1 Wo sarae fe n ma geya sɛniyɛnxi Siyoni fari!

Bɔxikae birin xa sɛrɛn gaaxui ra,

barima Alatala xa lɔxɔɛ na fafe, a bara makɔrɛ.

2 Dimi nun kuye ifɔɔrɛ lɔxɔɛ nan a ra.

A luxi nɛ alɔ kunda nun nuxui ifɔɔrɛ naxan dinma geya ra,

alɔ subaxɛ naiyalanyi yensenma ki naxɛ.

Ɲama sɛnbɛma belebele fama nɛ,

naxan maniyɛ mu toxi tɛmui dangixi,

a man mu toma tɛmui naxan sa fama.

3 Tɛ saxi e ya ra, tɛ saxi e xanbi ra.

Bɔxi naxan na e ya ra,

a tofan alɔ sansi yire Ala naxan daaxi Adama bɛ,

kɔnɔ e na dangi, na bɔxi fa findi gbengberenyi magaaxuxi yire ra.

E a birin kana!

4 E luxi alɔ soe galie, sɔɔrie dɔxɔxi naxee fari.

5 E tuganma nɛ alɔ sɔɔri ragisee naxee goroma geyae tagi.

E xui maniya tɛ wundui xui ra naxan sɛxɛ ganma.

E maniya sɔɔri gali sɛnbɛma ra naxan tixi gere ki ma.

6 Mixie na e to, gaaxui luma nɛ e suxu ra, e yatagie birin ifɔɔrɔ.

7 E e gima nɛ alɔ ɲalamae,

e tema taa tɛtɛ ma alɔ korogbae.

Kankan siga a xa kira ra, e mu e bama kira ma feo.

8 E mu dinma e boore ra,

kankan biraxi a xa kira nan fɔxɔ ra.

Hali e gerefae ti e ya ra, e soma nɛ nee ra e xa safɛ mu kana.

9 E dinma nɛ taa ra, e e gima nɛ tɛtɛ fari.

E tema nɛ banxie fari, e so wundɛrie ra alɔ muɲɛtie.

10 Bɔxi sɛrɛnma nɛ e ya ra, koore a imaxa.

Soge nun kike ifɔɔrɔma nɛ, tunbuie mu yanbama sɔnɔn.

11 Alatala a xui raminima nɛ a xa geresoe ya ra.

E wuya, e a xa yaamari suxu sɛnbɛ ra.

Alatala xa lɔxɔɛ xungbe magaaxu.

Nde nɔma na lɔxɔɛ raxande?

12 Alatala xa masenyi nan ya,

«Wo xa wo yɛtɛ ragbilen n ma yakɔsi.

Wo xa na raba wo ɲanige fiixɛ ra,

sunyi ra, wa ra, nun mayandi ra!

13 Wo naxa wo xa dugie ibɔɔ sunnunyi kui,

wo xa wo bɔɲɛ nan masara.

Wo xa wo yɛtɛ ragbilen wo Marigi Alatala ma,

barima a hinnɛma nɛ wo ra, a kinikini wo ma,

a mu xɔnɔma mafuren, a xa mixi xanui gbo,

a gbilenma a xa gbaloe fɔxɔ ra.

14 Nde a kolon xa a mu a xa natɛ masarama,

xa a mu diɲɛma, a fe fanyi raba wo bɛ?

Na tɛmui wo fama nɛ donse nun minse hadiya ra wo Marigi Alatala bɛ.

15 Wo xa sarae fe Siyoni!

Wo xa sunyi suxu, wo sali xungbe raba.

16 Wo xa ɲama malan sɛniyɛnyi kui.

Wo xa forie, dimɛe, nun diyɔrɛe xili.

Xɛmɛ naxan bara ginɛ dɔxɔ, a tan nun a xa ginɛ xa lu na malanyi kui.

17 Sɛrɛxɛdubɛe, wo tan naxee walima Alatala bɛ,

wo xa wo mawa Ala bɛ sɛrɛxɛbade nun hɔrɔmɔbanxi tagi,

a falafe ra, ‹Alatala, i xa i xa ɲama ratanga.

I naxa i kɛ tongomae rayaagi,

e xa findi mayele se ra ɲamanɛe bɛ,

mixi fa a fala, E Marigi Ala na minden?›»

18 Alatala wama a xa ɲama xa lu a yi ra.

A kinikinima e ma.

19 Alatala bara a xa ɲama yaabi,

a bara a masen a xa ɲama bɛ:

«N donse, wɛni, nun ture fima nɛ wo ma han wo wasa.

N mu luma sie xa wo rayaagi sɔnɔn.

20 N wo yaxuie makuyama nɛ wo ra, naxee kelima kɔɔla ma,

n e radin gbengberen yire dɛnnaxɛ kanaxi.

E xa geresoe naxee tima yare,

n nee madulama sogetede baa nan xɔɔra,

naxee tima xanbi,

n nee tan madulama sogegorode baa nan xɔɔra.

E bɔrɔ xiri mini, a din yire birin na.»

Alatala bara kaabanakoe raba!

21 Isirayila bɔxi, hali i mu gaaxu!

I xa ɲɛlɛxin, i xa lu sɛɛwɛ kui,

barima Alatala fe xungbee rabama.

22 Burunyi subee, hali wo mu gaaxu,

barima ɲooge man gbilenma nɛ fiili ma,

sansi bilie man bogima nɛ,

xɔrɛ bilie nun wɛni bilie fan daxamui raminima nɛ.

23 Wo tan Siyoni ɲama, wo xa sɛɛwa,

wo xa ɲɛlɛxin wo Marigi Alatala xili ra,

barima a tunɛ fanyi rafama nɛ wo bɛ,

a tunɛ gbegbe ragoroma nɛ wo bɛ a waxati ma,

alɔ a nu a rabama ki naxɛ a singe.

24 Lonyie rafema nɛ sansi xɔri ra,

fifae rafema nɛ wɛni nɛɛnɛ nun ture ra.

25 N wo xa daxamui ɲɔxɔɛ fima nɛ,

n ma geresoe sɛnbɛmae naxan kana,

n ma geresoe naxee lanxi kulie, katoe, nun katoe maniyɛe ma,

n naxee rasanba wo xili ma.

26 Wo fama nɛ wo dɛgede han wo luga.

Wo n matɔxɔma nɛ, n tan wo Marigi Ala,

naxan bara kaabanakoe raba wo bɛ.

N ma ɲama mu rayarabima sɔnɔn.

27 Na kui wo a kolonma nɛ a n na Isirayila fɔxɔ ra,

a n tan nan na wo Marigi Alatala ra,

a Ala gbɛtɛ mu na.

N ma ɲama mu rayarabima sɔnɔn.