฮี ละ อื, “เอียกปุ, โม เปะ เอีจ ยุง เปอะ เลือก พะจาว อาึ เน่อึม นึง ลลาึง แตะ เน่อึม ไพรม อื. มัฮ เกือฮ อื อาึ ครอฮ ไลลวง กัน ระ ไล ยุฮ พะจาว ละ ปุย ตัง เมือง, เดอึม ซ โฮลฮ ฮมอง อื ไม่ เจือ อื. 8 พะจาว ยุง รพาวม ปุย เตือง โอยจ อื. เปลีฮ ไลลวง รัป แตะ ปุย ตังเมือง นึง เอีจ เกือฮ อื ลปุ แตะ ละ อื ตอก เกือฮ อื ละ เอะ โรฮ. 9 พะจาว อัฮ โตว เอะ ตัง ฮา โม เซ. พัก รพาวม อื ซง่ะ เบือ รพาวม เจือ อื โรฮ. 10 ดัฮ มัฮ ตอก เซ โฮ, เมอยุ ลอง เปอะ รพาวม พะจาว? เมอยุ ย่อง เปอะ โคะ ลกลอม นึง ซอังปา โม ลุกซิก เตือง เอีจ มัฮ อื ป โอ โม จัตเจือ ไพรม เอะ ปุน กลอม เมอ? โม เอะ ปุ โรฮ ปุน กลอม. 11 ปุก โตว ตอก เซ. เอะ เอีจ เจือ เยอะ เอีจ โปน แตะ มั่ป เบือ กุนมุ่น ยุฮ พะโองจาว ป มัฮ พะเยซู เซ ตอก โม เซ โรฮ,” อัฮ เซ.

12 เญือม เซ โม ปุย โฮวน เซ โฆย เตือง โอยจ แตะ. ง่อต ตอก รโฮงะ บ่าระนาบ่า ไม่ ปาวโล ไลลวง ป ซัมคัน โฮวน เจือ ป เกือฮ พะจาว แตะ ยุฮ ลลาึง ปุย ตัง เมือง. 13 เญือม เอีจ ฟวยจ ป อัฮ อื เซ, ยาโคโบ่ อัฮ แม เฮี, “เอียกปุ, ง่อต เมอะ. ซ อัฮ แม อาึ ละ เปอะ. 14 ซีโมน เอีจ รโฮงะ ไลลวง เลือก พะจาว ปุย ตังเมือง เมือ โรง อื นึง ไก รพาวม อื นึง อื. มัฮ โรฮ เลือก อื แปน ปุย ไน แตะ. 15 ไล เฮี เอีญ ละ ติ ไม่ ป ไซฮ โม ป ซึป ลปุง พะจาว โฆะ. เอีจ อัฮ อื นึง พะทัม ตอก เฮี,

16  “ ‘กังเคะ เอ, อาึ ซ ฮอยจ ยุฮ แม เญือะ ด่าวิต ป เอีจ ชุ เซ เกือฮ โคระ. เญือะ เอีจ ฆลอฮ เอีจ ลเลอึม เซ, อาึ ซ โบลวง โคระ แม เยอะ เกือฮ ตอน. 17  มัฮ ซ เกือฮ เยอะ ปุย ไฮญ ซาวป ยุ พะจาว เตือง โอยจ อื, เตือง ปุย ตังเมือง ป กอก อาึ ละ ซ แปน อื ปุย ไน แตะ โครยญ เมือง,’ 18 อัฮ เซ พะจาว ป รโฮงะ อาึง ไลลวง เฮี ละ ปุย เน่อึม โฆะ ลั่ง.

19 “ปเลี่ย เฮี ซ อัฮ อาึ ละ เปอะ ตอก แกต อาึ อื. เอะ ไมจ โตว อัฮ ป ซุกซัก ละ ปุย ตังเมือง ป เอีญ เคะ พะจาว. 20 ฮา เซ ไมจ เอะ ไซฮ รโปะ นังซื ละ, มัฮ เกือฮ เวีย ปอน แตะ โอเอีฮ ป เอีจ ตัน ปุย ละ ฮุป นึง มัฮ อื ป โอ เอะ ลัง ปอน, ไม่ เกือฮ อื ทอเนาะ ติ แตะ ฮา กัน เลนจุ. เกือฮ โรฮ อื โอ ปอน โตะ ซัตซิง ป กุน ปุย โงก อื, ไม่ โอ อื ไมจ ปอน ฮนัม. 21 ญันได่ ลปุง เพอึก ตอม ยุฮ ไอ โมเซ เอีจ เลี่ญ ไก ป ครอฮ อื โครยญ ย่วง, ไม่ ลาว อื โกตไม ไซฮ อื เซ นึง โฮงซุต โม ยิว โครยญ ซเงะ ลโล่ะ,” อัฮ เซ ยาโคโบ่.

22 ฟวยจ เซ เยอ, โม ป โฮว ฆรอ ลปุง ตัง พะเยซู ไม่ โม ป กวต เซ, ไม่ ปุย ไน คริตซจัก เตือง โอยจ อื ซิงซา อื ไม่ ปุ แตะ. เญือม เซ โตกโลง ละ ซ เลือก แตะ ปุย ไน แตะ ง่อน, ละ ซ เกือฮ อื โฮว ดิ ไม่ บ่าระนาบ่า ไม่ ปาวโล ฮอยจ นึง เวียง อันทิโอก. ป เลือก อื เซ มัฮ ยูด่า ป อัฮ ปุย บ่าระซาบ่า ละ ไม่ ซีลา. ปุย เตือง โอยจ อื ไน โม เอียกปุ อื นัปทื เนอึม ปุย ลอา เซ. 23 ไซฮ รโปะ นังซื นึง โม เซ. รซอม นังซื เซ อัฮ เฮี,

“โม เอะ ป มัฮ เอียกปุ เปอะ, เตือง ป โฮว ฆรอ ลปุง ตัง พะเยซู, เตือง โม ป กวต เตอ, ไซฮ รโปะ นังซื ละ โม เปะ ป มัฮ เอียกปุ แตะ ปุย ตัง เมือง, ป อาวต นึง เวียง อันทิโอก ไม่ จังวัต ซีเรีย ไม่ จังวัต ซิลีเซีย, ไม่ รพาวม นัปทื แตะ. 24 เอะ เอีจ ฮมอง เงอะ ไลลวง ฮอยจ ป มัฮ มู ติ ไม่ เอะ เซ เคะ เปอะ ง่อน, ปังเมอ โอ มัฮ ดวน เอะ อื โฮว. โม เซ มัฮ ป เกือฮ โม เปะ ซุกซัก รพาวม ฆาื ป อัฮ ป มวยญ แตะ. แปน รังมะ รพาวม โม เปะ ฆาื. 25 เญือม โพรม เมอะ, โม เอะ เฆรอึม รพาวม เมอะ ละ ซ เลือก แตะ ปุย เกือฮ โฮว เคะ โม เปะ ง่อน. ซ เกือฮ โฮว ดิ ไม่ บ่าระนาบ่า ไม่ ปาวโล ป ฮรัก เกอะ. 26 ปุย ลอา เซ มัฮ ป โอ ฮลักกอ จีวิต แตะ นึง กัน รซอฮ แตะ ละ พะโองจาว ป มัฮ พะเยซูคริต ทื เอะ เซ. 27 ป เกือฮ เอะ โฮว เคะ เปอะ เซ มัฮ ยูด่า ไม่ ซีลา, ละ ซ รโฮงะ โรฮ อื ไลลวง ติ ไม่ นังซื ไซฮ แฮะ รโปะ ละ เปอะ เฮี. 28 เอีจ มัฮ ป ปุก รพาวม ลปุ พะจาว ไม่ เอะ นึง โอ แตะ ซ ละ อาึง ป เชียน ลอน ละ เปอะ โฮฮ ฮา ป จัมเปน เนอะ อัฮ ละ เปอะ เฮี. 29 มัฮ เกือฮ โม เปะ เวีย ปอน แตะ โอเอีฮ ป ตัน ปุย ละ ฮุป, ไม่ เวีย เปอะ ปอน แตะ ฮนัม ไม่ โตะ ซัตซิง ป กุน ปุย โงก อื. ไมจ โรฮ เปอะ ทอเนาะ ติ แตะ ฮา กัน เลน จุ. โม เปะ ดัฮ เปอะ ปุน เวีย กัน เมาะ เซ โฮ, ซ มัฮ ป ไมจ ละ เปอะ. ปัว เกือฮ โม เปะ โฮลฮ อาวต ไมจ โซม ญุ่ก,” อัฮ เซ รซอม นังซื เซ.

30 ปุย ปาวน เซ, เญือม เอีจ เกือฮ ปุย อื โฮว, เลีฮ เนอึม ฮอยจ นึง เวียง อันทิโอก. กอก ปุย ไน พะจาว โพรม ดิ เตือง มู แตะ, เญือม เซ มอป โจตไม เซ ละ อื. 31 เญือม เอีจ โฮลฮ โม เซ ลาว เยอ, ไมจ มวน เนอึม รพาวม เบือ รซอม ซตอก รเง่อึม ป ไก นึง นังซื เซ. 32 ยูด่า ไม่ ซีลา เซ มัฮ โรฮ ป ซึป ลปุง พะจาว, เกาะ โลม รพาวม อื โฮวน เจือ เกือฮ อื อาวต ไม่ รพาวม เจือ ตอน ฮมัน แตะ. 33 เญือม เอีจ อาวต อื นา เซ เลี่ญ บุย โรฮ โฮ, โม เอียกปุ อื เซ โปง อื เอีญ ฮา แตะ ละ ซ เกือฮ อื ฮอยจ เคะ ป ดวน อื โฮว เซ ไม่ รพาวม เฮน ฮลอง แตะ. 34 (ซีลา ปังเมอ โปวต รพาวม แตะ อาวต นา เซ.)* 15:34 พะทัม ป ไซฮ ไพรม ปุย ไก โตว คอ 34 35 ปาวโล ไม่ บ่าระนาบ่า เยอ อาวต ลั่ง นึง เวียง อันทิโอก เซ, เพอึก ตอม ดิ ปุย ไม่ ครอฮ ดิ อื ลปุง พะจาว ไม่ ปุย ไฮญ โฮวน ปุย.

36 เญือม เอีจ เลี่ญ บุย โรฮ อื, ปาวโล อัฮ เฮี ละ บ่าระนาบ่า, “ไมจ เอะ โฮว แม ฮอยจ ย่วง เอีจ โฮว ไพรม แตะ นา ก เอีจ ครอฮ เอะ ลปุง พะจาว โฮ. ไมจ โฮว เคะ โม เอียกปุ แตะ โครยญ ย่วง ละ ซ เกือฮ ติ แตะ ยุง ตอก มัฮ ตอก มอยฮ โม เซ,” อัฮ เซ ละ อื.

37 บ่าระนาบ่า ตะ เกือฮ โยฮัน มาระโก โฮว ไม่ แตะ. 38 ปาวโล ปังเมอ แกต อื โอ ปุก ละ ซ บะ แตะ โรวก ปุย เซ ไม่ แตะ. มัฮ ฆาื เอีจ ละ มาระโก อื เญือม โฮว ดิ อื นึง แควน พัมฟีเลีย โฮ. โฮว โตว ไม่ อื ฮอยจ ละ ฟวยจ กัน ยุฮ อื เซ. 39 ปุย ลอา เซ เก เนอึม เก แนม ปุ แตะ ฆาื อื. ลอต รกัฮ โฮว คระ โน่งๆ ฆาื อื. บ่าระนาบ่า บะ โรวก มาระโก โฮว ไม่ แตะ, บุก ซปาว รอาวม โฮว ฮอยจ จังวัต ป มัฮ เกาะ ไซปรัต. 40 ปาวโล เลือก ซีลา โฮว ไม่ แตะ. โม เอียกปุ อื ไน พะจาว นา เซ มอป ปุย ลอา เซ ละ พะจาว เกือฮ อื แลน อื เบือ กุนมุ่น ยุฮ แตะ. เญือม เซ ปุย ลอา เซ โอก โฮว. 41 ไคว จังวัต ซีเรีย ไม่ จังวัต ซิลีเซีย, นุน รพาวม คริตซจัก โม เซ เกือฮ อาวต ตอน อาวต ฮมัน นึง รพาวม เจือ แตะ.