1 Ya̱ Baly naca̱ aposht ni Jesucrisht, gun ndeꞌ coz nu rlagy Ñgyoozh. Ya̱ nu biicy na Timoteo tublaazh la zeed de̱ gyicy ii lo der, 2 lo de ru mbecy ni Ñgyoozh nu yuꞌ Colosas, lo de ru bicy na nu ricy paa nu de coz ni Crisht.

Ñgyoozh Uz den gyicy mi faboor nu nap gyicy num der, nunu gyicy mi nu cheti ri añ ni der.

3 Dub laa tiem ornu rne̱e̱ du̱ de̱ Ñgyoozh, Uz Shuaan den Jesucrisht, nu nac de ru, orzeꞌ dric de̱ gras nim. 4 Gun bi gud lagy de̱ nu fert ricy cup der consuel lo Jesucrisht, nunu dzi rca der dela losaꞌr nu nac mbecy ni Ñgyoozh. 5 Nu nac nu rgyish lo der lo de coz nu bi yuꞌ choow nir gyibaa, ndeꞌ nu dzi rca der losaꞌr. De ru bi bzuub gyidag der de riidz ni de coz nu rgyish lo der lo zeꞌ lat nu güeñ der de riidz nu rishli, de riidz nap nu rnii lac mod gruu mbañ de mbecy. 6 Orzeꞌ de riidz nu bdunii lo der zeꞌ, zaab za lañ dela lugaar ni gyishlombecy, nunu ricy ñi mod nu nap nu de mbecy, laab niꞌ ziꞌl gal nu guc lat de ru nese ornu güeñ der nu rnii de mbecy nu nap ricy Ñgyoozh num den nunu gud lagy der nu rishli gal nu mnii dey. 7 De ndeꞌ coz nu blyuu Epafras ni der, yu nu dzi razañ lagya̱ zeꞌ. Yu zeꞌ yu nu ricy riiñ lat de ru lugaar ne̱ ya̱. Nac yu tub yu nu ricy riiñ ni Jesucrisht lat der, nunu tonaꞌ la ricy paay. 8 Nunu laab yu zeꞌ mniiy lo̱ de̱ nu Espiriit Yon ni Ñgyoozh bicy mi nu tonaꞌ la rca der losaꞌr, nay.

9 Ndeꞌ nu nese dzi nu güeñ de̱ de nu ndeꞌ, orzeꞌ zaab rne̱e̱ du̱ la̱ de̱ Ñgyoozh nu nac der, nunu rdiñ de̱ lom nu nap gyet lag der cuen ni de coz nu rlagy mi, nunu rdiñ de̱ lom nu cuic mi de lo la shcab nap nu druu lo Espiriit Yon nim ni der. 10 Gun benu ni, orzeꞌ gac cyiiñ der gal mod nu rlagy Shuaan den Jesuuz, nunu dub laa tiem gyicy der de coz nu gyet lagy mi. Nunu zañ coz nap gyicy der nu nac mod nu rcyiiñ der. Nunu cugyiꞌ nu nap zir cuꞌ lo der Ñgyoozh. 11 Nunu rdiñ de̱ lom nu gyicy fert mi der nu nac nu dzi lily nam ornu ricy mi de coz ily. Orzeꞌ de ru nu pase̱z fert la ragyee der mas deet rac. 12 Bet lagy der, nunu briic der gras ni Ñgyoozh, Uz den, gun mi zeꞌ bi bzu lily mi de ru nu gyash yaa der ca na coz nu ca lo cuen nu gad ni de mbecy nu nac num lugaar zeꞌ nu yuꞌ yaa nim. 13 Gun Ñgyoozh bi bloo nap mi de ub na lugaar zeꞌ nu cow, zeꞌ nu riib ic nuras. Orzeꞌ ya num de ub na par lugaar zeꞌ nu riib ic Iꞌñ mi nu dzi rcam. 14 Nu nac Iꞌñ mi zeꞌ bloo mbañ mi de ub na, nunu bicy sulagy mi dela cyi den.

15 Ñgyoozh wac zac nam, tees gal nu na Ñgyoozh niꞌ ziꞌl na Crisht, biñ nu gac zac na. Orzeꞌ mi zeꞌ Iꞌñ logam, biñ nu gya zir zu par dela coz nu psaꞌ lagy Ñgyoozh. 16 Par nu nac Iꞌñ mi zeꞌ psaꞌ lagy mi dela coz nu yuꞌ gyibaa, gal nu dela coz nu yuꞌ gyishlombecy ii. Laab nu nac Iꞌñ mi psaꞌ lagy mi de coz nu gac zac na, gal nu de coz nu wac zac na. Gazaꞌ de anc nu riib ic, gal nu de anc fert, par nu nac mi zeꞌ Ñgyoozh psaꞌ lagy mi dela de yu zeꞌ. Orzeꞌ Ñgyoozh psaꞌ lagy mi dela coz nu nac Iꞌñ mi, nunu psaꞌ lagy mi dela coz par Iꞌñ mi. 17 Crisht nil zum nese anzir nu gruu zac dela coz, nunu par nu nac mi zeꞌ, dela coz yuꞌñ gal mod nu rlagy ñi. 18 Dela mbecy ni Crisht na dey gal nu na tub cuerp. Zeꞌ Crisht nac mi too cuerp zeꞌ. Laab mi zeꞌ zum nese nu loga la. Nunu laab mi byabañ mi nu loga la ornu gut mi, gun orzeꞌ gya zir zum par dela coz. 19 Gal nu na Ñgyoozh niꞌ ziꞌl na Jesucrisht, gun ndeꞌ coz nu rlagy mi. 20 Gun par nu nac Crisht, Ñgyoozh rlagy mi zu nap mi dela coz nu psaꞌ lagy mi, de coz nu yuꞌ gyishlombecy ii, gal nu de coz nu yuꞌ gyibaa. Gun orzeꞌ nap yuꞌ num dela coz par nu nac nu pshu reñ Jesuuz ornu pcam lo cruuz.

21 Gulas de ru walab mbecy ni Ñgyoozh nac der, sinu guc der losaꞌ yuum nañ lardoor par nu nac de coz a̱ꞌ nap nu bicy der. 22 Tees na laab Ñgyoozh bicy mi nu nap yuꞌ nu der mi nu nac mod nu bzac Crisht ornu gut cuerp nim. Ni bicy mi, gun orzeꞌ gad mod nu gyechaꞌ der lom. Byac der mbecy nu bi zu chu par nu gac nim. Byac der mbecy cacy, mbecy nu sac falt ni. 23 Tees par nu ni ricy Ñgyoozh num de ru, orzeꞌ rlagy ñi nu gzu fert der nu nac de coz nu bi ricy cup der consuel lo. Orzeꞌ cueꞌ glaa yaa der de coz nu rgyish lo der lo, de coz nu guud ni der ornu güeñ ru de riidz nu sac ni Jesucrisht. De ndeꞌ riidz nu rdunii lo de mbecy dutuub la gyishlombecy. Nunu gaza̱ꞌ ya̱ Baly rlocyuuba̱ nu rshaala̱ de riidz zeꞌ.

24 Na ya̱ yet lagya̱ nu rzac zi̱ nu nac de ru, gun nil bi ca lo cuen nu tonaꞌ la gzac zi de mbecy. Na ya̱ rzac zi̱ nu cuerp la ne̱ gal nu bzac zi Crisht, gun orzeꞌ gaza̱ꞌ locyuuba̱ nu shuub laz ni de nu rzac zi de mbecy ni Crisht. Ya̱ rzac zi̱ nu nac de mbecy ni Crisht, de yu nu bi nac cuerp nim. 25 Orzeꞌ Ñgyoozh bicy mi nu gyicya̱ riiñ ni dela mbecy nim. Bduꞌm riiñ zeꞌ ya̱a̱ nu locyuuba̱ de ru. Zeꞌ riiñ zeꞌ, ndeꞌ nu rshaala̱ dela riidz nim. 26 Ya̱ rshaal nap la̱ de riidz nu rila wangad lagy de mbecy gulas. Tees na Ñgyoozh rbic mi nu gad lagy dela mbecy nim ni de riidz zeꞌ. 27 Orzeꞌ Ñgyoozh rlagy mi cuic mi nu gad lagy de mbecy tub coz ngach nim nu tonaꞌ la coz nap, nunu tonaꞌ la cyit. Coz ngach zeꞌ, ndeꞌ par dela mbecy mas yu nu walab mbecy Israeel. Coz ngach zeꞌ, ndeꞌ Crisht, biñ nu rcyiiñ nañ lardoo de ru. Orzeꞌ nu nac mi zeꞌ segur la gzac der lo de coz cyit na nu gad ni der par lo.

28 De̱ ya̱ rzat de̱ Crisht, nunu rshu̱u̱ du̱ de̱ dela mbecy, nunu rlyu̱u̱ ni dey nu de shcab lily nu ricy cup de̱. Orzeꞌ gu̱ꞌ de̱ de mbecy ni Crisht nu bi gul shcab ni yaa Ñgyoozh. 29 Ndeꞌ nu ricya̱ riiñ, nunu tonaꞌ la rloo lo̱ nu dela fers ne̱. Rac ricya̱ ñii gun Crisht rbic mi fers ne̱.