JONONE PEPÁ YEPOKO TOPA SIRIMU BOKUMA
Jonone Topa Sirimu Pepámanga Ungu Pulu Mare
I pepá yepoko topa sirimu yemonga imbimu pepá tenga naa molemo, nakolo ‘Temane peangamo kinie i pepá yepoko kinie Jonone sike torumu.’ ningu pilimele. Akumunge pulumu i sipe: Ou i boku ambolkonomonga yakondo boku JONO temane peangamonga ungu pulumu gomo 449 kanani. Pe temanemo kinie ya pepá yepoko kinie anju yando ungu mare telu sipe mele i siku mimi siku kanani:
Temanemo...Jono Kumbi Lepamo...Talo Sipemo..Yepoko Sipemo
1:1,14 .....................1:1
1:14,18, 3:16..........4:9
3:19-21...................1:6-7
3:36 ........................5:12
5:24 ........................3:14
5:32,37....................5:9
8:44 ........................3:8
8:47.........................4:6
13:34-35..................2:7..............................5
14:23.......................5:3...............................6
15:11, 16:24 ..........1:4 .............................12
................................4:2-3 ............................7
......................................................................1......................1
......................................................................4 .....................4
Jono Kumbi Lepamo kinie Talo Sipemotolo pepá topa sirimumunge ungu pulumu i sipe:
Ye mare andoko Kirasinge yamboma mane sikulie ningindu: “Kangimu mele keri akumunge kangimuni ulu peanga te paa manda naa temolo. Ulu peanga te telemolo kinie aku ulumu ulu kerila. Akumunge ulu peangama telemolo molo ulu kerime telemolo aku uluma pali keri. Minimu mindi peanga. Pulu Yemo yu minimu akumunge yu peanga. Yesusi yu Pulu Yemo molopalie paa sike mana kangi tenga naa orumu. Yu Pulu Yemo molopili yu ye peanga. Sike mana ye te molkanje ye keri te molka akumunge yu sike mana ye te au naa lerimu.” niringi. “Molo sike mana yambo kangi tenga omba molorumu liemo kangine suku molorumu yambomo lupe, yu lupela. Kangimu kinie minimu kinie yambo telumu molo.” niringi. “Ene i sipe i sipe pilipe konginjili mare tondolo munduku pilíngi liemo molko konjingí aulkena pungí.” niringi. Pe Kirasinge yambo marene kanu unguma pilku likulie ‘Pilipe konginjili aisili konopuna pepili.’ ningu konopuni pilingindu mindili siku molko, kangimene paa ulu kerime mindi teko moloringi. Jonone enendo nimbendo: “Kanu ye kolo toko sumbulu toline molemele yamboma enenga talapena ene kinie paa naa molangi, toko makorangi.” nimbe sike sumbi siku molko, molko konjingí aulkena pungí mele ungu mare altopa mane sirimu.
‘Jono ye andamo molopa Epesasi taono molopalie, Epesasi taono lerimu kolea Esia poropinji koleamanga Kirasinge yambo talapema i pepámo topa sirimu.’ ningu pilimele.
Ya ungu pulumu pora nikimu.
JONO KUMBI LEPAMO
JONOne KUMBI LEPA Pepá Topa Sirimu Bokumu
Jonone I Pepá Topa Sirimumunge Ungu Pulu Mare
Ungu pulu mare inie yakondo nondopa gomo 1239 molemomo paa kanani.
Ungu paa tondolo te 1:5-2:2 molopa, te 3:1-2, te 5:11-12 molemo.
Ungu pulu mare boku ambolkonomonga alsena anjukundu “24. laip”, “31.3. pikinini bilong God”, “32.2. Pikinini Bilong God”, “42.4. wanpela samting nogut” molemo.
Ya ungu pulumu pora nikimu.
1
1 Konde molopa konjili ulu pulumu kinie molemo yemo ene nimbu siemili. Yu ou pulu pulu molorumu yemo; yu olio pilirimulu yemo; yu mongone kanorumulu yemo; yu nemo nemo nimbu kanorumulu yemo; yu kini ambolorumulu yemo; akumu Pulu Yemonga Ungu Yesusindu nikimulu. 2 Konde molopa konjili ulu pulu kanumu* wendo omba mona molorumu, olione yu kanopolie paa sike kanorumulu mele nimbu sikimulu. Molopa mindi puli ulu pulumu Lapa kinie molopalie olio molorumuluna omba mona molorumu kanorumulu mele ene nimbu sikimulu. 3 ‘Ene olio kinie pea tapu topo molamili.’ nimbu olione kanopo pilirimulu mele ene kepe nimbu sikimulu. Tapu topo molemolomonga pulu kanumu i sipe: Olio Lapa kinie yunge Malo Yesusi Kirasi* kinie pea tapu topo molemolo akumu. 4 ‘Ene pea olio konopu kamu siemili.’ nimbu i ungumu nimbu pepána tokomolo.
5 Pulu Yemonga Malone olio nimbe sirimu ungumu ene nimbu sikimulu akumu i sipe: Pulu Yemo pa telimu.* Yu kinie sumbulu toli te paa naa pelemo. Ulu pulu keri te kepe kalaro te kepe yu kinie naa pepa, yu ye pilipe konginjili pepa kake tepa molopa konjili yemo. 6 Olio ‘Pulu Yemo yu kinie kapola tapu topo molemolo.’ nimbulie sumbulu toline andopo molomulu liemo kolo topo, “Telemolo.” nilimolo mele naa telemolo. 7 Nakolo yu pa teline molemo mele olio pa teline andopo molomulu liemo olionga angenupili kinie kapola tapu topo molemolo kinie yunge Malone yunge meme olionga nimbe ondo lenjirimumuni olio ulu pulu keri telemolo konopuna pelemoma pali kulu tonjilimo.*
8 Olione nimulundu: “Ulu pulu kerime naa telemolo, te naa pelemo.” nímulu liemo kolo tolemolo, ungu sikema olio kinie naa pelemo. 9 Nakolo ulu pulu keri telemolo temoloma nimbu para símulu liemo Sumbi Sipe Telemo Pulu Yemone “Tembo.” nimbe panjirimu mele pilipelie tembando olionga ulu pulu keri nimbu para simulúma ‘Manie pupili.’ nimbe siye kolopa, olionga konopuna kalaro mele molemo molombama kanopalie ‘Kelepa kake tepili.’ nimbe kulumiye tonjilimo tonjimbe. 10 Nakolo olione nimulundu: “Olione ulu pulu keri te paa naa telemolo, paa naa terimulu.” nímulu liemo aku ungu nilimolomone “Pulu Yemo yu kolo toli yemo.” nilimolo, yunge ungumu olio kinie naa pelemo.