Muⱪeddes Kalam (yǝngi yeziⱪ) Korintliⱪlarƣa «2» 9

Sowni tǝyyarlax — sehiy boluxⱪa ündǝx

1 Qünki muⱪǝddǝs bǝndilǝrning bu yardǝm hizmiti toƣruluⱪ silǝrgǝ yǝnǝ yeziximning ⱨajiti yoⱪ.■ 2 Qünki mǝn silǝrning bu ixⱪa ⱪattiⱪ bǝl baƣliƣininglarni bilimǝn; mǝn bu toƣruluⱪ: Ahayadikilǝr ɵtkǝn yildin beri hǝyr-sǝdiⱪǝ berixkǝ tǝyyar turuwatidu, dǝp Makedoniyǝdiki ⱪerindaxlarƣa pǝhirlinip mahtap kǝlmǝktimǝn, xuning bilǝn silǝrning ⱪizƣinliⱪinglar ularning kɵpinqisining hǝyr-sǝdiⱪǝ berixigǝ türtkǝ boldi.□ 3 Lekin ⱪerindaxlarni ǝwǝtixtiki mǝⱪsitim silǝrning toƣranglarda pǝhirlinip mahtiximning bu ixlarda biⱨudǝ ix bolup ⱪalmasliⱪi, silǝrning deginimdǝk tǝyyar bolup turuxunglar üqündur.□ 4 Mubada Makedoniyǝdikilǝr mǝn bilǝn billǝ barƣinida, silǝr tǝyyarliⱪsiz bolsanglar, bu ixǝnqimiz wǝjidin biz hijalǝtkǝ ⱪaldurulimiz, silǝr sɵzsiz xundaⱪ bolisilǝr. 5 Xu sǝwǝbtin mǝn ⱪerindaxlardin yeninglarƣa berip silǝrdin bu wǝdǝ ⱪilƣan hǝyrlik ixni aldin’ala tǝyyarlap püttürüxini ɵtünüxni zɵrür dǝp ⱨesablidim; xundaⱪla bu silǝrdin birǝr nǝrsǝ ündüriwelix bolmisun, bǝlki meⱨribanliⱪinglardin bolsun. 6 Əmma buni ǝslǝnglar: Behilliⱪ bilǝn az teriƣan az alidu, oquⱪ ⱪolluⱪ bilǝn teriƣini mol alidu.□ ■ 7 Ⱨǝr adǝm ⱨeq ⱪiynilip ⱪalmay yaki mǝjburǝn ǝmǝs, bǝlki ɵz kɵnglidǝ pükkiniqǝ bǝrsun; qünki Huda huxalliⱪ bilǝn bǝrgüqini yahxi kɵridu.■ 8 Əmma Huda ⱨǝrbir iltipat-xapaǝtni silǝrgǝ exip taxturuxⱪa ⱪadirdur; xuning bilǝn silǝr ⱨǝrdaim ⱨǝrtǝrǝptǝ ⱨǝr eⱨtiyajⱪa tǝyyar ⱪuwwǝtlinisilǝr, kǝngriqiliktǝ turup ⱪolliringlar ⱨǝrhil güzǝl ixⱪa yetidu.□ 9 Muⱪǝddǝs yazmilarda pütülginidǝk: —

«U ɵziningkini tarⱪatⱪan,

U yoⱪsullarƣa sǝdiⱪǝ bǝrgǝn;

Uning ⱨǝⱪⱪaniyliⱪi mǝnggügǝ turidu».□ ■

10 Əmdi teriƣuqiƣa teriƣili uruⱪ, yegili nan ata ⱪilƣuqi silǝrning teriydiƣan uruⱪliringlarni tǝminlǝp mol ⱪilidu, ⱨǝⱪⱪaniyliⱪinglarning ⱨosul-mewilirini kɵpǝytidu. □ 11 Xuning bilǝn silǝr ⱨǝrⱪandaⱪ ǝⱨwalda ⱪoli oquⱪ boluxⱪa ⱨǝr tǝrǝptǝ beyitilisilǝr, xuningdǝk bu ix biz arⱪiliⱪ Hudaƣa kɵp tǝxǝkkürlǝrni elip baridu; □ 12 qünki bu hǝyrlik hizmǝtni ada ⱪilix pǝⱪǝt muⱪǝddǝs bǝndilǝrning ⱨajǝtlirini ⱪandurupla ⱪalmay, kɵp kixilǝrning Hudaƣa yǝtküzgǝn tǝxǝkkürlirini exip taxturidu. □ 13 Bu yardǝm hizmiti ɵzliringlarning Mǝsiⱨning hux hǝwirini etirap ⱪilixinglardiki mewǝ bolƣan itaǝtmǝnlikinglarƣa dǝlil-ispat bolidu, xundaⱪla silǝrning muxu ⱨajǝtmǝn bǝndilǝrgǝ, xundaⱪla barliⱪ adǝmlǝrgǝ kɵrsǝtkǝn oquⱪ ⱪolluⱪ sehiyliⱪinglardin ular Hudani uluƣlaydu. 14 Wǝ Hudaning silǝrdǝ taxⱪinlatⱪan ajayib meⱨir-xǝpⱪiti tüpǝylidin, ular silǝr üqün dua-tilawǝt ⱪilƣinida, ular silǝrgǝ tǝlpünüp ⱪattiⱪ seƣinip ǝslǝydu. □ 15 Uning til bilǝn ipadiligüsiz ajayib sowƣisi üqün Hudaƣa tǝxǝkkür bolƣay!

■9:1 Ros. 11:29; Rim. 15:26; 1Kor. 16:2; 2Kor. 8:4.

□9:2 «mǝn bu toƣruluⱪ: Ahayadikilǝr ɵtkǝn yildin beri hǝyr-sǝdiⱪǝ berixkǝ tǝyyar turuwatidu, dǝp ... pǝhirlinip mahtap kǝlmǝktimǝn» — Korint xǝⱨiri Ahaya ɵlkisidǝ idi.

□9:3 «ⱪerindaxlarni ǝwǝtixtiki mǝⱪsitim...» — «ⱪerindaxlar» yǝni Titus ⱨǝm yuⱪirida tilƣa elinƣan ikki ⱪerindax.

□9:6 «oquⱪ ⱪolluⱪ bilǝn teriƣini mol alidu» — yaki «bǝrikǝtlǝp teriƣini bǝrikǝtlinip alidu».

■9:6 Pǝnd. 11:24; Gal. 6:7.

■9:7 Mis. 25:2; 35:5; Ⱪan. 15:7; Rim. 12:8.

□9:8 «kǝngriqiliktǝ turup ⱪolliringlar ⱨǝrhil güzǝl ixⱪa yetidu» — «kǝngriqiliktǝ turup» grek tilida «exip taxⱪinlinip» dǝp ipadilinidu.

□9:9 «U ɵziningkini tarⱪatⱪan, u yoⱪsullarƣa sǝdiⱪǝ bǝrgǝn; uning ⱨǝⱪⱪaniyliⱪi mǝnggügǝ turidu» — «Zǝb.» 112:9.

■9:9 Zǝb. 112:9

□9:10 «Əmdi teriƣuqiƣa teriƣili uruⱪ, yegili nan ata ⱪilƣuqi silǝrning teriydiƣan uruⱪliringlarni tǝminlǝp mol ⱪilidu,...» — «teriydiƣan uruⱪliringlar» ⱨǝrhil kɵqmǝ mǝnidǝ bolup, «ⱨajǝtmǝnlǝrgǝ tehimu mǝrdlikBilǝn hǝyrlik ⱪilix pursǝtliri», «baxⱪilarƣa yahxiliⱪ ⱪilix pursǝtliri» degǝndǝk mǝnilǝrni ɵz iqigǝ alidu. Bularning «mewiliri» bolsa, baxⱪilarni etiⱪadⱪa kǝltürüx, etiⱪadqilarni riƣbǝtlǝndürüx ⱪatarliⱪ ⱨǝrhil esil nǝtijilǝrni kɵrsitidu — 11-12-ayǝtni kɵrüng.

□9:11 «Xuning bilǝn silǝr ⱨǝrⱪandaⱪ ǝⱨwalda ⱪoli oquⱪ boluxⱪa ⱨǝr tǝrǝptǝ beyitilisilǝr, xuningdǝk bu ix biz arⱪiliⱪ Hudaƣa kɵp tǝxǝkkürlǝrni elip baridu» — ianǝ Yerusalemdiki etiⱪadqilarƣa tapxurulƣanda, ular Hudaƣa kɵp tǝxǝkkür bildüridu, ǝlwǝttǝ, xundaⱪla baxⱪa jamaǝtlǝrmu u ixni anglap xundaⱪ ⱪilidu.

□9:12 «bu hǝyrlik hizmǝtni ada ⱪilix» — «ada ⱪilix» muxu yǝrdǝ grek tilida: «(kaⱨinlar) ⱪurbanliⱪ ⱪilƣandǝk ada ⱪilix».

□9:14 «wǝ Hudaning silǝrdǝ taxⱪinlatⱪan ajayib meⱨir-xǝpⱪiti tüpǝylidin, ular silǝr üqün dua-tilawǝt ⱪilƣinida, ular silǝrgǝ tǝlpünüp ⱪattiⱪ seƣinip ǝslǝydu» — «Rim.» 15:26-27din kɵrüniduki, Korinttiki (Ahayadiki) jamaǝtlǝr Pawlusning ɵtünüxlirini ahir ⱪobul ⱪilip qong ianǝ toplap, Yerusalemƣa ǝwǝtkǝnidi.