1 ꞌWan taꞌa ndiꞌin chaꞌ ꞌñaan loꞌo Krixtu, chaꞌ lye ꞌa nchka tꞌnan tiꞌ Ni ꞌñaan, kanꞌ chaꞌ nchkwiǐnꞌ loꞌo wan ni. Ta wan tyukwi ñaꞌaan wan ꞌin Ndiose, chaꞌ kuꞌni wan nchga tñan nu nchka tiꞌ Ni chaꞌ kuꞌni wan lo chalyuu; ta wan tyukwi ñaꞌaan wan ꞌin Ndiose chaꞌ xkwiꞌ chaꞌ ꞌin Ni tyiꞌin wan lo chalyuu, chaꞌ wa lka wan sa ñaꞌan lka ska lomstan nu luꞌu. Ndiya tiꞌ Ndiose chaꞌ kuꞌni wan ngwañaꞌan; chaꞌ nu lka wan nten ꞌin Ni, ndiꞌin chaꞌ kuꞌni wan ngwañaꞌan. 2 Ja ta ꞌa wan tyempu chaꞌ tatsaa nten ꞌwan chaꞌ kuꞌni wan chaꞌ kuxi; xka ñaꞌan tyiꞌin wan lo chalyuu ni, chaꞌ wa mxaꞌan nchga chaꞌ nu yuꞌwi niꞌ kasiya ꞌwan nu ngwa sꞌni la. Kanꞌ chaꞌ ni, ka biyaꞌ tiꞌ wan nchga tñan nu nchka tiꞌ Ndiose chaꞌ kuꞌni wan. Ka jlyo tiꞌ wan sa ñaꞌan tñan nu suꞌwe la kuꞌni ska wan, sa ñaꞌan tñan nu nchka la tiꞌ Ndiose chaꞌ kuꞌni ska wan; ka jlyo tiꞌ wan sa ñaꞌan tñan nu tsaa toꞌo suꞌwe la. Nchga chaꞌ kanꞌ ka biyaꞌ tiꞌ wan ni.

3 Tlyu ꞌa chaꞌ suꞌwe yꞌni Ndiose loꞌoǔn, bra nu mda Ni tñan re ꞌñaǎn; kanꞌ chaꞌ nchkwiǐnꞌ loꞌo wan ni, chaꞌ ja kuꞌni ꞌa siyeꞌ wan loꞌo xka ta nten. Nde ñaꞌan ndiꞌin chaꞌ tyaꞌan chaꞌ tiye wan chaꞌ ꞌin nchga tñan nu nchka ꞌwan ni; tyuꞌwi tiꞌ wan chaꞌ Krixtu yꞌni chaꞌ nchka ꞌwan kuꞌni wan tñan kanꞌ, chunꞌ nu msñi wan chaꞌ ꞌin Ni. 4 Ñaꞌan tiꞌ nan, tyun ꞌa tijyan nsuꞌwian tyukwi ñaꞌaan, ska tñan ngiꞌni ska tijyaan. 5 Kwiꞌ ngwañaꞌan lkaan, taꞌaan nu ndiꞌin chaꞌ ꞌñaan loꞌo Krixtu; ni siya tyun ꞌa neꞌ taꞌaan, ska ti nten lkaan taꞌaan, ska ti nten lkaan tyukwi ñaꞌaan, taꞌaan suꞌwa ndiꞌin chaꞌ ꞌñaan loꞌo taꞌaan.

6 Ska lo tñan ka kuꞌnian skaan, ya ñaꞌan ti tñan nu nda Ndiose chabiyaꞌ chaꞌ kuꞌnian skaan, chaꞌ suꞌwe ꞌa nka tiye Ndiose ñaꞌan Ni ꞌñaan. Bra nu ndiya ska neꞌ taꞌa wan nu nchka nchkwiꞌ ska chaꞌ nu nchka tiꞌ Ndiose chkwiꞌ loꞌo wan, kanꞌ tñan kuꞌni neꞌ kanꞌ sikwa. Sa ñaꞌan nu nnan neꞌ kanꞌ chaꞌ nu nchkwiꞌ Ndiose, sa ñaꞌan nu yten neꞌ chaꞌ kanꞌ, kwiꞌ ngwañaꞌan chkwiꞌ neꞌ kanꞌ loꞌo wan. 7 Xa nu nchka ꞌin ska wan tayaꞌ wan ꞌin taꞌa nten wan, tyukwi ti tiye wan tayaꞌ wan ꞌin neꞌ kanꞌ sikwa. Xa nu nchka ꞌin ska wan kwaꞌu wan ska chaꞌ nu ñi ꞌin taꞌa nten wan, tyukwi ti tiye wan kwaꞌu wan chaꞌ kanꞌ ꞌin neꞌ sikwa. 8 Xa nu chkwiꞌ wan ska chaꞌ loꞌo ska nten chabiyaꞌ ꞌin Ndiose, tyukwi ti tiye wan chkwiꞌ wan chaꞌ kanꞌ sikwa. Xa nu ta wan ska chaꞌ suꞌwe ꞌin nten, tyukwi ti tiye wan ta wan chaꞌ suꞌwe kanꞌ ꞌin neꞌ sikwa. Ni siya lka wan ndloo ꞌin neꞌ taꞌa wan, kiꞌya wan kwenta chaꞌ suꞌwe ti kuꞌni wan sikwa. Xa nu chka tꞌnan tiꞌ wan ꞌin nten nu tiꞌí ti ndiꞌin lo chalyuu, suꞌwe ti ka tiye wan laja nu kuꞌni wan tñan kanꞌ chaꞌ ꞌin neꞌ bra kanꞌ.

9 Ka suꞌwe ti ka tiye wan ñaꞌan wan ꞌin nchga nten, chaꞌ siꞌi ska chaꞌ nu nchkwiꞌ ti wan lka chaꞌ suꞌwe tiye wan, ni siya loꞌo kuꞌni wan chaꞌ suꞌwe loꞌo neꞌ. Ja kuꞌni ꞌa wan chaꞌ xaꞌan, tyukwi ti tiye wan tsaa naan wan chaꞌ suꞌwe kuꞌni wan. 10 Nde ñaꞌan ka tiye wan ñaꞌan wan ꞌin neꞌ taꞌa ndiꞌin chaꞌ ꞌwan loꞌo Krixtu. Tyaꞌan chaꞌ tiye wan chaꞌ lka neꞌ kanꞌ sa ñaꞌan si lka neꞌ taꞌa ngula wan; kanꞌ chaꞌ kuꞌni tnun wan ꞌin taꞌa nten wan, tyukwi ti tiye wan tukwa wan chaꞌ nchkwiꞌ neꞌ.

11 Ja kuꞌni ndaja wan bra nu kuꞌni wan tñan ꞌin Ndiose; wa nganun Tyiꞌi Ni niꞌ kasiya ꞌwan, kanꞌ chaꞌ ngula kuꞌni tiye wan chaꞌ kuꞌni la wan tñan kanꞌ.

12 Kuꞌni wan chaꞌ suꞌwe ꞌa ka tiye wan xa nu ndiꞌin ta wan ꞌin Ndiose chaꞌ kan Ni xiyaꞌ, chaꞌ kulaa ji Ni ꞌwan. Ja xiꞌin chunꞌ wan chaꞌ kanꞌ, ni siya lye ꞌa ta neꞌ nu tiꞌí ꞌwan seꞌen ndiꞌin wan lo chalyuu. Nchga tsan chkwiꞌ wan loꞌo Ndiose Stian; ja kulaa yaꞌ wan chaꞌ nchkwiꞌ wan loꞌo Ni.

13 Bra nu lyiji ska nan ꞌin ska taꞌa msñi wan chaꞌ ꞌin Krixtu, ndiꞌin chaꞌ kutsaa wan chaꞌ suꞌwe nu ndiꞌin ꞌwan, chaꞌ ta wan nan ꞌin neꞌ kanꞌ, nan nu lyiji ꞌin neꞌ. Nchga bra ta wan naꞌan tyi wan chaꞌ tyiꞌin nten nu mdiyan kichen tyi wan.

14 Chkwiꞌ wan loꞌo Ndiose chaꞌ ꞌin nten nu ngiꞌni liyeꞌ tiꞌ ꞌwan; ja xtya wan kiꞌya ꞌin neꞌ kanꞌ yaꞌ Ndiose, xkwiꞌ chaꞌ suꞌwe ti jñan wan ꞌin Ndiose chaꞌ ꞌin neꞌ kanꞌ.

15 Ka suꞌwe ka tiye wan loꞌo xka ta nten nu suꞌwe ꞌa nka tiye; kwiꞌ ngwañaꞌan, ndiꞌin chaꞌ ka xiꞌin tiꞌ wan loꞌo nten nu xiꞌin tiꞌ ñaꞌan ndiꞌin. Suꞌwa ka tiye wan loꞌo xka la nten sikwa.

16 Ska ñaꞌan ti chaꞌ chkwiꞌ wan loꞌo nchga taꞌa ndiꞌin chaꞌ ꞌwan loꞌo Jesucristo; ja kuꞌni siyeꞌ wan loꞌo neꞌ tiꞌi taꞌa wan, suꞌwe ti chkwiꞌ wan loꞌo neꞌ kanꞌ. Suꞌwa ti tyiꞌin wan loꞌo neꞌ kanꞌ, ja tyaꞌan chaꞌ tiye wan chaꞌ ꞌwan, jlyo la tiꞌ ꞌwan.

17 Bra nu kuꞌni nten chaꞌ xaꞌan loꞌo wan, ja kuꞌni wan chaꞌ xaꞌan loꞌo neꞌ kanꞌ xiyaꞌ; tsaa naan wan ska tñan suꞌwe nu ka kuꞌni wan chaꞌ tayaꞌ wan ꞌin neꞌ, chaꞌ ngwañaꞌan ñaꞌan kwiꞌya ꞌa nten ꞌñaan, ni ñaꞌan ngiꞌnian. 18 Tsaa naan wan ska ñaꞌan nu suꞌwe ti tyiꞌin wan loꞌo nchga nten, chaꞌ ja kaja nu xuun loꞌo wan. 19 ꞌWan taꞌa suꞌwe nsuꞌwiǐn, ja xitukwi ꞌa wan kuꞌni wan chaꞌ xaꞌan loꞌo nten nu kuꞌni liyeꞌ tiꞌ ꞌwan; ta wan tyempu ꞌin Ndiose chaꞌ ta Ni nu tiꞌí ꞌin neꞌ kanꞌ. Suꞌwe la ngwañaꞌan. Kwiꞌ ngwañaꞌan ndyoꞌo chaꞌ re nu ndukwa lo kityi kula: “Tñan ꞌñaǎn lka chaꞌ kasinꞌ tiǎnꞌ ꞌin nten, chaꞌ taǎn nu tiꞌí ꞌin neꞌ, ndukwin Ndiose.” Ñi ꞌa lka chaꞌ re nu ykwiꞌ Xꞌnaan loꞌoan. 20 Loꞌo ngwañaꞌan, ndiya xka chaꞌ nu nchkwiꞌ kityi kanꞌ: “Bra nu ka jwiꞌñan ꞌin neꞌ nu nxuun loꞌo wan” ndukwin, “suꞌwe la si ta wan nan ku neꞌ kanꞌ; bra nu kityi tiꞌ neꞌ, ta wan tyiꞌa koꞌo neꞌ bra kanꞌ. Ngwañaꞌan ta wan chaꞌ jyuꞌu ꞌin neꞌ.” Ngwañaꞌan ndukwa chaꞌ lo kityi. 21 Kanꞌ chaꞌ ja ta wan tyempu ꞌin chaꞌ xaꞌan chaꞌ tyijin lyo ꞌwan. ꞌWan, tyijin lyo wan ꞌin chaꞌ xaꞌan, chaꞌ xkwiꞌ chaꞌ suꞌwe ngiꞌni wan.