1 परमप्रभु यावेमी अमीत्‍तै आ तौ योना कली मार लोव़ पवा बाक्‍त देंशा हना, २राजा १४:२५ 2 “गे छुल बोक्‍शा, निनवे माइश्‍शो ठेयब सहरम लावो। मिनु मेकेर ङा मुर आन मरिम्‍शो पशो आ पर्बम शेंदीमी। मारदे हना गो मेको आन मरिम्‍शो पशो नेल्‍ल ताता” दे मदा बाक्‍त।

3 तन्‍न योना परमप्रभु यावे आ ङोंइती रे लशा, निनवे मलथु, टारशीश गे प्रोक्‍चा गोवा बाक्‍त। मिनु योप्‍पा सहरम यिशा, टारशीश लाइब डोंगा का थिश्‍शा, क्‍येट थाप्‍शा, परमप्रभु यावे आ ङोंइती रे प्रोक्‍शा, डोंगाम ङोंइसे बाक्‍त। भजन संग्रह १३९:७,९,१० 4 मिनु परमप्रभु यावेमी समुन्‍द्रमी ठेयब फश पपदा बाक्‍त। मोपा ठेयब फश गिवारम पतीके मेको डोंगा जिक्‍‍चा चिक्‍ता बाक्‍त। 5 मिनु डोंगाम गेय पाइबपुकी हिंशा, आन देवी देवता आन नें थि‍शा, ब्रेम्‍मा बाक्‍त। मिनु डोंगा सोपी पचा कली मेको आन बाक्‍शो मारेइ मारेइ समुन्‍द्रमी ताइक्‍तमे बाक्‍त। योना चहिं डोंगा आ आइदी तला लशा, इप्‍शो बाक्‍माक्‍त। 6 मिनु डोंगा चलेबमी योना आ इप्‍तीकेम लशा “गिश ङा इमे। बोक्‍को, इ परमप्रभु कली थोवो। मेको परमप्रभु इं कली खतम दुम्‍चा रे प्रोंइबा, कों” देंमाक्‍त। 7 मिनु डोंगाम गेय पाइबपुकीमी “सुम पतीके ओदेंब श्‍येत दुम्‍माइ, तुइक्‍चा कली चिङगा कोव़चा” देंमुशा, चिङगा कोव़ङमे बाक्‍त। चिङगा कोव़ङमेनु, योना आ नेंम ग्रूमाक्‍त। हितोपदेस १६:३३

8 मिनु डोंगाम गेय पाइबपुकीमी योना कली “गो मारदे ओदेंब श्‍येत ज‍या? इ गेय मार में? गे ते रे पिवे? तेको रागी ङा नवे? मार थर ङा मुर नवे?” दे हिल्‍लो पामे बाक्‍त। 9 मिनु योनामी “गो हिब्रू नङ। रागी नु समुन्‍द्र सेल्‍ब, सरीङ ङा परमप्रभु यावे कली थमा सुइक्‍ब नङ” देंमाक्‍त। उत्‍पत्ती १:९-१० 10 मिनु मेको मुरपुकी ङोंइती क्‍येङा हिंशा योना कली “गे मारदे ओपा प्रोक्‍ङे?” दे हिल्‍लो पामे बाक्‍त। मारदे हना योनामी मेको आन कली “गो परमप्रभु यावे आ ङोंइती रे प्रोक्‍ती” देंशो बाक्‍माक्‍त। 11 मिनु मेकोपुकीमी योना कली “फश गिवार नाइक्‍पाइक्‍चा कली मार पचा माल्‍नीकी?” दे हिल्‍लो पामे बाक्‍त। मारदे हना फश गिवार पतीके ब्‍वाक्‍कु बारना बारन लमाक्‍त। 12 मिनु योनामी “आं कली समुन्‍द्रमी ताइक्‍ताक्‍यीनी हना, फश गिवार नाइक्‍ब। एको फश गिवार आं पतीके पशो बाक्‍ब, दे गो तुइक्‍नुङ” देंमाक्‍त। 13 मिनु मेको मुरपुकीमी लेंशा डोंगा रागीम चाक्‍चा कली शुश खीयेमे बाक्‍त। तन्‍न मचाप्‍मे बाक्‍त। मारदे हना फश गिवार शुश बारशो बाक्‍माक्‍त। 14 मिनु मेकोपुकीमी परमप्रभु यावे कली “परमप्रभु यावे, एको मुर आ पर्बम गोपुकी बेक्‍चा ममाल्‍कल। एको मुर आ दोस मतकल। मारदे हना परमप्रभु यावे, इन दाक्‍शो यो मोदेंशोन बाक्‍त” देंमा बाक्‍त। 15 मिनु योना कली समुन्‍द्रमी ताइक्‍तमे बाक्‍त। मिनु फश गिवार नु ब्‍वाक्‍कु ख्रा दिम्‍शा, नांइसे बाक्‍त। 16 मिनु मेको मुरपुकी परमप्रभु यावे कली मान पा हिंशा, मेको कली चढ़ेशा “आ देंशो नेल्‍ल टीनीकी” दे परमप्रभु यावे कली कसम जामे बाक्‍त। 17 मिनु परमप्रभु यावेमी योना कली दाक्‍पाइक्‍चा कली ठेयब ङांइ का सोइक्‍ता बाक्‍त। मेको ङांइमी योना कली ग्रु दाक्‍गानु, योना सां नाक्‍दो नाक्‍ती आ कोव़जीम बाक्‍माक्‍त। मत्ती १२:४०; मत्ती १६:४