1 Ⱪerindaxlirim, aranglardin kɵp kixi tǝlim bǝrgüqi boliwalmanglar! Qünki silǝrgǝ mǝlumki, biz tǝlim bǝrgüqilǝr baxⱪilardin tehimu ⱪattiⱪ soraⱪⱪa tartilimiz.■ Mat. 7:1; 23:8; Luⱪa 6:37. 2 Qünki ⱨǝmmimiz kɵp ixlarda hatalixip putliximiz. Ⱨalbuki, ǝgǝr birsi tilda hatalaxmisa, u kamalǝtkǝ yǝtkǝn, pütkül tenini tizginliyǝligǝn adǝm bolidu.■ Zǝb. 34:13; Yaⱪ. 1:26. 3 Mana, biz atlarni ɵzimizgǝ beⱪindurux üqün aƣziƣa yügǝn salimiz; buning bilǝn pütkül tǝnlirini haliƣan tǝrǝpkǝ buriyalaymiz. 4 Mana, kemilǝrgimu ⱪaranglar; xunqilik yoƣan bolsimu, yǝnǝ kelip dǝⱨxǝtlik xamallar tǝripidin urulup ⱨǝydilidiƣan bolsimu, lekin rolqi ⱪǝyǝrgǝ ularni ⱨǝydǝy desǝ, u kiqikkinǝ bir rol arⱪiliⱪ uni haliƣan tǝrǝpkǝ buraydu. 5 Xuningƣa ohxax, gǝrqǝ til tenimizning kiqik bir ǝzasi bolsimu, lekin tolimu yoƣan sɵzlǝydu. Kiqikkinǝ bir ot uqⱪunining qong ormanƣa ot tutaxturalaydiƣanliⱪini oylap beⱪinglar!■ Pǝnd. 12:18; 15:2. 6 Til — dǝrwǝⱪǝ bir ottur; u ǝzalirimiz arisidin orun elip ⱪǝbiⱨlikkǝ tolƣan bir alǝm bolidu. U pütkül tǝnni bulƣiƣuqidur; u dozah otidin tutaxturulup, pütkül tǝbiǝtning qaⱪiƣa ot tutaxturidu!□ «... u dozah otidin tutaxturulup, pütkül tǝbiǝtning qaⱪiƣa ot tutaxturidu!» — «pütkül tǝbiǝt» degǝnning baxⱪa birhil tǝrjimisi: «barliⱪ insaniy dunya». 7 Qünki ⱨǝrtürlük ⱨaywanlar ⱨǝm uqar-ⱪanatlar, ɵmiligüqi ⱨaywanlar ⱨǝm dengizdiki mǝhluⱪlar insaniyǝt tǝripidin kɵndürülmǝktǝ ⱨǝmdǝ kɵndürülgǝnidi. 8 Əmma tilni ⱨeqkim kɵndürǝlmǝydu; u tinimsiz rǝzil bir nǝrsǝ bolup, janƣa zamin bolidiƣan zǝⱨǝrgǝ tolƣandur. 9 Biz tilimiz bilǝn Pǝrwǝrdigar Atimizƣa xanu-tǝxǝkkür ⱪayturimiz, wǝ yǝnǝ uning bilǝn Hudaning obrazida yaritilƣan insanlarni ⱪarƣaymiz. 10 Demǝk, ohxax bir eƣizdin ⱨǝm tǝxǝkkür-mubarǝk ⱨǝm lǝnǝt-ⱪarƣax qiⱪidu. I ⱪerindaxlirim, bundaⱪ bolmasliⱪi kerǝk! 11 Bir bulaⱪ ohxax bir kɵzdin birla waⱪitta tatliⱪ ⱨǝm ⱪirtaⱪ su qiⱪiramdu? 12 I ⱪerindaxlirim, ǝnjür dǝrihi zǝytunning mewisini bǝrmǝydu, yaki üzüm teli ǝnjürning mewisini berǝlǝmdu? Ⱨǝm tuzluⱪ bulaⱪ tatliⱪ sunimu qiⱪiralmaydu.

13 Aranglarda kim dana wǝ pǝmlik? Pǝzilǝtlik yürüx-turuxidin u danaliⱪⱪa has bolƣan mɵmin-kǝmtǝrlik bilǝn ǝmǝllirini kɵrsǝtsun! ■ Əf. 5:8. 14 Lekin ǝgǝr ⱪǝlbinglarda aqqiⱪ ⱨǝsǝthorluⱪ wǝ jedǝl-majira bolsa, ǝmdi yalƣan sɵzlǝr bilǝn ⱨǝⱪiⱪǝtni yoⱪⱪa qiⱪarmanglar, mahtanmanglar. □ «lekin ǝgǝr ⱪǝlbinglarda aqqiⱪ ⱨǝsǝthorluⱪ wǝ jedǝl-majira bolsa, ǝmdi yalƣan sɵzlǝr bilǝn ⱨǝⱪiⱪǝtni yoⱪⱪa qiⱪarmanglar, mahtanmanglar» — «mahtanmanglar» degǝnlikning mǝnisi bolsa: ««mǝndǝ danaliⱪ bar» demǝnglar».  ■ Rim. 13:13. 15 Bundaⱪ «danaliⱪ» ǝrxtin ǝmǝs, bǝlki dunyaƣa, insan tǝbiiyitigǝ has bolup, jin-xǝytandin kǝlgǝndur. □ «Bundaⱪ «danaliⱪ» ǝrxtin ǝmǝs...» — grek tilida «bundaⱪ «danaliⱪ» yuⱪiridin ǝmǝs». «bǝlki dunyaƣa ... has bolup...» — grek tilida «yǝr-zeminƣa ... has bolup» deyilidu. «bundaⱪ «danaliⱪ» ǝrxtin ǝmǝs, bǝlki dunyaƣa, insan tǝbiiyitigǝ has bolup, jin-xǝytandin kǝlgǝndur» — «dunya» yaki «bu dunya» bolsa, Tǝwrat-injil boyiqǝ, Hudaƣa ⱪarxi qiⱪⱪan, Xǝytan tǝripidin baxⱪurulƣan pütkül bir sistemini kɵrsitidu (4-babni kɵrüng). «Insan tǝbiyitigǝ has» grek tilida «janliⱪ» degǝn sɵz bilǝn ipadilinidu. Muxu yǝrdiki grek tilidiki «jan» insan xǝhsining üq ⱪismi (roⱨ, jan, tǝn)ning birini kɵrsitidu. Hudaƣa tayanmiƣaqⱪa, gunaⱨkar isnanlarning ɵzlirining «jenidin qiⱪⱪan» ǝⱪil-parasǝtliri wǝ oy-pikirliri Hudaning Roⱨidin qiⱪⱪan bolmiƣaqⱪa, ⱨǝrgiz Hudaning kɵnglidikidǝk bolmaydu («Rimliⱪlarƣa»diki «kirix sɵz»imizni kɵrüng.  ■ 1Kor. 2:6, 7. 16 Qünki ⱨǝsǝthorluⱪ wǝ jedǝl-majira bolƣanla yǝrdǝ ⱪalaymiⱪanqiliⱪ wǝ ⱨǝrhil rǝzilliklǝr bolidu. ■ 1Kor. 3:3; Gal. 5:20. 17 Lekin ǝrxtin kǝlgǝn danaliⱪ bolsa, u aldi bilǝn paktur, u yǝnǝ tinqliⱪpǝrwǝr, hux peil, baxⱪilarning pikrigǝ ⱪuliⱪi oquⱪ, rǝⱨimdil bolup, yahxi mewilǝr bilǝn tolƣan, uningda tǝrǝpbazliⱪ yaki sahtipǝzlik yoⱪtur. □ «lekin ǝrxtin kǝlgǝn danaliⱪ bolsa,...» — grek tilida «lekin yuⱪiridin kǝlgǝn danaliⱪ bolsa...». 18 Ⱨǝⱪⱪaniyliⱪ uruⱪliri tinqliⱪpǝrwǝrlǝr arisida qeqilip, tinqliⱪ iqidǝ mewǝ beridu.□ «ⱨǝⱪⱪaniyliⱪ uruⱪliri tinqliⱪpǝrwǝrlǝr arisida qeqilip, tinqliⱪ iqidǝ mewǝ beridu» — «ⱨǝⱪⱪaniyliⱪ uruⱪliri» degǝnlik adǝmning ⱨayatida pǝyda bolƣan yaki ɵsidiƣan ⱨǝⱪⱪaniyliⱪni kɵrsitidu.