1 Utew en meǥurang si Hadì David, ne minsan ebmelungan pa sikandin te mekepal he menge malung egkeǥenew ǥihapun. 2 Umbe, migkaǥi ziyà te kandin is menge suluǥuen din te, “Mahal he Hadì, tuǥuti key kenikew te kebpen-ahà te raǥaraǥa he ed-elima kenikew. Ibpehulid sikandin kenikew para kenè ka meǥenew.” 3 Umbe, nengahà sikandan te mekempet he raǥa seled te tivuuk he Israel, ne iyan neehè dan si Abishag he tig-Shunem, ne miduma zan sikandin diyà te hadì. 4 Utew mekempet si Abishag, ne nehimu sikandin he peraatur zuen te hadì. Piru wazà sikandin hileveti zuen te hadì.

5 Dutun, si Adonia he anak ni David diyà te sevaha te menge esawa zin he si Hagit, mibpahambug he egkehimu sikandin he hadì. Umbe mid-andam din is menge kerwahi wey menge kudà wey 50 he etew he vantey zin. 6 Puun pa te nengehuna he timpu pinesagdan sikandin ni David, ne kenè en edewayen ke hengkey is ebeelan din. Utew metaid si Adonia; nesekepu sikandin ni Absalom. 7 Mibpekidlalag si Adonia ki Joab he anak ni Zeruya wey ki Abiatar he memumuhat bahin te pelanu zin he kedhadì, ne mid-uyun sikandan te ked-uǥup kandin. 8 Piru wazà mulà meduyug kandin si Zadok he memumuhat, si Benaya he anak ni Jehoyada, si Natan he ebpeneuven, si Shimei, si Rei, wey is menge vantey ni David.

9 Ne sevaha he andew, midhendiyà si Adonia te Batu ziyà te Zohelet he uvey te En Rogel, ne nemuhat sikandin dutun te kerehidu, menge vaka, ragkes en is impelambù he turiti he menge vaka. Mid-imbita zin is hapit langun te menge suled din he menge maama he menge anak ni David, wey hapit langun te menge upisyal ziyà te Juda. 10 Piru wazè din mulà imbitaha si Natan he ebpeneuven, si Benaya, is menge vantey ni David, wey is suled din he si Solomon.

11 Midhendiyà si Natan te ki Batsheba he iyan iney ni Solomon, ne mid-insà te, “Wazè nu ve metueni he midhimu en ni Adonia is keugelingen din he hadì, ne wazà heini metueni ni Hadì David? 12 Emun egkesuat ka he kenè ka mebpatey wey kenà mebpatey is anak nu he si Solomon, tumana nu is idsambag ku kenikew. 13 Hendiyè ka te ki Hadì David ne keǥiyi nu sikandin te, ‘Mahal he Hadì, kenè be midsaad ka kayi te kedì he iyan nu ibpeilis kenikew te kedhadì is anak ta he si Solomon, ne maan is iyan nehimu he hadì si Adonia?’ 14 Ne zutun te ebpekidlalag ka zuen te hadì, edseled a ne ebpenistiǥusan ku is egkeǥiyen nu.”

15 Umbe, midhendiyà si Batsheba te ruǥu zuen te hadì. Utew en meǥurang sikan is hadì ne iyan ed-atur kandin si Abishag he tig-Shunem. 16 Midluhud si Batsheba su edtahud dutun te hadì. Ne mid-insà haazà is hadì te, “Hengkey is tuyù nu?”

17 Midtavak si Batsheba te, “Mahal he Hadì, midsaad ka kayi te kediey pinaaǥi te ngazan te Nengazen he Megbevayè nu he iyan nu ibpeilis kenikew te kedhadì is anak ta he si Solomon. 18 Piru ǥuntaan si Adonia en is nehimu he hadì, ne wazè nu heini metueni. 19 Nemuhat sikandin te mezakel he tudu he menge vaka, impelambù he menge turiti he vaka, wey menge kerehidu, ne mid-imbita zin is hapit langun te maama he menge anak nu, gawas dà ki Solomon te suluǥuen nu. Mid-imbita zin daan si Abiatar he memumuhat wey si Joab he peremandar te menge sundaru nu. 20 Ne ǥuntaan Mahal he Hadì, edtaǥad is menge Israilihanen te disisyun nu ke hentei is ebpekeilis kenikew he hadì. 21 Emun kenè ka edisisyun, ne siak wey is anak ta he si Solomon ed-isipen he meluiven emun ebpatey ke en.”

22 Ne zutun te ebpekidlalag pa si Batsheba zuen te hadì, nekeuma si Natan he ebpeneuven. 23 Duen etew he migkeǥiyan din haazà is hadì te nekeuma si Natan, umbe impetawag sikandin duen te hadì. Kedseled ni Natan, midluhud sikandin su edtehuzen din haazà is hadì. 24 Ne ke sikandin te, “Mahal he Hadì, migkaǥi ke ve he si Adonia is ebpekeilis kenikew te kedhadì? 25 Nemuhat sikandin guntaan te mahabet he tudu he vaka, impelambù he menge turiti he vaka, wey menge kerehidu. Ne mid-imbita zin is hapit langun te maama he menge anak nu, is peremandar te menge sundaru nu, wey si Abiatar he memumuhat. Egkekaan dan wey ed-iinum dan guntaan, he ke sikandan te, ‘Mebmeluǥayad is untung ni Hadì Adonia!’ 26 Piru siak is suluǥuen nu wazè e zin mulà imbitaha, ragkes en si Zadok he memumuhat, si Benaya he anak ni Jehoyada, wey si Solomon he suluǥuen nu. 27 Intuǥut nu ve heini, Mahal he Hadì, he wazè key kenikew ipesayud ke hentei is ebpekeilis kenikew te kedhadì?”

28 Migkaǥi si Hadì David te, “Ipehengkayi si Batsheba.” Umbe midhendiyà si Batsheba. 29 Ne nenangdù si Hadì David, ke sikandin te, “Ebpenangdù a ziyà te uuyag he Nengazen, he midlibri kedì te langun he kezeetan, 30 he edtumanen ku ǥuntaan sikan is penaad ku kenikew pinaaǥi te ngazan te Nengazen he Megbevayà te Israel, he iyan is anak ta he si Solomon ebpekeilis kedì te kedhadì.”

31 Ne zutun segugunà midluhud si Batsheba te kedtahud dutun te hadì, ke sikandin te, “Mahal he Hadì David, berakat he mebmeluǥayad is untung nu!” 32 Migkaǥi si Hadì David te, “Ipehengkayi si Zadok he memumuhat, si Natan he ebpeneuven, wey si Benaya he anak ni Jehoyada.” Umbe midhendutun dan te hadì, 33 ne migkaǥi haazà is hadì diyà te kandan te, “Ipeuntud niw sikan is anak ku he si Solomon duen te kudè ku, ne zumaha niw sikandin diyà te Gihon ragkes is menge upisyal ku. 34 Ne emun diyè kew en, sikiyu Zadok wey Natan, iyan kew medlana ziyà te ulu ni Solomon te kebpekilala he iyan sikandin pinilì he hadì te Israel. Ne zutun pezaǥing kew te vudyung ne ivensag niw is lalag he edhenduen te, ‘Mebmeluǥayad is untung ni Hadì Solomon!’ 35 Ne kegkepasad dutun ne zumaha niw te kedlikù dini, ne ebpinuu sikandin diyà te pinuuwè ku te kedhadì su iyan sikandin ed-ilis kedì te kedhadì. Iyan sikandin mibpilì ku he edumala te tivuuk he Israel wey Juda.”

36 Midtavak si Benaya he anak ni Jehoyada te, “Ebeelan dey heeyan! Ne verakat he is Nengazen he Megbevayè nu, ebpenistiǥus kayi, Mahal he Hadì. 37 Ne iring te miduma kenikew is Nengazen, Mahal he Hadì, ne verakat he meduma zaan sikandin ki Solomon, ne himuwa zin he lavew pa he meuswaǥen is ginhedian din te kenikew he ginhedian.”

38 Umbe, migenat si Zadok he memumuhat, si Natan he ebpeneuven, si Benaya he anak ni Jehoyada, wey is menge tigbantey ni David he menge Kiritnen wey menge Pilitnen. Impeuntud dan si Solomon diyà te kudà ni Hadì David ne miduma zan diyà te Gihon. 39 Kebpekeuma zan diyà te Gihon, migkuwa ni Zadok diyà te segradu he tulda is lana he intaǥù diyà te teleǥuey he sungey, ne midheplasan din si Solomon diyà te ulu. Impezaǥing dan is budyung ne ingkulahì dan is lalag te, “Mebmeluǥayad is untung ni Hadì Solomon!” 40 Midtundug is menge etew ki Hadì Solomon he edtekezeg pehendiyà te Jerusalem is ebpemen-ugyab te kegkelipey he ebpemezaǥing te menge pulalà. Ne henduen be te egketegker is tanà te keǥurub dan.

41 Heini is langun nezineg ni Adonia wey te menge meǥeliyug din dutun te egkepasad en is kebibuwan dan. Kegkezineǥa ni Joab te trumpita, nekeinsà sikandin te, “Hengkey is nehitavù, maan is utew meǥurub diyà te inged?” 42 Dutun te kemulu pa sikandin egkaǥi, nekeuma si Jonatan is anak ni Abiatar te memumuhat. Ne migkeǥiyan ni Adonia te, “Seled ka su meupiya ka he etew; siguradu zuen meupiya he egketudtul nu.” 43 Midtavak si Jonatan te, “Kenà meupiya is tudtul ku, su midhimu ni Hadì David si Solomon he hadì. 44 Impehendiyè din si Solomon te Gihon duma si Zadok he memumuhat, si Natan he ebpeneuven, si Benaya he anak ni Jehoyada, wey is menge tigbantey zin he menge Kiritnen wey menge Pilitnen. Impeuntud dan pa ganì si Solomon te kudà duen te hadì. 45 Kebpekeuma zan diyà te Gihon, midlenahan sikandin ni Zadok wey si Natan he tuus te iyan sikandin pinilì he hadì. Puun dutun, midtekezeg sikandan medlikù dini te Jerusalem ne ebpemen-ugyab dan te kegkelipey wey is menge etew te inged. Ne iyan heeyan is meǥurub he egkezineg niw. 46 Ne ǥuntaan iyan en si Solomon mibpinuu ziyà te pinuuwà te hadì. 47 Ne elin daan midhendiyà te ki Hadì David is menge upisyal zin te kebeǥey te zengeg ki Solomon. Ke sikandan te, ‘Berakat he himuwa te Megbevayè nu si Solomon he tuwas pa he ventuǥan kenà sikew, wey himuwa zin he tuwas pa he meuswaǥen is ginhedian din te kenikew he ginhedian.’ Ne midungul si David diyà te hizeǥaan din te ked-azap te Nengazen, 48 he ke sikandin te, ‘Edeliǥen is Nengazen he Megbevayà te Israel, su intuǥut din he meehè ku ǥuntaan he andew is kegkeilisi kedì te anak ku te kedhadì.’ ”

49 Ne kegkezineǥa kayi te menge meǥeliyug ni Adonia, nemenhitindeg sikandan is utew egkengehandek, ne migenat is uman sevaha kandan. 50 Nahandek daan si Adonia ki Solomon, umbe midhendiyà sikandin te segradu he tulda ne migawed duen te menge sungeysungey te menge suyuk duen te pemuhatà.

51 Ne zuen migkaǥi ziyà te ki Solomon te, “Nahandek kenikew si Adonia, ne migawed sikandin duen te menge sungeysungey te menge suyuk duen te pemuhatà. Edhangyù sikandin he penangdù ka he kenè nu sikandin edhimetayan.” 52 Migkaǥi si Solomon te, “Emun kenè e zin edlimbungan, ne kenà sikandin egkemenu. Piru emun edlimbung edhimetayan ku.” 53 Ne impekua ni Hadì Solomon si Adonia dutun te pemuhatà, ne kebpekeuma ni Adonia, midluhud sikandin te kedtahud ki Hadì Solomon. Migkaǥi si Solomon diyà te kandin te, “Ulì ka.”