1 Ka Yesu yi Winaꞌam puꞌusum yin la n ken sa. Ka o nyaꞌandolib keŋ o saꞌan ye ba bigis o Winaꞌam puꞌusum yir dood la. 2 Ka o yeli ba ye, gosim neꞌenam wusa. Li a sida ka m yeti ya ye, hale kugir yinni ku ti kpelim o tiraan zuginee. Ba na lobi ba wusa bas teŋin.

3 Ka on keŋ zinꞌin Olive zuer zugin la, o nyaꞌandolib maꞌaa kenn o saꞌan na, ka yel o ye, “Yelimi ti saŋa kan ka neꞌenam nwa na naam, ne zanbin line na paꞌali ti fu ken saŋa ne dunia naar saŋa.”

4 Ka o lebisi ba ye, “Da ke ka soꞌ maꞌa yaa. 5 Bozugo nidib bedego na kena n pianꞌad m yuꞌur n yet ye, ‘Mane a Kiristo la,’ ka na panꞌas nidib bedego ka ba yidig. 6 Ka ya na wum tanp tukpeedug yamma, ka lem wum li labaar lallisa. Da ke ka dabiem more yaa. Neꞌeŋa na niŋ, ka lee kaꞌ dunia naar benne. 7 Ka buudi na zab ne buudi, ka naꞌab soꞌolim me na zab ne naꞌab soꞌolim, ka koꞌom titaꞌar na lu hale, ka teens na dam zinꞌis bedego. 8 Ka namisug neꞌeŋa wenne poꞌa naani saꞌa ye o duꞌa ne.

9 “Ba na gbanꞌe ya n tis, ka ba namisi ya, ka buudi wusa na kisigi ya man yuꞌur zug. 10 Ka nidib bedego na bas yelsida suer la lieb tuumbeꞌed dimi n gbiꞌid taaba, ka kis taaba. 11 Ka ziri nodiꞌesidib bedego na due panꞌas nidib bedego ka ba yidig. 12 Ka tuumbeꞌedi peꞌesid la zugoo ka nidib bedego noŋilim na sie. 13 Ka one na modigi paae li ben la na nye faangir. 14 Ka Winaꞌam soꞌolim labakaŋa nwa na mooli gilig dunia, ka buudi wusa na wumi li, ka li ben nyaan paae.

15 “Ka ya yaꞌa nye bun kisa line saꞌamid siꞌel mekama, lin ka Winaꞌam nodiꞌes Daniel da sob li yela la, ka li ziꞌe Winaꞌam zinꞌisuŋin la, (kel ka one karem la baŋ neꞌe gbin,) 16 bane be Juuda teŋin zom keŋ zueya ni. 17 Ka bane be yiiŋ da lem kpenꞌ doodin ye ba zaŋ siꞌela. 18 Ka one be poogin da fendigi leb yin ye o zaŋ o fuugo. 19 Li na toe saŋkan la tis poꞌab bane mor poos ne bane mor bilies. 20 Sosimi Winaꞌam ka ya zoos saŋa da siaꞌal waad saŋa bee Jew dim vuꞌusum daare. 21 Ka namistitaꞌar na kena n toe hale n gaad dunia pinꞌilugin la n ti paae saŋkan la, ka namisug ku len bee zem wuu neꞌeŋa yaꞌasa. 22 Ka Winaꞌam yaꞌa pu deŋim sien dabisa laa, ka ba gima, soꞌ naan ku tiliginee. Amaa nidib ban ka o gaans la zug, o na sie dabisa la.

23 “Ka soꞌ yaꞌa yeli ya ye, ‘Gosimi, Kiristo nwa, bee Kiristo la be kpeꞌe sa,’ da siakiyaa. 24 Ka ziri Kiristonam ne ziri nodiꞌesidib na due tum tuumnyalima ne tuum kpiꞌema line na paꞌal ye ba mor paŋ, hale n ti boodin ye ba naani panꞌasin ban ka Winaꞌam gaans la (li yaꞌa tunꞌe niŋin.) 25 Man yeti ya neꞌeŋa ne ye ya guꞌus ka li nan pu paa na.

26 “Ka ba yaꞌa yeli ya ye, ‘Gosimi, o be moogin,’ da keŋi anii. Bee ba yaꞌa ye ‘O suaꞌ doogin,’ yanam da siaki. 27 Ka Ninsaal Biig la ken la na, na wenne wuu saa naani iank ya nyaꞌaŋ n ti paae ya tuona la. 28 Bunkpiiluŋ yaꞌa be zinꞌisiꞌa, zuund na laꞌas ani.

29 “Ka namis kaŋa yaꞌa kpelim naae, ‘winig na lieb zibisug, ka nwadig ku nie, ka nwadibibis na naam saazug n lut na. Ye ka siꞌelnam bane mor paŋ agol na dam.’

30 “Ka Ninsaal Biig ken la na, zanbin na nie saazug. Ka dunia buudi wusa na kaasidi nweꞌedi ba meŋ. Ka ba na nye Ninsaal Biig la n kenna n be saŋgbana zug ne paŋ ne o naꞌam ka li nyeen pil pil. 31 Ka o na tum o maleknam ka naꞌatan piꞌeb hale ka ba laꞌas ninban ka Winaꞌam gaans la, dunia zinꞌis ben wusa.

32 “Keli ka kekaŋ paꞌali ya siꞌel. Kekaŋ yaꞌa ti bus vanpola n ti nobugi sobig la, ya miꞌ ye seeung liꞌeliya. 33 Ala men ya yaꞌa nye neꞌenam wusa ya na baŋ ye Ninsaal Biig la lebug liꞌelne, hale n paae zaꞌanoorin. 34 Asida ka m yeti ya ye, zumaaŋ kaŋa nwa nidib ku gaade, asee neꞌenam wusa naam. 35 Saazug ne dunia na gaad, ka man pianꞌad la lee ku gaade.

36 “Ka li dabisa ne li saŋa la, soꞌ ku baŋi lii, hale baa maleknam bane be arazana ni bee Biig la meŋa, asee Baꞌ one a Winaꞌam la gullim. 37 Ninsaal Biig la ken na, na wenne Noa saŋa la ne. 38 Kuꞌom da nan pu di dunia la, saŋkan la nidib daa dit ka nuud, ka dit poꞌab ka tisid ba biis sidib hale n ti paae daakan ka Noa kpenꞌ aaruŋ titaꞌarin la. 39 Ka ba pu baŋi li yela hale saa ni ka kuꞌom di ba wusa. Li me na ane ala n tis Ninsaal Biig ken la na. 40 Ka dapa ayi na be poogin ka ba na zaŋ yinni ka bas yinni. 41 Poꞌaba ayiꞌiŋa na be neerin, ka ba zaŋ yinni ka bas yinni.

42 “Guꞌusimi; ka ya ziꞌ ya Zugsob la na leb daasiꞌer naa. 43 Baŋimi ye yidaan la yaꞌa baŋ saŋkan ka naꞌayiig na kena ye o zuu, o na tiꞌebi gur, hale ka naꞌayiig la ku nyaŋe kpenꞌ zuu. 44 Dinzugo yanam me tiꞌebimi; ka Ninsaal Biig la na kena saŋkan ka ya ku baŋi.

45 “Dinzugo anoꞌone lee a tumtum kane a yelsida sob ne yaꞌamdaana, ka o zugsob noke o yir wusa guꞌul o, ka tisi o noor ye o diisim bane be ani la saŋa kane nara. 46 Tumtum kan na paam yelsum o zugsob yaꞌa leb na nye ka o tum ne wuu one yel o siꞌem la. 47 Li ane asida ka m yeti ya ye o zugsob la na ke ka o gur on soꞌe siꞌel wusa. 48 Ka o yaꞌa a tumtum one a bugis, ka tenꞌes o meŋ yela ye, o zugsob ku kul toꞌo naa. 49 Ka o pinꞌili buꞌud o tumtum taaba la, ka dit ka nuud ne danuudib, 50 ka o zugsob na leb na daakan ka o ku baŋi, 51 ka o na namis o, ka ke ka o laꞌas ne zam dim. Anina ka ba na kum ka gaꞌad nyina.