1 Saŋkan la ka Yesu daa buŋ ki poodin Jew dim vuꞌusum daar, ka o nyaꞌandolib koꞌom zabid ka ba gis ki la nweem onbid. 2 Ka Farisee dimi n nye la ka ba yel Yesu ye, “Gosima, fu nyaꞌandolib la saꞌamidne wada la suer, ban niŋid siꞌem vuꞌusum daar la.”

3 Ka Yesu lebis ye, “Ya pu karem lin ka David da niŋ saŋkan ka on ne bane dol o koꞌom daa zabid laa? 4 O daa kpenꞌ Winaꞌam puꞌusum yin n di bodobodo kan ka ba maal maan tis Winaꞌam la, line pu nar ye ba di, asee bane a Winaꞌam maalmaanib la gullim. 5 Bee ya pu karem Moses wada gbauŋin la ye Winaꞌam maalmaan saꞌam vuꞌusum daar wada la, ba maalmaan tuuma ni, ka taal kaeꞌ? 6 Man yeti ya ne ye soꞌ be kpela n gat Winaꞌam puꞌusum yir la, 7 Ya yaꞌa baŋin sob kaŋa nwa gbin, ye Winaꞌam bood nimbaanlzoor n gaad maana la, ya naan ku yelin ye taal be, bane pu mor taale la zugo. 8 Bozugo Ninsaal Biig la, one a vuꞌusum daar la Zugsob.”

9 Ka Yesu keŋ kpenꞌe ba laꞌas doogin. 10 Ka dau soꞌ be anina ka o nuꞌug kpi. Ka dap be anina n bood ye ba yel ye Yesu tum taal, ka buꞌos o ye, “Li dol wada suer ye soꞌ tiꞌebim nidib vuꞌusum daare?”

11 Ka Yesu lebis ye, “Ya soꞌ yaꞌa more o peꞌog ka li lu bumbokin Winaꞌam vuꞌusum daar, o ku yiisi o? 12 Amaa ninsaal mor nyood bedego gaad peog. Dinzugo li dol wada suer ka soꞌ tum line a suꞌum vuꞌusum daar.”

13 Ka Yesu yel dau la ye, “Tienmi fu nuꞌug la.” Ka o tienn. Ka o nuꞌug la niŋ suꞌuŋa wuu nuꞌug kaŋa la men. 14 Ka Farisee dim la yi yiŋ ye ba gbanꞌe noor yinni ka ku Yesu.

15 Ka Yesu baŋi li ka toom zinꞌig. Ka nidib bedego dol o. Ka o tiꞌebi ba wusa. 16 Ka o yeli ba ye ba da ke ka soꞌ baŋi li yela. 17 Neꞌeŋa niŋ ala ye Winaꞌam nodiꞌes Azaya da pianꞌ siꞌel la niŋ sida ye, Winaꞌam yel ye,

22 Ka nidib mor nid yinni, one a zunzoŋ, ka lem a gik, ka kikiris dol o la, n kenn Yesu saꞌan na. Ka o tis o laafe hale ka one a gik la pianꞌad ka nyet. 23 Ka li lidig nidib bedego la wusa, ka ba buꞌos ye, “Dau nwa kaꞌane naꞌab David yaaŋaa?”

24 Ka Farisee dim wum ala, ka yel ye, “Beelzebul one a kikiris naꞌab la n tis dau kaŋa paŋ ka o kad kikiris.”

25 Ka Yesu baŋ ban tenꞌesid siꞌel la, ka yeli ba ye, “Soꞌolimkan wusa ka weligir be li ni la na saꞌam. Ka teŋkan wusa bee yikan wusa ka weligir be, li ku ziꞌene. 26 Sutaana yaꞌa kad Sutaana, o weligidne o meŋ. Dinzugo o soꞌolim na niŋ wala ziꞌene? 27 Man yaꞌa kad kikiris ne Beelzebul paŋa, anoꞌon paŋ ka yanam biis na kad kikirise? Alazug ban na a ya antuꞌa tuꞌad. 28 Amaa li yaꞌa ane Winaꞌam Siig Suŋ paŋ ka mam kad kikiris la, Winaꞌam soꞌolim kenn ya saꞌan na.

29 “Soꞌ na niŋ wala kpenꞌ paŋ sob yin n vaae o laꞌad, yaꞌa kaꞌ ye o deŋi lo paŋ sob la, ka naan yuꞌun vaae laꞌad la?

30 “One pu be man saꞌanee, o zanꞌasidne man. Ka one pu laꞌased ne manee, o widigidne. 31 Alazugo m yeti ya ne ye, pianꞌabeꞌed wusa ne tuumbeꞌedkan wusa ka nidib niŋ la, ba na nye suguru. Amaa one pianꞌad Winaꞌam Siig Suŋ la beꞌed wusa, o ku nye suguru. 32 Nidkan wusa pianꞌad Ninsaal Biig la pianꞌabeꞌed, on na tunꞌe nye suguru. Amaa nid kane pianꞌad Winaꞌam Siig Suŋ la beꞌed, o ku nye suguru dunia nwa saŋa, bee saŋa kane kenna laa.

33 “Asee ka tiig a suꞌum ka li wela me a suꞌum. Tiig yaꞌa a tibeꞌed li wela me ane welbeꞌednam. Tiig wela bigisid lin a tisiꞌa. 34 Ya ane wiigi biise! Ya na niŋ wala tenꞌesid beꞌed ka pianꞌad sida? Line be ya suunrin la, lin ka ya pianꞌad. 35 Ninsuŋ yiisidne bunsuma ban ka o suaꞌ o suunrin na. 36 M yeti ya ye, hale pianꞌa yaalis wusa ka ya pianꞌ la, ba na buꞌosi ya yaꞌas saria kadib daar. 37 Ya meŋi pianꞌad siꞌel nannanna la na yiisi ya. Ka ya meŋi pianꞌad siꞌel nannanna la me na kpenꞌesi ya yelin.”

38 Ka gbauŋmiꞌidib ne Farisee dim yel Yesu ye, “Paꞌana, ti bood ye fu tum tuumnyalima ka ti gos.”

39 Ka o lebisi ba ye, “Yanam bane a tuumbeꞌed dim ne bane pu niŋe m yadda bood ye ya nye tuumnyalima. Ya ku nye tuumnyalima asee Winaꞌam nodiꞌes Jona tuumnyalima la. 40 Wenne Jona da be ziŋ titaꞌar poogin daba atanꞌ, yuꞌuŋ ne nintaŋ la, ala men ka Ninsaal Biig la na be yaugin daba atanꞌ yuꞌuŋ ne nintaŋ. 41 Nineve dim na ti duꞌe ziꞌen saria kadib daar, ka li a kaset beꞌed zumaaŋ kaŋa dim zug. Bozugo ba daa wum ka Jona moon Winaꞌam labaar la ka ba tiake ba sunya. Amaa soꞌ be kpela gat Jona. 42 Ka poꞌanaꞌab one da yi teŋ lalle la me na duꞌe ziꞌen saria kadib daar, ka li a kaset beꞌed zumaaŋ kaŋa dim zug. Bozugo o daa yine teŋ kane lal na ye o wum naꞌab Solomon yaꞌam pianꞌad. Amaa soꞌ be kpela gat naꞌab Solomon.”

43 Ka Yesu ye, “Kikirig yaꞌa yi nid saꞌan o ken ne pipirigin, n ied zinꞌig ye o be. Ka o yaꞌa pu nye lii, 44 o na yele o meŋ ye, ‘M na leb ne yikan ka m daa yi ka bas la ni.’ Ka o yaꞌa leb ka nye ka siꞌel siꞌel kaeꞌ, ka li piis nyain ziꞌe, 45 o na yi lem mor kikiris ayopoi bane tuumbeꞌed gat o na. Ka ba wusa kpenꞌe be anina. Ka nid la fara yuꞌun na gaad yiiga la. Li na niŋe ala n tis zumaaŋ kaŋa nwa dim.”

46 Yesu n da nam kpelim pianꞌad ne nidib la, ka o ma ne o pitib paae na, ka be kukpeŋi n bood ye ba pianꞌ ne o. 47 Ka nid yinni yel o ye, “Gosima, fu ma ne fu pitib be kukpeŋ bood ye ba nyee uf.”

48 Ka Yesu lebis o ye, “Anoꞌone a m ma? Ka anoꞌonami a m pitiba?” 49 Ka o tiesi o nuꞌugo paꞌani o nyaꞌandolib la ka yel ye, “Gosima, bama nwa a m ma ne m pitib. 50 One tum m Baꞌ one be arazana ni la boodim, one a m pitu ne m taunn ne m ma.”