1 ข้าพเจ้า​หัน​ลูก​แกะ​ตั๋ว​นั้น​เปิด​ก๋า​จ๊ำ​อัน​ตี้​นึ่ง​ออก​มา​จาก​ตึง​หมด​เจ็ด​อัน ข้าพเจ้า​ได้ยิน​เสียง​ของ​สิ่ง​มี​จีวิต​ต๋น​นึ่ง​ใน​สี่​ต๋น​นั้น อู้​เสียง​ดัง​อย่าง​ฟ้าฮ้อง​ว่า “มา​เต๊อะ” 2 ข้าพเจ้า​หัน​ม้า​ขาว​ตั๋ว​นึ่ง​อยู่​ตั๊ดหน้า ผู้​ตี้​ขี่​ม้า​ตั๋ว​นั้น​ก๋ำ​กันธนู กับ​ได้ฮับ​มงกุฎ แล้ว​ก็​ขี่​ม้า​ออก​ไป​อย่าง​ผู้​มี​ชัย เปื้อ​จะ​ไป​เอา​ชัย​แหม​เตื้อ 3 เมื่อ​ลูก​แกะ​เปิด​ก๋า​จ๊ำ​ตี้​สอง​ออก ข้าพเจ้า​ได้ยิน​เสียง​ของ​สิ่ง​มี​จีวิต​แหม​ต๋น​นึ่ง​อู้​ว่า “มา​เต๊อะ” 4 จาก​นั้น ม้า​แหม​ตั๋ว​นึ่ง​สี​แดง​ไฟ​ก็​ออก​มา ผู้​ตี้​ขี่​อยู่​บน​หลัง​ม้า​ได้ฮับ​อำนาจ​ตี้​จะ​เอา​สันติสุข​ไป​จาก​โลก เปื้อ​เยียะ​หื้อ​คน​ฆ่า​กั๋น​เอง ผู้​ขี่​ม้า​ได้ฮับ​ดาบ​ใหญ่​เล่ม​นึ่ง 5 เมื่อ​ลูก​แกะ​เปิด​ก๋า​จ๊ำ​ตี้​สาม​ออก ข้าพเจ้า​ได้ยิน​เสียง​ของ​สิ่ง​มี​จีวิต​ต๋น​ตี้​สาม​อู้​ว่า “มา​เต๊อะ” ข้าพเจ้า​ก็​หัน​ม้า​สี​ดำ กับ​ผู้​ตี้​ขี่​นั้น​ก๋ำ​ต๋าจั้ง​ไว้​ใน​มือ 6 ข้าพเจ้า​ได้​ยิน​เสียง​นึ่ง​เหมือน​กับ​ว่า​มา​จาก​ต้ามก๋าง​ตี้​สิ่ง​มี​จีวิต​ตึง​สี่​ต๋น​อยู่ อู้​ว่า “ข้าว​สาลี​นึ่ง​ลิตร​มี​ก้า​เต้า​กับ​ก้า​แฮง​นึ่ง​วัน ข้าว​บาร์เลย์​สาม​ลิตร​มี​ก้า​เต้า​กับ​ก้า​แฮง​นึ่ง​วัน แต่​ห้าม​เยียะ​หื้อ​น้ำมัน​กับ​เหล้า​องุ่น​เสียหาย”

7 เมื่อ​ลูก​แกะ​เปิด​ก๋า​จ๊ำ​ตี้​สี่​ออก ข้าพเจ้า​ได้ยิน​เสียง​ของ​สิ่ง​มี​จีวิต​ต๋น​ตี้​สี่​อู้​ว่า “มา​เต๊อะ” 8 แล้ว​ข้าพเจ้า​ก็​หัน​ม้า​สี​ซีด​ตั๋ว​นึ่ง​อยู่​ต่อ​หน้า​ข้าพเจ้า ผู้​ตี้​ขี่​ม้า​ตั๋ว​นี้​มี​จื้อ​ว่า ความ​ต๋าย กับ​แดน​คน​ต๋าย​ก็​ตวย​หลัง​มา​ติดๆ ตึง​สอง​ได้ฮับ​อำนาจ​ตี้​จะ​ฆ่า​นึ่ง​ใน​สี่​ของ​คน​ใน​โลก​นี้​ด้วย​คม​ดาบ ความ​อดอยาก โรคระบาด กับ​หมู่​สัตว์​ฮ้าย​ต่างๆ ตี้​อยู่​บน​แผ่นดิน​โลก 9 เมื่อ​ลูก​แกะ​เปิด​ก๋า​จ๊ำ​ตี้​ห้า​ออก ข้าพเจ้า​ก็​หัน​วิญญาณ​หลาย​ดวง​อยู่​ปื๊น​แต้น​ปู่จา เป๋น​หมู่​วิญญาณ​ของ​คน​ตี้​ถูก​ฆ่า ย้อน​ว่า​หมู่​เขา​ได้​เป๋น​พยาน​ตี้​บอก​ถ้อยกำ​ของ​พระเจ้า​อย่าง​ซื่อสัตย์ 10 วิญญาณ​หมู่​นั้น​เอิ้น​ฮ้อง​เสียง​ดัง​ว่า “องค์​พระผู้เป๋นเจ้า​ตี้​บริสุทธิ์​กับ​ซื่อสัตย์​เจ้า​ข้า พระองค์​จะ​หื้อ​เฮา​ถ้า​ไป​แหม​เมิน​เต้าใด ตี้​พระองค์​จะ​ตัดสิน​กับ​ลงโต้ษ​คน​บน​โลก​นี้​ตี้​ได้​ฆ่า​หมู่​เฮา” 11 แล้ว​เขา​หมู่​นั้น​กู้​คน​ก็​ได้​ฮับ​เสื้อ​คุม​สี​ขาว กับ​พระองค์​บอก​หมู่​เขา​หื้อ​ถ้า​ต่อ​ไป​แหม​กำเดียว จ๋น​กว่า​หมู่​ปี้น้อง​ผู้​ฮับใจ๊​พระคริสต์​จะ​ถูก​ฆ่า​อย่าง​กับ​หมู่​เขา​จ๋น​ครบ​จ๋ำนวน​ตี้​ต้องก๋าน 12 เมื่อ​ลูก​แกะ​เปิด​ก๋า​จ๊ำ​ตี้​หก​ออก ข้าพเจ้า​หัน​แผ่นดิน​ไหว​อย่าง​แฮง ตะวัน​ก็​มืด​ดำ​ไป​เหมือน​ผ้า​กระสอบ​สี​ดำๆ เดือน​ก็​ก๋าย​เป๋น​สี​แดง​เหมือน​เลือด 13 ดาว​บน​ต๊องฟ้า​ก็​ตก​ลง​มา​บน​แผ่นดิน​โลก เหมือน​กับ​หน่วย​บ่าเดื่อ​ตี้​ยัง​บ่ตัน​สุก​ถูก​ลมหลวง​ปั๊ด​หล่น​ลง​มา​จาก​เก๊า 14 ต๊องฟ้า​ก็​หาย​ไป​เหมือน​หนังสือ​ม้วน​ตี้​กิ๊ก​เก็บ​ไว้ ดอย​กับ​เกาะ​ตังหลาย​ก็​ย้าย​ไป​จาก​ตี้​เก่า 15 จาก​นั้น​กษัตริย์​ตังหลาย​ใน​โลก​นี้ หมู่​ผู้​ยิ่งใหญ่ หมู่​แม่​ทัพ​ทหาร​ใหญ่ หมู่​คน​ร่ำรวย คน​ตี้​มี​อำนาจ​กับ​กู้​คน​ตี้​เป๋น​ขี้ข้า กับ​คน​ตี้​มี​อิสระ ก็​ปา​กั๋น​ไป​ซ่อน​อยู่​ใน​ถ้ำ​กับ​ใน​ฮ่อม​บ่าหิน​ผา​ต่างๆ บน​ดอย 16 หมู่​เขา​ฮ้อง​ขอ​ดอย​กับ​หิน​ผา​ว่า “ขอ​หื้อ​ตก​ลง​มา​ใส่​หมู่​เฮา​กำ​เต๊อะ​กับ​ซ่อน​หมู่​เฮา​เอา​ไว้ เปื้อ​ว่า​พระองค์​ตี้​นั่ง​อยู่​บน​บัลลังก์​จะ​ได้​ผ่อ​บ่หัน กับ​ลูก​แกะ​ตั๋ว​นั้น​จะ​ลง​โต้ษ​หมู่​เฮา​บ่ได้ 17 ย้อน​ว่า​วัน​ตี้​พระเจ้า​กับ​ลูก​แกะ​ตั๋ว​นั้น​จะ​ลงโต้ษ​กู้​คน​ได้​มา​เถิง​แล้ว ใผ​จะ​รอด​จีวิต​จาก​ก๋าน​ลงโต้ษ​นี้​ได้​กา”