1 Man Simon Piita one a Yesu Kiristo yamug ne o Tumtum la sobid gbauŋ kaŋa tisid bane ka ti Faangid Yesu Kiristo ne ti Baꞌ Winaꞌam popielim ke ka ya niŋ o yadda, ka li a suꞌum ka wenne tiname niŋ o yadda siꞌem la.

2 Winaꞌam na peꞌesi ya yelsum ne sumalisim bedego, yaname baŋi one a ti Zugsob Yesu la.

3 Winaꞌam paŋ la tisi ti siꞌel mekama line na ke ka ti be nyovur beilim line doli o suer, ka li yi ne tiname baŋ one buoli ti ye ti diꞌe o nyalima beilim ne o popielim la. 4 Ka li yine neꞌenamin ka o tisi ti o noziꞌelug line a suꞌum hale ye ya luak saꞌuŋ line be dunia ni ka yi saalib yaꞌambeꞌed boodimin, ka lee lieb bane a wuu Winaꞌam a siꞌem la.

5 Dinzugo kpeꞌeŋimini ya meŋ ka popielim paꞌasi ya yadda niŋir ni, ka baŋir paꞌasi ya popielimin, 6 ka meŋ gbanꞌar paꞌasi ya baŋirin, ka modigir paꞌasi ya meŋ gbanꞌarin, ka Winaꞌam dollim ameŋa paꞌasi ya modigirin, 7 ka ya Winaꞌam dollim ameŋa paꞌasi ya yelsum maalug ne ya baꞌabitaaba, ka ya yelsum maalug ne ya baꞌabitaaba paꞌas noŋilim. 8 Bozugo ya yaꞌa mor neꞌenam wusa, li na ke ka ya kpiꞌem ne ya Winaꞌam tuuma ka li nobug ka ti baŋ Zugsob Yesu Kiristo yela. 9 Ka one kaꞌa neꞌenama wenne zunzoŋ one ziꞌ yela ka tam ye Winaꞌam pun pie o tuumbeꞌed la yiis nyain.

10 Dinzugo m baꞌabiise, kpeꞌeŋimi ne nimmua ka ke ka Winaꞌam buol ka gaŋi ya la niŋ ameŋa, ka ya yaꞌa niŋ neꞌeŋa ya ku guꞌuŋ baa biꞌelaa. 11 Ka ya na nye suer suŋ hale n na kpenꞌ Yesu Kiristo one a ti Zugsob ne ti Faangid la soꞌolimin, lin ka li saŋa kaꞌ ben la.

12 Linzug ka m bood ye m tienn ya saŋa mekama ne yelbama, hale baa yaname pun deŋim baŋi li ka gbanꞌe kiŋ kiŋ ne yelsida kan ka ya diꞌe la. 13 Ka mam nam voe la, m tenꞌes ye li nar ka m tienn ya n laki ya yaꞌam, 14 mam sadigim baŋ ye li kpelim biꞌela ka m niŋgbiŋ la bodig wuu ti Zugsob Yesu Kiristo paꞌali m siꞌem la. 15 M na ke ka m yaꞌa ti kaeꞌ ka ya na nyaŋe tienn yelbama saŋa mekama.

16 Ti pu dol solima line yi ninsaalib yaꞌaminee, saŋa kan ka ti yeli ya ti Zugsob Yesu Kiristo paŋ ne o ken la naa, amaa ti sid nye o naꞌam zuꞌe siꞌem la. 17 Ka o diꞌe naꞌasi ne zunꞌor line yi ti Baꞌ Winaꞌam ni la, ka kukor yi Winaꞌam paŋ nyaluŋun na yel ye, “Oŋa a m binoŋir, one ka m sunf maꞌed ne o yela hale.” 18 Ka ti laꞌam da be ne o zuer zug, ka wum kukor kaŋa line yi arazana ni la.

19 Ka li maligim ke ka ti baŋ ye Winaꞌam nodiꞌesidib pianꞌad la a sida. Li a suꞌum ka ya guꞌusi ne yelbama; ka li wenne fitla line nie lik zinꞌigin n ti paae beog yiligir ka Kiristo one a nwaddar la yuꞌun nie ya sunya ni. 20 Yelkane a yiiga ane ye ya baŋ neꞌeŋa ye Winaꞌam nodiꞌesidib pianꞌad line sob Winaꞌam gbauŋin la baa yinni pu yi ninsaal potenꞌerin naa. 21 Li me da pu yi ninsaalib saꞌan naa, amaa Winaꞌam Siig Suŋ ke ka ba pianꞌ pianꞌad line yi Winaꞌam saꞌan na.