1 Yu Nam 5.12-15 no ken jeles long meri bilong yu. Nogut yu skulim em long pasin nogut, na em i mekim wankain pasin long yu. 2 Yu no ken givim yu yet long wanpela meri, nogut em i daunim strong bilong yu. 3 Yu no ken bungim meri i laik prenim yu, nogut em i hukim yu. 4 Yu no ken sindaun wantaim meri bilong danis na singsing, nogut yu paul long ol trik bilong em. 5 Yu no ken lukluk strong long yangpela meri, nogut yu pundaun na yu mas baim em.* Lukim Kisim Bek 22.16-17 na Lo 22.28-29. 6 Yu no ken givim yu yet long ol pamukmeri, nogut yu lusim olgeta mani samting bilong yu. 7 Yu no ken lukluk nabaut long ol rot bilong taun, na yu no ken raun nating long ol hap rot i no gat man. 8 Taim yu lukim wanpela smatpela meri, orait yu mas lukluk i go long narapela hap. Na yu no ken lukluk strong long naispela meri bilong narapela man. Tru tumas, planti man i bin paul long ol arapela meri, long wanem, mangal bilong ol i kirap strong olsem paia. 9 Yu no ken sindaun wantaim wanpela maritmeri, na yu no ken pati wantaim em na spak. Nogut yu tingting strong long em, na yu pundaun na yu bagarap olgeta.

10 Yu no ken lusim wanpela olpela pren, long wanem, nupela pren i no inap winim pren bilong bipo. Nupela pren i olsem nupela wain. Tasol sapos wain i stap longpela taim na i kamap gutpela, orait bai yu amamas tru long dringim. 11 Yu no ken mangalim biknem bilong ol manmeri bilong mekim sin, long wanem, yu no ken save wanem kain bagarap bai i painim ol. 12 Yu no ken amamas long ol samting ol manmeri i save amamas long en. Tingim gut, ol i no kamap yet long ples bilong ol man i dai pinis, na bekim nogut bai i painim ol. 13 Yu mas stap longwe long ol manmeri i gat pawa bilong kilim ol arapela manmeri i dai, na bai yu no inap pret long ol i kilim yu. Tasol sapos yu go klostu long ol, lukaut, nogut yu lusim laip long asua bilong yu yet. Tingim dispela. Yu olsem man i save wokabaut namel long ol hul i hait, na yu olsem man i stap long ples klia long taim bilong pait.

14 Yu mas skelim gut tru ol wantok, na kisim gutpela tingting long ol manmeri i gat save. 15 Yu save sindaun toktok wantaim ol manmeri i gat gutpela tingting. Tasol olgeta taim, yu mas stori long lo bilong God Antap Tru. 16 Singautim ol stretpela manmeri tasol long kam sindaun kaikai wantaim yu, na yu mas amamas tasol long i stap aninit long Bikpela na yu mas pret long em.

17 Kamda i save kisim namba long ol samting em i wokim, na lida bilong ol manmeri i save kisim biknem long gutpela toktok em i autim. 18 Ol manmeri long ples, ol i save pret long ol manmeri bilong mauswara, na ol i no save laikim tru ol manmeri i toktok nating nabaut.