1 Ngwa ska tsan ndyaa Jesús tuꞌwa tiyuꞌ Genesaret. Tyun ꞌa nten mdaꞌan loꞌo yu. Loꞌo kanꞌ kaꞌan ꞌa nten mdiꞌin nde seꞌen mduun yu tuꞌwa tiyuꞌ kanꞌ, chaꞌ ngwa tiꞌ neꞌ kunan neꞌ chaꞌ nchkwiꞌ yu chaꞌ ꞌin Ndiose. 2 Wa naꞌan Jesús seꞌen ndukwi tukwa yka naꞌan xuwe ti tuꞌwa tiyuꞌ kanꞌ. Ja tukwin mdiꞌin niꞌ yka naꞌan xuwe kanꞌ siyaꞌ ti, kwiꞌ seꞌen ti mduun neꞌ kanꞌ njyaꞌan neꞌ katan ꞌin neꞌ, chaꞌ wa mdyii mdiꞌin neꞌ kuta. 3 Bra kanꞌ yten Jesús ska niꞌ yka naꞌan ꞌin Simón, ykwiꞌ loꞌo yu chaꞌ tukwa naꞌan yu ꞌin yka naꞌan chaꞌ tsaa la chinꞌ lo tyiꞌa. Ndyaa tukwa Jesús nde niꞌ yka naꞌan kanꞌ, bra kanꞌ mdyisnan yu nguaꞌu yu chaꞌ ꞌin Ndiose ꞌin nten kaꞌan kanꞌ. 4 Bra nu wa mdyii ngwaꞌu Jesús ꞌin neꞌ, bra kanꞌ ykwiꞌ yu loꞌo Simón:

―Yaa loꞌo wan yka naꞌan re nde seꞌen nu tlyaa la tyiꞌa. Kanꞌ kuun wan katan chaꞌ kaja kula ꞌwan ―ndukwin Jesús ꞌin neꞌ.

5 Bra kanꞌ mxkwen Simón ꞌin yu:

―Yu kula ―ndukwin―, tyukwi tla mdaꞌan ba lo tiyuꞌ nguun ba katan; ja ska nan mjwi ꞌwa siyaꞌ ti bra kanꞌ. Loꞌo ni, si ngwañaꞌan kuloo tñan ꞌwa, tsaa ba seꞌen ndukwiin chaꞌ kuun ba katan nde kwa ―ndukwin Simón bra kanꞌ.

6 Bra kanꞌ ngwañaꞌan yꞌni Simón loꞌo taꞌa yu, loꞌo kaꞌan ꞌa kula mjwi ꞌin neꞌ bra kanꞌ. Chaꞌ kaꞌan ꞌa kula yten niꞌ katan ꞌin neꞌ, kanꞌ chaꞌ mdaaꞌ chinꞌ katan ꞌin neꞌ bra kanꞌ; 7 kanꞌ chaꞌ yꞌni yaꞌ neꞌ ꞌin taꞌa neꞌ nu ndiꞌin xka niꞌ yka naꞌan kanꞌ, chaꞌ kan neꞌ tayaꞌ neꞌ ꞌin neꞌ. Bra ti yan neꞌ bra kanꞌ, mjwakii neꞌ katan msaꞌan niꞌ nsuꞌwi kula, chaꞌ suꞌwa neꞌ ꞌin ran niꞌ yka naꞌan. Chinꞌ ti chaꞌ ja yten taꞌa tyukwaa yka naꞌan kanꞌ niꞌ tyiꞌa siꞌya chaꞌ teꞌen ꞌa kula kanꞌ. 8 Bra nu naꞌan Tyu Simón nchga kula kanꞌ, ngwa biyaꞌ tiꞌ yu chaꞌ Jesús lka nu wa yꞌni chaꞌ mjwi kula ꞌin neꞌ. Bra ti mduun xtyinꞌ yu tloo Jesús bra kanꞌ, ykwiꞌ yu loꞌo:

―Tyoꞌoo lyaa nde seꞌen ndiꞌiǐn, Xꞌnaǎn ―ndukwin Simón ꞌin Jesús―. Ndiꞌin ꞌa kiꞌya ꞌñaǎn chaꞌ nten chalyuu ti lkaǎn.

9 Nduwe ꞌa tiꞌ Simón, loꞌo taꞌa ndaꞌan yu niꞌ yka naꞌan, nduwe ꞌa tiꞌ neꞌ, chaꞌ kaꞌan ꞌa kula nu tka msñi ti neꞌ. 10 Loꞌo taꞌa tyukwaa yu sñiꞌ Zebedeo nu ndiꞌin xka niꞌ yka naꞌan kanꞌ, nu naan Santiago loꞌo nu naan Xuwa, loꞌo neꞌ kanꞌ ytsen ꞌa neꞌ; ti kwiꞌ taꞌa ndaꞌan Simón tñan lka neꞌ kanꞌ. Bra kanꞌ ykwiꞌ Jesús loꞌo Simón:

―Ja kutseen ―ndukwin―. Ti ngwa sꞌni la xkwiꞌ tñan kuta kula ti yꞌnii; loꞌo ni, taǎn xka tñan ꞌiin, chaꞌ tsaa naan ꞌin nten chalyuu nu mnaꞌ kasiya ꞌin siꞌya chaꞌ kuxi, chaꞌ ka neꞌ nten ꞌñaǎn ―ndukwin Jesús ꞌin Simón.

11 Bra nu mdiya yka naꞌan kanꞌ tuꞌwa tiyuꞌ xiyaꞌ, bra kanꞌ ngulaa tiꞌin neꞌ kanꞌ ꞌin yka naꞌan, mdoꞌo neꞌ ndyaa neꞌ loꞌo Jesús bra kanꞌ.

12 Bra nu mdiꞌin Jesús ska kichen, bra kanꞌ mdiyan ska yu tiꞌí seꞌen ndiꞌin yu; lye ꞌa ngutsuꞌ kunaꞌ yu tiꞌí kanꞌ. Bra nu naꞌan yu ꞌin Jesús, bra ti mduun xtyinꞌ yu tloo Jesús, mꞌni tuꞌwa yu lo yuu. Tꞌnan ꞌa ykwiꞌ yu loꞌo Jesús bra kanꞌ:

―Si nchka tiiꞌ chaꞌ chkaǎn, jlyo tiǎnꞌ chaꞌ ka ꞌiin kuꞌnii chaꞌ chkaǎn ―ndukwin yu tiꞌí kanꞌ.

13 Bra kanꞌ mstya Jesús yaꞌ chunꞌ yu seꞌen ngutsuꞌ kunaꞌ yu:

―Nchka tiǎnꞌ ―ndukwin Jesús ꞌin yu―. Ka luwi tyukwi ñaꞌaan nuꞌwin ni.

Laja nu nchkwiꞌ Jesús ngwañaꞌan, bra ti mdoꞌo tsuꞌ kicha nu ngutsuꞌ kunaꞌ yu bra kanꞌ. 14 Loꞌo kanꞌ ykwiꞌ Jesús loꞌo yu, chaꞌ ja katsaꞌ yu ꞌin nten sa ñaꞌan ngwa ꞌin yu:

―Yaa lyaa chkwiiꞌ loꞌo sti joꞌo nu ndiꞌin niꞌ lyaa ―ndukwin Jesús ꞌin yu tiꞌí kanꞌ―. Nde kwa taa lomstan nu ndukwin ayman Moisés nu yuꞌwi ti sꞌni chaꞌ taan ꞌin Ndiose bra nu wa nchkaa seꞌen tiꞌí ꞌñaan. Ngwañaꞌan ka biyaꞌ tiꞌ nten bra nu chkwiꞌ sti joꞌo chaꞌ wa ngwa luwi tyukwi ñaꞌaan. Ja ska ꞌa kicha nsuꞌwi ꞌiin ni.

15 Nchga tsan wa nganen la chaꞌ ꞌin Jesús bra kanꞌ, chaꞌ nchkwiꞌ ꞌa nten chaꞌ ꞌin. Kanꞌ chaꞌ kaꞌan ꞌa nten mdyoꞌ tiꞌin seꞌen ndiꞌin Jesús, chaꞌ kunan neꞌ nchga chaꞌ nu chkwiꞌ yu loꞌo neꞌ, chaꞌ kuꞌni yu chaꞌ chkaa nu tiꞌí ꞌin neꞌ. 16 Bra kanꞌ mdoꞌo Jesús ndyaa yu niꞌ kixinꞌ, nde seꞌen ka tyiꞌin yu ska ti yu, chaꞌ chkwiꞌ yu loꞌo Ndiose Sti yu la kanꞌ.

17 Ngwa ska tsan nduꞌu Jesús chaꞌ ꞌin Ndiose ꞌin kaꞌan nten. Kichen tyi neꞌ kanꞌ lka nchga kichen xuwe ti nu ndiꞌin nde lo yuu ꞌin Galilea, nu ndiꞌin nde lo yuu ꞌin Judea, loꞌo neꞌ kichen Jerusalén ndiꞌin kanꞌ. Loꞌo ndiꞌin tyun neꞌ fariseo laja nten kanꞌ. (Kti ꞌa ngiꞌni neꞌ fariseo, nxkeꞌ tiꞌ neꞌ; lye ꞌa ngiꞌni siyeꞌ neꞌ loꞌo xka ta nten.) Loꞌo ndiꞌin tyun mstru nu nduꞌu chaꞌ joꞌo niꞌ lyaa. Wa mgii tiꞌ nchga nten nu ndiꞌin la kanꞌ, chaꞌ Ndiose lka nu nda chabiyaꞌ ꞌin Jesús chaꞌ ngiꞌni chkaa yu ꞌin neꞌ tiꞌí. 18 Bra kanꞌ mdiyan loꞌo neꞌ ꞌin ska yu tiꞌí nu nsu niꞌ katan, chaꞌ wa nchkunꞌ ñaꞌaan tyukwin yu tiꞌí kanꞌ. Ngwa tiꞌ neꞌ chaꞌ sten neꞌ niꞌ ñaꞌan seꞌen ndiꞌin Jesús, chaꞌ tsaa loꞌo neꞌ ꞌin yu tiꞌí kanꞌ la seꞌen nduun Jesús, ñaꞌaan loꞌo katan ngwa tiꞌ neꞌ. 19 Bra kanꞌ ja mjwi ñaꞌan nu sten neꞌ loꞌo yu tiꞌí kanꞌ niꞌ ñaꞌan, chaꞌ kaꞌan ꞌa nten ndiꞌin kanꞌ; kanꞌ chaꞌ mskwen neꞌ ꞌin yu nde ke naꞌan. Bra kanꞌ mslaa neꞌ chinꞌ ke naꞌan, chaꞌ ngwañaꞌan mjwi ñaꞌan mdiꞌya tiꞌin neꞌ ꞌin yu tiꞌí kanꞌ nde seꞌen nduun Jesús jluꞌwe la seꞌen ndiꞌin nten kaꞌan kanꞌ. 20 Bra ti ngwa biyaꞌ tiꞌ Jesús chaꞌ suꞌwe ꞌa ndyaa ñaꞌan tiꞌ neꞌ kanꞌ ꞌin yu, kanꞌ chaꞌ ykwiꞌ yu loꞌo yu tiꞌí kanꞌ:

―Yu kula ―ndukwin―, wa yꞌni Ndiose chaꞌ tlyu tiꞌ kiꞌya nu ndiꞌin ꞌiin ―ndukwin Jesús ꞌin yu tiꞌí kanꞌ.

21 Bra kanꞌ mdaꞌan ꞌa chaꞌ tiye mstru nu nduꞌu chaꞌ joꞌo kanꞌ loꞌo neꞌ fariseo: “¿Ti ka nu lka yu kiꞌyu re a? ¿Ni chaꞌ lka re a? Kuxi ꞌa nchkwiꞌ yu chaꞌ ꞌin Ndiose chaꞌ nchkwiꞌ yu ngwañaꞌan” mskeꞌ tiꞌ neꞌ. “Ja ka ꞌin ska nten chalyuu kuꞌni tyii kiꞌya sa ñaꞌan ngiꞌni yu re, ja ka kuꞌni nten chaꞌ tlyu tiꞌ kiꞌya nu ndiꞌin ꞌin nten; ska ti Ndiose ka kuꞌni tyii kiꞌya nu ndiꞌin ꞌin nten.” Ngwañaꞌan mdaꞌan chaꞌ tiye neꞌ.

22-23 Wa jlyo tiꞌ Jesús sa ñaꞌan chaꞌ ndaꞌan tiye neꞌ. Bra kanꞌ mnichaꞌ yu ꞌin neꞌ kanꞌ:

―¿Ni chaꞌ ndaꞌan chaꞌ tiye wan ngwañaꞌan a? ¿Ta nxkeꞌ tiꞌ wan chaꞌ tukwi la lka si chkwiǐnꞌ loꞌo yu tiꞌí kwa chaꞌ kuꞌni Ndiose chaꞌ tlyu tiꞌ kiꞌya nu ndiꞌin ꞌin yu a? ¿Ta nxkeꞌ tiꞌ wan chaꞌ sa la ka chaꞌ chkwiǐnꞌ loꞌo yu tiꞌí: “Tyituun lyaa, tyaꞌaan” nxkeꞌ tiꞌ wan a? ¿Ni sa ñaꞌan tñan nu sa la kuꞌniǐn chaꞌ ꞌin yu kwa sikwa a? 24 Nchka tiǎnꞌ chaꞌ ka biyaꞌ tiꞌ wan chaꞌ wa nda Ndiose chabiyaꞌ ꞌñaǎn, chaꞌ kuꞌniǐn chaꞌ tlyu tiꞌ nchga kiꞌya nu ndiꞌin ꞌin nten laja nu ndiꞌiǐn lo chalyuu ―ndukwin Jesús―. Kanꞌ chaꞌ wa msuꞌwa Ndiose ꞌñaǎn ndijyaǎn lo chalyuu chaꞌ kaǎn nten.

Bra kanꞌ xiyaꞌ ykwiꞌ Jesús loꞌo yu kiꞌyu nu nchkunꞌ ñaꞌaan tyukwin yu:

―Nde lka chaꞌ nu chkwiǐnꞌ loꞌoo ―ndukwin Jesús ꞌin yu―, tyituun lyaa chaꞌ tyaa naꞌan tyii; tyaa loꞌo katan seꞌen mstii tsan.

25 Bra ti mdyituun yu tiꞌí kanꞌ, laja nu naꞌan nchga nten kanꞌ ꞌin yu. Bra kanꞌ ndyaa loꞌo yu katan ꞌin yu. Suꞌwe ꞌa ngwa tiye yu xa nu mdoꞌo yu ndyaa yu, kanꞌ chaꞌ yꞌni tnun yu ꞌin Ndiose. 26 Yuwe ꞌa tiꞌ neꞌ ndiꞌin neꞌ. Bra kanꞌ nchga neꞌ kanꞌ yꞌni tnun neꞌ ꞌin Ndiose:

―Ja ya ñaꞌaan chaꞌ kuꞌni Ndiose ska chaꞌ tnun sa ñaꞌan nu yꞌni Jesús kwa ni ―ndukwin neꞌ ꞌin taꞌa neꞌ.

Ngwañaꞌan ykwiꞌ neꞌ loꞌo taꞌa neꞌ chaꞌ ytsen ꞌa neꞌ.

27 Chunꞌ ndiꞌin la ndyaa Jesús chinꞌ ti lo kichen, bra kanꞌ naꞌan yu ꞌin ska nten nde seꞌen ndukwa yu ndlo yu tñi ꞌin nten; Leví naan yu kiꞌyu kanꞌ. Tñan lka yu chaꞌ kulo yu tñi ꞌin neꞌ kichen chaꞌ ꞌin neꞌ xka laꞌa tsuꞌ. Bra kanꞌ ykwiꞌ Jesús loꞌo yu:

―Kaan lyaa, tsaa loꞌoǔn ―ndukwin.

28 Loꞌo ngulaa yaꞌ Leví tñan ꞌin yu chaꞌ tsaa yu loꞌo Jesús bra kanꞌ.

29 Chunꞌ ndiꞌin la, kanꞌ yꞌni Leví ska taꞌa tlyu nde naꞌan tyi yu, chaꞌ kuꞌni tnun yu ꞌin Jesús. Mdiyan tyun nten naꞌan tyi yu, loꞌo taꞌa ngiꞌni Leví tñan chaꞌ ndlo tñi ꞌin nten; loꞌo ti ndiꞌin la xka ta nten la kanꞌ. 30 Bra kanꞌ mdyisnan neꞌ fariseo nu kti ꞌa ngiꞌni neꞌ, nxkeꞌ tiꞌ neꞌ, loꞌo mstru nu nduꞌu chaꞌ joꞌo kanꞌ, ykwiꞌ neꞌ loꞌo neꞌ nu ngiꞌni xaꞌan chaꞌ ꞌin Jesús.

―¿Ni chaꞌ lka chaꞌ suꞌwa ti nchku wan loꞌo neꞌ kuxi kwa a? ¿Ni chaꞌ suꞌwa ti ndiꞌin wan loꞌo neꞌ kwa a? ―ndukwin neꞌ―. Msu ꞌin neꞌ xka laꞌa tsuꞌ lka neꞌ kwa. Kwiñi ꞌa neꞌ kwa chaꞌ ndlo neꞌ kaꞌan ꞌa tñi ꞌin nten. Loꞌo ti ndiꞌin la xka ta nten nu ngiꞌni ꞌa chaꞌ kuxi.

31 Bra kanꞌ mxkwen Jesús ꞌin neꞌ kanꞌ:

―Nten nu ngula tiꞌ ni, ja tsaa naan neꞌ kanꞌ ꞌin ska nu kuꞌni joꞌó ꞌin neꞌ; neꞌ tiꞌí lka nu ndaꞌan naan ꞌin ska nu kuꞌni joꞌó ꞌin neꞌ ―ndukwin―. 32 Ngwañaꞌan naꞌ, ja ndijyaǎn chaꞌ tyaꞌan naǎn ꞌin nten nu nxkeꞌ tiꞌ chaꞌ ja ndiꞌin kiꞌya ꞌin; nan wa ndijyaǎn chaꞌ chkwiǐnꞌ loꞌo neꞌ kuxi, chaꞌ kulaa yaꞌ neꞌ kiꞌya nu ndiꞌin ꞌin neꞌ.

33 Bra kanꞌ mnichaꞌ neꞌ ꞌin Jesús:

―Loꞌo neꞌ nu ngiꞌni xaꞌan ꞌin Xuwa, loꞌo neꞌ nu ngiꞌni xaꞌan ꞌin neꞌ fariseo, ¿ni chaꞌ lye ꞌa nchkwiꞌ neꞌ kanꞌ loꞌo Ndiose? Kwiꞌ ngwañaꞌan, ja nchku neꞌ tsan nu nchkwiꞌ neꞌ loꞌo Ndiose. Loꞌo neꞌ nu ngiꞌni xaꞌan ꞌiin, xka ñaꞌan ngiꞌni neꞌ kanꞌ; xkwiꞌ suꞌwe ꞌa nchku neꞌ, xkwiꞌ suꞌwe ꞌa ndiꞌyo neꞌ ―ndukwin neꞌ ꞌin Jesús.

34 Mxkwen Jesús chaꞌ re ꞌin neꞌ kanꞌ bra kanꞌ:

―Bra nu kaja kwilyoꞌo nten, nchku neꞌ nu ndaꞌan loꞌo kuxiin; ja ndiꞌin neꞌ ngiteꞌ tiꞌ neꞌ tsan kanꞌ, bra nu ndiꞌin neꞌ loꞌo kuxiin ―ndukwin Jesús―. 35 Bra nu tiya tsan nu xñi neꞌ ꞌin nu kiꞌyu kuxiin chaꞌ tyaa loꞌo neꞌ ꞌin yu, bra kanꞌ ja ku ꞌa neꞌ taꞌa suꞌwe nsuꞌwi yu; ka xiꞌin tiꞌ neꞌ bra kanꞌ. Kwiꞌ ngwañaꞌan, suꞌwe nka tiye taꞌa suꞌweěn ni, ni siya ka xiꞌin ꞌa tiꞌ neꞌ nde loo la bra kanꞌ ―ndukwin Jesús.

36 Loꞌo kanꞌ ykwiꞌ Jesús chaꞌ re loꞌo neꞌ:

―Ja siꞌyu wan ska yuꞌwe teꞌ tiji ꞌwan chaꞌ xuꞌwa lo ska teꞌ kusun ꞌwan. Si ngwañaꞌan kuꞌni wan, ja kanun suꞌwe teꞌ tiji kanꞌ bra kanꞌ, tyiꞌiin ran tyaaꞌ seꞌen nchkwan teꞌ kanꞌ; loꞌo yuꞌwe teꞌ tiji kanꞌ, ja suꞌwa ñaꞌan loꞌo teꞌ kusun kanꞌ. 37 Loꞌo xka chaꞌ ni ―ndukwin Jesús ꞌin neꞌ―, ja nsuꞌwa neꞌ xalyu nu tka mdoꞌo ti niꞌ chkaꞌ kula. Si suꞌwa neꞌ ꞌin ran niꞌ chkaꞌ kula, ndla ti katsu siꞌ chkaꞌ kanꞌ; lyaꞌa chkaꞌ kanꞌ, tyii xalyu kalu bra kanꞌ. 38 Niꞌ chkaꞌ tiji xuꞌwi xalyu nu tka mdoꞌo ti. 39 Bra nu wa yiꞌo neꞌ xalyu nu wa kula, ja nchka ꞌa tiꞌ neꞌ koꞌo neꞌ xalyu nu tka mdoꞌo ti. “Xi la ndiꞌyo xalyu nu wa kula kanꞌ” nchkwin neꞌ.

Ngwañaꞌan ngwa chaꞌ tiya nu ykwiꞌ Jesús loꞌo neꞌ kanꞌ.