1 Man Piita one a Yesu Kiristo Tumtum la sobid gbauŋ kaŋa tisid Winaꞌam nidib bane widigi be teens bane buon Pontus ne Galatia ne Kapadosia ne Asia ne Bitinia ni ka a saam la. 2 Ti Baꞌ Winaꞌam deŋim baŋi ya ka gaŋi ya ye o Siig Suŋ maali ya suꞌum nyain ka ya siak Yesu Kiristo noor ka paꞌas nonaar kan ka o maal ne o kuꞌum ziim la.

Winaꞌam na paꞌasi ya yelsum ne sumalisim ka li galis.

3 Keli ka ti puꞌus Winaꞌam one a ti Zugsob Yesu Kiristo Baꞌ la bareka. O nimbaanlzoor line zuꞌe la yela ka ti lem duꞌa duꞌam paal line mor tiꞌir meŋir ka yi Yesu Kiristo kuꞌum vuꞌugirin la, 4 ka nye line ka Winaꞌam ziꞌel tisi ti ka kaꞌ saꞌuŋo ka pu dianꞌada, ka li venlim pu pied la. Ka li be arazana ni n guri yanam 5 bane ka li yi ya yadda niŋirin ka Winaꞌam paŋ guri ya ye ya nye faangir line tiꞌeb ye li nie, naar saŋa la. 6 Neꞌeŋa ni ka ya na mor sumalisim, hale baa nannanna ya yaꞌa namis maksiꞌa ni saŋa biꞌela. 7 Ya yadda niŋir a suꞌum n gat salima ka Winaꞌam maki li wen wuu nidib n nok salima niŋ bugumin ye ba maki li, laꞌam ne lin a bun line mor saꞌuŋ la. Ya yaꞌa nye makir ka modig, li paꞌal ye ya yadda niŋir sid a yadda niŋir, ka ya na nye naꞌasi ne yuꞌur zunꞌor ne pianꞌasuŋ Yesu Kiristo nier saŋa la. 8 Ya pu nye o ka laꞌam noŋ o, ka pu nyet oo ka niŋid o yadda, ka ya sunf malisi toog ne sumalisim line kaꞌ benne. 9 Ka ya yadda niŋir nyood ane ye ya nye faangir.

10 Winaꞌam nodiꞌesidib bane da pianꞌa o yelsum line a piini line da na ti aa ya din la, da tenꞌesid hale ka buꞌosid faankaŋa nwa yela. 11 Yesu Kiristo Siig Suŋ da be ba saꞌan ka paꞌali ba ye o da na ti nye namisug, ka naan nye naꞌasi. Ka ba da tenꞌesid ka buꞌosid ye ba baŋ ye li da na ti a bo saŋa ne li zumaana na ti a siꞌem, ka li na naam. 12 Li da nie paꞌali ba ye ba da pu suŋidi ba meŋa, amaa yanam, ne yelban ka moonmoonib yuꞌun mooli tisi ya la. Winaꞌam Siig Suŋ one ka o tum o arazana ni la na, ke ka ba pianꞌ Winaꞌam labasuŋ n tisi ya. Ka maleknam bood hale ye ba gbanꞌe li gbin.

13 Dinzugo tiꞌebimi ka mor yaꞌam, ka gbanꞌe ya meŋ, ka more tiꞌir suꞌuŋa ne popielim piini line na keenn ya ni Yesu Kiristo nier saŋa la. 14 Ka yaname a bane siakid noyelug la, da ke ka ya yaꞌam kpenꞌe ne yelbeꞌed lin ka ya da bood ne yaꞌam kaꞌalug laa. 15 Amaa ae nyain wuu Winaꞌam one buoli ya la a nyain siꞌem la ne ya tuuma wusa ni. 16 Wuu lin pun deŋim sob siꞌem Winaꞌam gbauŋin la ye, “Mam Winaꞌam a nyain la, ya me ae nyain”. 17 Ka one ka ya buon ye ya Baꞌ la sadigim a one kat saalib saria ne yelmeŋir ba tuuma yela ka baragaŋ kaeꞌ la, dinzugo more zotim saŋkan wusa ka ya a saam dunia nwa ni.

18 Ya miꞌ ye ya da be ne sueryood line ka ya zamis ya yaanam ni la. Ka li da kaꞌane bun line saꞌamid wuu salima bee anzurifa la tisi ya yolisim sueryoodin la, 19 amaa li ane Kiristo kuꞌum ziim suŋ, line nwaasne ziim line yi peꞌedibig one ka gbaꞌar kaeꞌ ka Jew dim noki li maal maan tis Winaꞌam la tisi ya yolisim. 20 Winaꞌam da gaŋ o ka dunia nam pu pinꞌile amaa o yuꞌun nie naar saŋa nwa ya yela. 21 Ka li yine o saꞌan na ka ya mor kpiꞌeuŋ ne Winaꞌam one vuꞌug Yesu kumin ka tis o zunꞌor la ye ya niŋ Winaꞌam yadda ka mor tiꞌir ne o.

22 Yaname sadigim siak la, ka li pie ya poos ye ya noŋi ya baꞌabiis ne popielim la, noŋimi taaba ne nimmua ya sunya ni. 23 Ba duꞌa ya duꞌampaal ka li kaꞌ duꞌam line tisid vum kane mor saꞌuŋo, amaa line be ka voe saŋa wusa, ka li yi ne Winaꞌam pianꞌadin line be ka tisid vum saŋa wusa la. 24 Ka li sob ye,