1 Yesu nakalonga nawo kahi kwa nhelo, 2 “Undewa wa kilanga wiwhana kota hino, kwali na mndewa yamditichile mwanage mnvina ya kuhesa. 3 Lelo, kawalajiza vitumagwa wawacheme walalikwe woye kuli mnvina, ila wala walalikwe walema kuya. 4 Kawalajiza kahi vitumagwa wanji, yolonga, ‘Muwalonjele wala walalikwe, ndiya ya heni ya goya sambi, isenga lya heni na ilogota lihatile wachinjigwa, chila chinhu cha goya, muye kuli izenjele.’ 5 Ila hewo hawang'ulile, waluta, yumwe kumgunda kwa heye, yunji kuli mbuli za heye, 6 na wanji wawebata awala vitumagwa wawaliga na kuwakopola. 7 Yula mndewa nakazudila, kawalajiza wamizi wa heye wakawabagamize awo wakopolaji na kuwasomela luga lwao. 8 Hamba kawalonjela vitumagwa wa heye, ‘Ndiya ya izenjele ya goya ng'hatu, ila walalikwe wachakachaka. 9 Lelo, mlute kuli nzila mhanda na woneche wala womuwafika wachemeni woye kuli izenjele.’ 10 Wala vitumagwa walawa, waluta kunzila wawegala wanhu weng'ha, wehile na wanojile. Ng'handa ya izenjele na imema wajenzi.

11 “Mndewa loyenjile kawona wajenzi, kamona munhu yumwe yawele havalile chiuzenjele. 12 Mndewa kamuuza, ‘Mng'holozangu, kwinjila ndaze hano houvalile chizenjele?’ Ila heye nakanyamalila tulu. 13 Aho mndewa kawalonjela vitumagwa, ‘Muwopeni magulu na moko mkamtaje kunze kuli kutitu, ako kolila na kujejeda mizino.’ ” 14 Yesu nakasinda kwa kulonga, “Walalikwa wenji, ila wahaguligwe wachefu.”

15 Hamba, Mafalisayo waluta, welonjelela nzila ya kumgwiliza Yesu kwa ulonzi wa heye. 16 Lelo, wawalajiza vitumagwa wa hewo hamwe na walanguswa wa chilundo cha Helodi. Nawamuuza, “Mlangusa, tuvizela kota hegwe kwa munhu utanganiche, na kota kwa kulangusa nzila ya Nguluwi kwa kukomya ng'hatu, hulingumdumba munhu yoneche, mina ukulu wa munhu hauwele chinhu kwa hegwe. 17 Lelo, tulonjele majesa ga hegwe. Ndaze, iwa goya au hebu kulavya kodi kwa mndewa wa Loma?” 18 Ila Yesu nakavizela wihe wa hewo wowalingijesa nakuwalonjela, “Hemwe wahadi lekachoni mwangunjeza? 19 Mndajile sendi yomlingulavila kodi.” Na hewo wamlavila igwala lya sendi. 20 Lelo, Yesu nakawauza, “Mutwi na itagwa ali ndo lya whaani?” 21 Nawamwidichila, “Ndo cha mndewa wa Loma.” Aho Yesu kawalonjela, “Lelo, ga mndewa wa Loma mmigalile mndewa wa Loma na ga Nguluwi mmigalile Nguluwi.” 22 Lowahuliche ahyo nawabubuwala wamleka, woka.

23 Zuwa alyo, wamwe wa Masadukayo nawawele wolonga wabagame hawozilipuka nawamlutila Yesu. 24 Lelo, nawamlonjela, “Mlangusa, Musa nakalonga munhu yaholile mdala wone yabagame ne kulela mwana, imgana mng'holoze, yamhole yula mdala mlekwa, leka yamlelele wana mng'holoze. 25 Lelo, aha hetu kwali na wanhu saba wa lulelo lumwe. Wa mwaluko nakabagama ne kulela mwana, ayula mdala mlekwa nakaholeka kahi na mng'holoze. 26 Iwa hihyo kwa wakeli na wakadatu, mbaka weng'ha saba. 27 Awo weng'ha lowabagame, na yula mdala nakabagama. 28 Lelo, zuwa lya wabagame kuzilipuka mdala ayo kowa mdala wa yalikohi kwa wala walume saba? Mina weng'ha saba namhola yuye.”

29 Yesu nakawedichila, “Hemwe muwifya kwa vila hamgazelele Maandiko Matakatifu ne mong'ho wa Nguluwi. 30 Mina wabagame howozilipuka hawohesa ne kuhesigwa hebu, wowa kota wahilisi wa kilanga. 31 Ila kwa mbuli ya kuzilipuka kwa wabagame, ndaze, hamsomile gala goyawalonjele Nguluwi? Nakawalonjela, 32 ‘Heni nda Nguluwi wa Ibulahimu na wa Isaka na wa Yakubu!’ Lelo, heye hawele Nguluwi wa wabagame ila ndo Nguluwi wa wawele wakomu.” 33 Lula lung'hongola lwa wanhu loluhuliche ahyo, lububuwala kwa ulanguso wa heye.

34 Masadukayo lowahuliche kota Mafalisayo wahela chinhu chinji cha kumuuza kahi Yesu, nawating'hana hamwe. 35 Yumwe wa hewo, mtagusa, nakamuuza Yesu kwa kumjeza, 36 “Mlangusa, malajizo galikohi ndo gawele makulu kuli utaguso?” 37 Yesu nakamwidichila, “ ‘Umgane Mkulu Nguluwi wa hegwe kwa nhumbula ya hegwe yeng'ha na kwa muhe wa hegwe weng'ha na kwa luhala lwa hegwe lweng'ha.’ 38 Ali ndo ilajizo liwele likulu na lya mwaluko. 39 Lya keli iwhana na lilyo, ‘Umgane youlingikalasa habehi kota vyoulingigana gwegwe baho.’ 40 Malajizo ga Musa gandichigwe na waloli wa Nguluwi gangitumbila mizilo aji mili.”

41 Mafalisayo lowating'hane hamwe, Yesu nakawauza, 42 “Hemwe mwangona ndaze mbuli ya Kilistu Mlohozi? Ka mwana wa whaani?” Wamwidichila, “Mwana Daudi.” 43 Yesu kawalojela, “Lelo, iwa ndaze,” “Kota kwa ludali lwa Muhe Yelile Daudi kangumchema heye ‘Mkulu’? Mina nakalonga,