1 Ka ban liꞌel Jerusalem la ba paae Befage, Olive zuerin la. Ka Yesu tumi o nyaꞌandoliba ayi, 2 ka yeli ba ye, “Kemi teŋkpeŋ kane be ya tuon la ka ya na nye, ka ba lo buŋe ziꞌel ne o biig. Idigim o more ba na. 3 Ka soꞌ yaꞌa yeli ya siꞌel, yanam on yelim ye Zugsob la bood o, ka o na tisi ya. Ka ya mor o na.”

4 Neꞌeŋa niŋe ye li paꞌal Winaꞌam nodiꞌes la n da pianꞌ siꞌel la ye li aa ameŋa ye,

6 Ka nyaꞌandolib la keŋ tum on yeli ba siꞌem la. 7 Ka ba mor buŋ ne o biig la na, ka ba noki ba fuud n paꞌal buŋ la zug ka o banꞌ. 8 Ka nidib bedego yadigi ba fuud sueren, ka sieba me nwaꞌe tiis vaandi yadig. 9 Ka nidib bane be o tuon ne bane be o nyaꞌaŋ la wusa yet ne kukotitaꞌar ye, “Hosaana, naꞌab David Yaaŋa. Yelsum be ne one ken na ne Zugsob la yuꞌur zug. Bane be agol na yel ye, Hosaana.”

10 Ka ban n kpenꞌed Jerusalem la, ka li lidig teŋ la dim wusa, ka ba buꞌosid ye, “Anoꞌone nwa?”

11 Ka nidib la lebis ye, “One a Winaꞌam nodiꞌes Yesu la, one yi Nazaret, Galilee soꞌolimin la.”

12 Ka Yesu kpenꞌ Winaꞌam puꞌusum yin, ka nye bane kuosid ne bane daꞌad laꞌad. Ka o kadi ba yiis, ka lidigi bane tiad ligidi la teebulnam lub, laꞌam ne bane kuosid dawana la kogus men. 13 Ka o yeli ba ye, “Li sob Winaꞌam gbauŋin ye, ‘Ba na buoni m yir la ye Winaꞌam puꞌusum yir.’ Ka yanam lebigi li ka li a naꞌayiis suak zinꞌig.”

14 Ka zunzoos ne wabis kenn o saꞌan na ka o tiꞌebi ba. 15 Ka Winaꞌam maalmaan kpeenmnam ne gbauŋmiꞌidib nye tuumnyalimban ka o tum la, ka biis maan vuud puꞌusum yin la, n yet ye, “Hosaana, yelsum be ne naꞌab David Yaaŋ la.” Neꞌ ke ne ka ba sunya pelig.

16 Ka ba yel Yesu ye, “Fu wum ban yet siꞌem laa?”

Ka Yesu lebis ye, “Eenn, m wumiya. Amaa ya pu karem lin yet ye,

17 Ka Yesu yi ani keŋ Betani teŋin gbeenn anina.

18 Ka beug nie ka o lebid Jerusalem ka o koꞌom zabid, 19 ka o nye kekaŋ ka li ziꞌe suer la kukpeŋ. Ka o keŋi ani ka pu nye kekamaa ka li ane vaand gullim. Ka o yel tiig la ye, “Fu ku lem wel yaꞌase.” Ka anina yim ka tiig la kudug.

20 Ka o nyaꞌandolib la nye li la ka li lidig ba, ka ba ye, “Li niŋ wala ka tiig nwa kpelim kudug toꞌoto?”

21 Ka Yesu lebis ye, “Asida ka m yeti ya ye, ya yaꞌa niŋ Winaꞌam yadda ka pu biꞌesida, kaꞌa ye ya tum wen wuu man tum tikaŋa siꞌem la maꞌanee. Amaa ya na tunꞌe yel zuekaŋa ye li vikim keŋ lu moꞌarin la sa, ka li na niŋ ala. 22 Ka ya yaꞌa niŋ yadda ka sos siꞌel Winaꞌam saꞌan, ya na diꞌe.”

23 Ka on kpenꞌ puꞌusum yin n paꞌan la, ka maalmaan kpeenmnam ne kpeenmnam sieba kena buꞌos o ye, “Fu nye suer yaani tum tuum bama? Ka anoꞌon tis uf noore?”

24 Ka Yesu lebisi ba ye, “Mam me na buꞌosi ya siꞌel. Ya yaꞌa lebisi ma, m na yele ya one tis man noor la. 25 Ka buꞌosi ba ye, ‘Joon kuꞌom suub la da yine Winaꞌam saꞌan na bee ninsaalib saꞌan ne?’ ”

Ka nidib la gbanꞌad noor yinni ne taaba ka yet ye, “Ti yaꞌa yel ye, ‘Winaꞌam din,’ o na yele ti ye, ‘ka bo ka ti pu siaki?’ 26 Ka ti yaꞌa ye, ‘dunia din,’ ti giꞌid nidib la, bozugo ba siak ye Joon daa ane Winaꞌam nodiꞌes.”

27 Ka ba lebis Yesu ye, “Ti ziꞌ.”

Ka o me yeli ba ye, “Alaa mam me ku yele ya mam nye noor la soꞌ saꞌan ne.”

28 “Ya tenꞌes ka siiliŋ kaŋa gbin a bo? Dau soꞌ daa be more o biis ayi ka keŋ yinni saꞌan yel o ye, ‘M biiga, kem tum lombonꞌogin la zina.’

29 “Ka biig la lebis o ye, ‘M ku keŋe.’ Ka li niŋ biꞌela ka o tiak o yaꞌam ka keŋ.

30 “Ka o keŋ oŋa la saꞌan ye o me kem tum. Ka o yel o ye, ‘M zugsoba m na keŋ.’ Amaa o pu keŋe.

31 “Ka babayi nwa, anoꞌone tumi o baꞌ boodim la?”

Ka ba lebis ye, “Yiiga sob la.”

Ka Yesu yeli ba ye, “Asida ka m yeti ya ye, lampodiꞌesidib ne poꞌagoonda na deŋi ya tuon kpenꞌ Winaꞌam soꞌolim la ni. 32 Bozugo Joon daa kena ye o paꞌali ya popielim suer. Ka yanam pu niŋ o yadda, amaa lampodiꞌesidib ne poꞌagoonda daa niŋ o yadda. Hale baa yanam nye bama nwa la, ya pu siaki tiake ya sunyaa.

33 “Kelisimi siiliŋ yinni yaꞌas. Yidaan da be ka maali o tiis poog, ka me zaŋguoma n giligi li, ka me poguꞌud doog, ka tu bumbok kane ka ba na nwiaꞌasid wela la kuꞌom, ka bas n tis poguꞌudib ka nwie. 34 Ka li ponꞌob saŋa liꞌel la, o tumi o tumtumnib ye ba diꞌe wela line na aa o din na.

35 “Ka bane diꞌe poog la tum la gbanꞌe o tumtumnib la yinni buꞌ o, ka ku yinni ka lob oŋa la ne kuga. 36 Ka o lem tum sieba ka ba zuꞌe gaad yiiga dim la. Ka ba lem niŋe ba ala yaꞌas. 37 Ka o yuꞌun tumi o meŋ biig ka tenꞌesid ye, ‘Lin a m meŋ biig la. Ba na naꞌas o.’

38 “Ka kpaadib la nye o la ka yel ye, ‘Eheenn, oŋa soꞌe faar la. Keli ka ti kuu o ka ti na soꞌe faar la.’ 39 Ka ba veꞌ o yiis poogin la ka kuu o.”

40 Ka Yesu ye, “Poog la daan yaꞌa kul na, ya baŋ ye o na niŋ poguꞌudib la wala?”

41 Ka ba lebis ye, “O na namis nimbeꞌednam la hale kuu ba, ka tiake ninsieba ka ba diꞌe poog la tum, bane na tis o wela line aa o din, ponꞌob saŋa yaꞌa ti paae.”

42 Ka Yesu buꞌosi ba ye, “Ya pu karem Winaꞌam gbauŋ line yet ye,

43 Ka Yesu yeli ba ye, “M yeti ya ye, Winaꞌam soꞌolim la, m na diꞌe li ya saꞌan ka noke tis buudi bane na wel welsuma.” 44 Ka on mekama lu kugkaŋa zug o na pusig n yaam. Ka kugir la yaꞌa lu soꞌ zug li na medig o.

45 Ka maalmaan kpeenmnam ne Farisee dimi wum siilis la, ka ba baŋ ye o pianꞌadi ban yela. 46 Ka ba boodin ye ba gbanꞌ o ka giꞌig nidib la, bozugo ba siak ye o ane Winaꞌam nodiꞌes.