1 سُلٍمَنِ تٌ فّ عَلَتَلَ شَ هْرْ مْبَنشِ تِدٍ، عَ نَشَ سٍ بِرِن نَسٌ عَ كُي عَ بَبَ دَوُدَ نَشٍيٍ قِشِ عَلَ مَ، فبٍتِ، شّيمَ، عَ نُن سٍ مْولِ بِرِن. عَ نَشَ عٍ سَ نَاقُلِ رَفَتَدٍ عَلَ شَ بَنشِ كُي.

2 نَ تّمُي، سُلٍمَنِ نَشَ عِسِرَيِلَ قٌرِيٍ، بْنسْي شُنيِيٍ، نُن عِسِرَيِلَ دٍنبَيَ شُنيِيٍ، مَشِلِ عَلَكٌ عٍ شَ تٍ عَلَتَلَ شَ سَاتّ كَنكِرَ رَ كٍلِقٍ سِيٌن، دَوُدَ شَ تَا. 3 عِسِرَيِلَكَ بِرِن نَشَ عٍ مَلَن مَنفّ يِرٍ عَلَكٌ عٍ شَ كِكٍ سٌلٌقٍرٍ ندٍ سَلِ رَبَ. 4 عِسِرَيِلَ قٌرِيٍ بِرِن تٌ مّننِ لِ، لٍوِكَيٍ نَشَ سَاتّ كَنكِرَ تٌنفٌ، 5 عٍ عَ شَنِن عَ نُن عَلَ شَ كِرِ بَنشِ نَرَلَندٍ، عَ نُن سٍ سّنِيّنشِ نَشٍيٍ نُ نَ عَ كُي. لٍوِ سّرّشّدُبّيٍ نَن نَ وَلِ رَبَشِ.

6 مَنفّ سُلٍمَنِ نُن عِسِرَيِلَ حَمَ، نَشٍيٍ بِرِن نُ مَشِلِشِ، نَشَ تِ سَاتّ كَنكِرَ يَ رَ. عٍ نَشَ شُرُ سٍ لَنمَيٍ نُن عَ شُنفبٍ فبٍفبٍ بَ سّرّشّ رَ، نَشَن كْنتِ مُ نْمَ كٌلٌندٍ. 7 سّرّشّدُبّيٍ نَشَ عَلَتَلَ شَ سَاتّ كَنكِرَ دْشْ عَ دْشْدٍ، عَلَ شَ هْرْ مْبَنشِ كُي، يِرٍ سّنِيّنشِ قِسَمَنتٍ. عٍ عَ دْشْ مَلٍكّيٍ فَبُتٍنيِيٍ بُن مَ. 8 مَلٍكّيٍ فَبُتٍنيِيٍ نُ عِتَلَشِ سَاتّ كَنكِرَ نُن عَ مَشَنِن سٍيٍ شُن مَ. 9 سَاتّ كَنكِرَ مَشَنِن سٍيٍ قِندِشِ وُرِ كُيٍيٍ نَن نَ، نَشٍيٍ نُ مِنِمَ يِرٍ سّنِيّنشِ قِسَمَنتٍ كُي، كْنْ عٍ مُ نُ نْمَ تٌدٍ هْرْ مْبَنشِ تَندٍ مَ. هَن تٌ سَاتّ كَنكِرَ نَ مّننِ. 10 سٍسٍ مُ نُ نَ نَ سَاتّ كَنكِرَ كُي، قٌ نَ وَلَشّ قِرِنيِ عَننَبِ مُنسَ نَشٍيٍ سَ عَ كُي. عَ نَ رَبَ شٌرٍبٍ فٍيَ يِرٍ، نّ عَلَتَلَ سَاتّ شِرِ لْشْي، عِسِرَيِلَكَيٍ مِنِ تّمُي مِسِرَ.

11 نَ تّمُي سّرّشّدُبّيٍ نَشَ مِنِ يِرٍ سّنِيّنشِ كُي. سّرّشّدُبّ نَشٍيٍ نُ نَ نَ شُندّ كُي، عٍ بِرِن نُ بَرَ سّنِيّن. 12 لٍوِكَ بّيتِبَيٍ، عَسَقِ، هٍمَن يٍدُتُن، عٍ شَ دِيٍ، نُن عٍ نفَشَكٍرٍنيِيٍ، عٍ بِرِن مَشِرِشِ دُفِ قَنيِ فّسّ قُتِ دَاشِ رَ. عٍ نُ نَ سّرّشّبَدٍ سٌفٍتٍدٍ بِرِ، مَشَسٍيٍ نُن كْرَيٍ نُ نَ عٍ يِ رَ. سّرّشّدُبّ مِشِ كّمّ مْشْحّن قَن نُ نَ عٍ سّيتِ مَ، عٍ سَرَيٍ قٍمَ. 13 سَرَ قٍيٍ نُن بّيتِبَيٍ نَشَ كَقُ عٍ بٌورٍ مَ عَلَتَلَ مَتْشْدٍ عٍ شَ سَرَيٍ، مَشَسٍيٍ، نُن كْرَيٍ شُي رَ. عٍ نَشَ عَلَتَلَ تَنتُ يِ مَسٍنيِ رَ، «عَلَ شَ هِننّ فبٌ، عَ شَ قٌنِسِرٍيَ مُ حْنمَ عَبَدَن!» نَ تّمُي، نُشُي نَشَ عَلَتَلَ شَ بَنشِ رَقٍ. 14 سّرّشّدُبّيٍ مُ نْ لُدٍ نَا عٍ شَ وَلِ رَبَدٍ نَ نُشُي شَ قٍ رَ. عَلَتَلَ شَ نْرّ نُ بَرَ عَ شَ بَنشِ رَقٍ.