1 गोपुकी ग्‍याइश्‍शा लाइक्‍चा पुंइसीशो २५ बर्स दुम्‍मेनु, ङोंइती ङा महिना ङा १० नाक्‍त बाक्‍त। मेना यरूसलेम सहर फ्रुचा पुंइसीशो १४ बर्स दुम्‍शो बाक्‍त। मेको नाक्‍तीन परमप्रभु यावेमी आं कली थिती। मिनु मेकोम आं कली मेकेर लाइक्‍ती। इजीकीएल १:३ 2 परमप्रभुमी आ कोंइतीकेम आं कली इस्राएल रागी लाइक्‍ती। मिनु आं कली थम ठेयब लाइश्‍शो डांडा काम वोइक्‍ती। मेको आ दक्‍खिन गे सहर का खोदेंशो तांइसीशो बाक्‍त। जकरिया १४:१० 3 मिनु मेकोम आं कली मेकेर लदानु, गो मेकेर मुर का ताता। मेकेर कांसा खोदेंशो टल्‍केशो मुर का बाक्‍त। मेको आ गुइम सुती के डोरी नु पुक्‍तीक कोक्‍के का बाक्‍त। मेको ठेयब लाप्‍चो आ नेक्‍था राप्‍शो बाक्‍त। इजीकीएल ४७:३; जकरिया २:५ प्रकाश २१:१५ 4 मिनु मेकोम आं कली “ए मुर, कोव़ङो। मिनु नोफा दाइश्‍शा नेनो। गो इ कली मार मार कोंइक्‍नुङा, मेको रिम्‍शो पा कोव़शा, इ थुंम वोतो। मारदे हना गे मो पचा कली एक चाक्‍शो बाक्‍ते। मिनु गे मार ताइक्‍नेवे, मेको नेल्‍ल इस्राएल आ खिं ङा मुर आन कली शेंदीमी” देंत।

5 मिनु गो मेकेर परमप्रभु यावे आ खिं आ एर ओंथ नेल्‍ल हिरशो गारो का ताता। मिनु मेको मुर आ गुइम बाक्‍शो पुक्‍तीक कोक्‍के ६ ठेयब कुबीत लाइश्‍शो बाक्‍त। मिनु मेकोम गारो पुक्‍गानु, ३ कुबीत ग्‍येत्‍थ नु ६ कुबीत थांइशो बाक्‍त। ठेयब कुबीत ०.५ मिटर बाक्‍ब।१राजा ६:- 6 मिनु मेको नोले लेंशा पूर्ब गे ङा ठेयब लाप्‍चोम लत। मिनु मेको आ थेंका रे पा ङोइश्‍शा लाप्‍चो ओव़तीक पिंडी पुक्‍तु। मिनु मेको पुक्‍तीक कोक्‍के का लाइश्‍शो बाक्‍त। पुक्‍तीक कोक्‍के ३.२५ मिटर लाइश्‍शो बाक्‍ब। 7 मेकेर बाक्‍तीके कोठा बाक्‍तेक्‍म। मेको नेल्‍ल पुक्‍तीक कोक्‍के का ब्रेम्‍शो नु पुक्‍तीक कोक्‍के का लाइश्‍शो बाक्‍तेक्‍म। मेको कोठा आन दातेम गेय पतीक कोठा बाक्‍तेक्‍म। मिनु आन दाते ङा बाक्‍तीके ५ कुबीत ब्रेम्‍शो बाक्‍त। मिनु परमप्रभु यावे आ खिं ङा पिंडी ङा लाप्‍चो लतीक लां पुक्‍तीक कोक्‍के का ब्रेम्‍शो बाक्‍त। कुबीत का आधा मिटर बाक्‍ब। 8 मिनु मेकोमी ठेयब लाप्‍चो आ आगा ङा पिंडी पुक्‍गानु, मेको पुक्‍तीक कोक्‍के का लाइश्‍शो बाक्‍त। 9 मिनु मेको लतीक लां ङा पिंडी पुक्‍गानु, ८ कुबीत लाइश्‍शो बाक्‍त। मेको आ थाम कुबीत निक्‍शी थांइशो बाक्‍तेक्‍म। मेको लाप्‍चो आ पिंडी चहिं परमप्रभु यावे आ खिं गे बाक्‍त। 10 मिनु पूर्ब ङा लाप्‍‍चो आ एर गे नु ओंथ गे सां सां गेय पतीक कोठा बाक्‍तेक्‍म। मेको सांफान उइक्‍थ उइक्‍थ बाक्‍तेक्‍म। मेको एर नु ओंथ बाक्‍शो थाम उइक्‍थ उइक्‍थ बाक्‍तेक्‍म। 11 मिनु नोले मेकोमी लाप्‍चो ओव़तीक आ ब्रेम्‍शो पुक्‍तु। मेको १० कुबीत ब्रेम्‍शो बाक्‍त। मेको लाप्‍चो नेल्‍ल १३ कुबीत लाइश्‍शो बाक्‍त। 12 गेय पतीक कोठा आन ङोंइती आ दी गे कुबीत का ङा आइक्‍च गारो बाक्‍तेक्‍म। कोठा नेल्‍ल ६ कुबीत लाइश्‍शो नु ६ कुबीत ब्रेम्‍शो बाक्‍तेक्‍म। 13 मिनु नोले मेकोमी गेय पतीक कोठा का ङा लाप्‍चो रे अर्को गेय पतीक कोठा सम्‍म पुक्‍गानु, गारो का रे अर्को गारो सम्‍म २५ कुबीत बाक्‍त। 14 मिनु साप्‍शो लतीक लां २० कुबीत ब्रेम्‍शो बाक्‍त। थाम आ नेक्‍था रे लाङगा लतीक लां यो बाक्‍त। 15 मिनु ओव़तीक लाप्‍चो ङा खिं नेल्‍ल लाप्‍चो रे लाङगा लतीक लां ङा पिंडी सम्‍म ५० कुबीत लाइश्‍शो बाक्‍त। 16 गेय पतीक कोठा थाम आ नेक्‍था ङा झेल ङा गारो आ आइक्‍थ मेरे थरपु हिर‍शो बाक्‍तेक्‍म। एर ओंथ हिरशो साप्‍शो लतीक लां नेल्‍ल झेल बाक्‍तेक्‍म। मिनु पिंडीम यो मोदेंशो झेल बाक्‍तेक्‍म। मेको थामपुकीम खजूर रवा आ बुटा आप्‍शो बाक्‍तेक्‍म।

17 मिनु मेकोमी आं कली परमप्रभु यावे आ खिं ङा लाङगा गे ङा अर्को लाङगाम चाक्‍ती। मेकेर कोठा बाक्‍तेक्‍म। लाङगा आ एर ओंथ फुल्‍लु ब्रशो बाक्‍तेक्‍म। मिनु मेको फुल्‍लु ब्रशो खपीम ३० ओटा कोठा बाक्‍तेक्‍म। 18 मेको फुल्‍लु ब्रशो लां ओव़तीक लाप्‍चो आ नेक्‍था बाक्‍त। मिनु मेको लाप्‍चो सम्‍म बाक्‍त। मेको उइ ङा फुल्‍लु ब्रशो लां बाक्‍त। 19 मिनु मेकोम आइदी ङा लाप्‍चो आ आगा गे लाङगा ङा ब्रेम्‍शो पुक्‍गानु, मेको सहे का कुबीत बाक्‍त।

20 मिनु मेकोम उत्तर गे ङा परमप्रभु यावे आ खिं ङा लाङगा गे ङा लाङगा आ लाइश्‍शो नु आ ब्रेम्‍शो पुक्‍तु। 21 मिनु मेकेर अर्को ठेयब लाप्‍चो खोदेंशो एर ओंथ कोठा सां सां बाक्‍तेक्‍म। मेको आ थाम नु आ पिंडी ङोंइती ङा लाप्‍चो खोदेंशो बाक्‍तेक्‍म। मेको आ लाइश्‍शो ५० कुबीत नु आ ब्रेम्‍शो २५ कुबीत बाक्‍त। कुबीत का ०.५ मिटर बाक्‍ब। 22 मेको आ झेल, आ पिंडी नु मेको खजूर रवा आ बुटा आप्‍शो थाम नु पूर्ब गे कोव़शो लाप्‍चो नेल्‍ल अर्को खोदेंशो बाक्‍तेक्‍म। मेकेर लचा कली ७ ओटा थेंका बाक्‍तेक्‍म। मिनु मेको पिंडी आगाम बाक्‍त। 23 पूर्ब ङा ठेयब लाप्‍चो आ ङोंइती गे परमप्रभु यावे आ खिं ङा लाङगाम लाप्‍चो का बाक्‍त। उत्तर ङा ठेयब लाप्‍चो आ ङोंइती गे यो परमप्रभु यावे आ खिं ङा लाङगाम लाप्‍चो का बाक्‍त। मेको लाप्‍चो रे अर्को लाप्‍चो सम्‍म पुक्‍गानु, सहे का कुबीत लाइश्‍शो बाक्‍त। कुबीत का ०.५ मिटर बाक्‍ब।

24 मिनु मेकोम आं कली दक्‍खिन गे लाइक्‍ती। मिनु मेकेर ठेयब लाप्‍चो का बाक्‍त। मिनु मेकोम आ थामपुकी नु आ पिंडी पुक्‍तु। मिनु मेकोपुकी यो अर्को ठेयब लाप्‍चो खोदेंशो पा उइक्‍थ उइक्‍थ बाक्‍तेक्‍म। 25 मिनु मेकेर एर ओंथ नेल्‍ल नु पिंडीम झेल बाक्‍तेक्‍म। मेको अर्को ठेयब लाप्‍चो खोदेंशो बाक्‍तेक्‍म। मेकोपुकी ५० कुबीत लाइश्‍शो नु २५ कुबीत ब्रेम्‍शो बाक्‍तेक्‍म। 26 मेकेर लतीक ७ ओटा थेंका बाक्‍तेक्‍म। मेको आ पिंडी आगा गे बाक्‍त। निम्‍फा पटटी थाम बाक्‍तेक्‍म। मिनु थाम खजूर रवा आ बुटा आप्‍शो बाक्‍तेक्‍म। 27 मेको आ आगा ङा लाङगाम यो दक्‍खिन गे लाप्‍चो का बाक्‍त। मेकोम मेको लाप्‍चो रे ठेयब लाप्‍चो सम्‍म पुक्‍गानु, मेको सहे का कुबीत बाक्‍त।

28 मिनु मेकोम आं कली दक्‍खिन गे ङा ठेयब लाप्‍चो रे पा आगा ङा लाङगाम चाक्‍ती। मिनु मेकोम दक्‍खिन ङा लाप्‍चो पुक्‍तु। मिनु मेको ठेयब लाप्‍चो यो अर्को ठेयब लाप्‍चो खोदेंशोन बाक्‍त। 29 मेको आ कोठा, आ थाम नु आ पिंडी अर्को खोदेंशो बाक्‍तेक्‍म। मेको आ पिंडी आ एर ओंथ नेल्‍ल झेल बाक्‍तेक्‍म। मेको ५० कुबीत लाइश्‍शो नु २५ कुबीत ब्रेम्‍शो बाक्‍त। 30 मेकेर एर ओंथ नेल्‍ल पिंडी बाक्‍तेक्‍म। मेको २५ कुबीत लाइश्‍शो नु २५ कुबीत ब्रेम्‍शो बाक्‍तेक्‍म। कुबीत का ०.५ मिटर बाक्‍ब। 31 मेको आ पिंडी लाङगा गे कोव़शो बाक्‍त। मिनु मेको आ थामपुकीम खजूर रवा आ बुटा आप्‍शो बाक्‍तेक्‍म। मिनु मेकेर लचा कली ८ ओटा थेंका बाक्‍तेक्‍म।

32 मिनु मेकोम आं कली पूर्ब गे ङा आगा ङा लाङगाम चाक्‍ती। मिनु मेको आ ओव़तीक लाप्‍चो पुक्‍तु। मिनु मेको अर्को ठेयब लाप्‍चो खोदेंशो बाक्‍त। 33 मेको आ कोठा, आ थाम नु आ पिंडी अर्को खोदेंशो बाक्‍तेक्‍म। मेको आ पिंडी आ एर ओंथ नेल्‍ल झेल बाक्‍तेक्‍म। मेको ५० कुबीत लाइश्‍शो नु २५ कुबीत ब्रेम्‍शो बाक्‍त। 34 मेको आ पिंडी लाङगा गे कोव़शो बाक्‍त। मिनु मेको आ थामपुकीम खजूर रवा आ बुटा आप्‍शो बाक्‍तेक्‍म। मिनु मेकेर लचा कली ८ ओटा थेंका बाक्‍तेक्‍म।

35 मिनु मेकोम आं कली उत्तर गे ङा ठेयब लाप्‍चो रे पा आगा ङा लाङगाम चाक्‍ती। मिनु मेको ठेयब लाप्‍चो यो अर्को ठेयब लाप्‍चो खोदेंशोन बाक्‍त। 36 मेको आ कोठा, आ थाम नु आ पिंडी अरु खोदेंशो बाक्‍तेक्‍म। मेको आ पिंडी आ एर ओंथ नेल्‍ल झेल बाक्‍तेक्‍म। मेको ५० कुबीत लाइश्‍शो नु २५ कुबीत ब्रेम्‍शो बाक्‍त। 37 मेको आ पिंडी लाङगा गे कोव़शो बाक्‍त। मिनु मेको आ थामपुकीम खजूर रवा आ बुटा आप्‍शो बाक्‍तेक्‍म। मिनु मेकेर लचा कली ८ ओटा थेंका बाक्‍तेक्‍म।

38 पिंडी आ नेक्‍था लाप्‍चो पाइश्‍शो कोठा का बाक्‍त। मेकेर चोशा चढ़ेतीक ब्‍वाक्‍कुम मुरबाक्‍तेक्‍म। 39 आगा ओव़तीक लाप्‍चो आ पिंडीम का पटटी गे टेबल निक्‍शी बाक्‍ताक्‍स। अर्को पटटी गे यो टेबल निक्‍शी बाक्‍ताक्‍स। मेकेर चोशा चढ़ेतीके, पाप आ पर्बम चढ़ेतीके नु दोस आ पर्बम चढ़ेतीके क्‍योर‍चा माल्‍‍बाक्‍तेक्‍म। 40 पूर्ब ङा ओव़तीक लां ङा पिंडी आ ङोंइती टेबल निक्‍शी बाक्‍ताक्‍स। मिनु अर्को पटटी ङा पिंडी आ ङोंइती यो टेबल निक्‍शी बाक्‍ताक्‍स। 41 मोपा आगा ओव़तीक का पटटी ४ ओटा टेबल नु अर्को पटटी ४ ओटा टेबल बाक्‍तेक्‍म। मिनु नेल्‍ल पा ८ ओटा टेबल बाक्‍तेक्‍म। मेको टेबल तार चढ़ेतीक क्‍योरचा माल्‍तेक्‍म। 42 मेकेर यो चोशा चढ़ेतीक कली चेश्‍शो फुल्‍लु के ४ ओटा टेबल बाक्‍तेक्‍म। मेको कुबीत का नु आधा लाइश्‍शो नु कुबीत का नु आधा ब्रेम्‍शो बाक्‍तेक्‍म। मेको कुबीत का ग्‍येत्‍थ लाइश्‍शो बाक्‍तेक्‍म। मेको आन तारी चोशा चढ़ेतीक नु अरु चढ़ेतीक क्‍योरचा कली मार मार माल्‍मा, मेको नेल्‍ल बाक्‍त। कुबीत का आधा मिटर खोदेंशो बाक्‍ब। 43 मिनु श्‍ये क्‍युक्‍तीक अङगुल का ब्रेम्‍शो ओव़तीक आ एर ओंथ क्‍युक्‍शो बाक्‍तेक्‍म। मेकेर चढ़ेतीक श्‍ये वोइक्‍चा कली टेबल बाक्‍तेक्‍म।

44 मिनु आगा ङा ठेयब लाप्‍चो आ लाङगा गे कोठा निक्‍शी बाक्‍ताक्‍स। कोठा का उत्तर गे ङा ठेयब लाप्‍चो आ लाङगाम बाक्‍त। मेको दक्‍खिन गे कोव़शो बाक्‍त। अर्को कोठा दक्‍खिन ङा ठेयब लाप्‍चो आ लाङगा गे बाक्‍त। मेको उत्तर गे कोव़शो बाक्‍त। 45 मिनु मेकोम आं कली “एको दक्‍खिन गे कोव़शो कोठा चढ़ेब आन कली बाक्‍ब। मेको परमप्रभु यावे आ खिंम गेय पाइब आन के बाक्‍ब। 46 मिनु मेको उत्तर गे कोव़शो कोठा चहिं मेको चढ़ेतीकेम गेय पाइब आन कली बाक्‍ब। मेकेर सादोक आ चच युइ बाक्‍नीम। मेको लेवी आन दाते ङा मेकोपुकी ला परमप्रभु यावे आ ङोंइती जाक्‍ने चाप्‍नीम” देंत। इजीकीएल ४३:१९; इजीकीएल ४४:१५; इजीकीएल ४८:११; १राजा १:८,३९; १इतिहास ५:३४-४१ 47 मिनु मेकोम मेको लाङगा पुक्‍तु। मेको सहे का कुबीत लाइश्‍शो नु सहे का कुबीत ब्रेम्‍शो बाक्‍त। मेको ४ पाटे बाक्‍त। मिनु मेको चढ़ेतीक परमप्रभु यावे आ खिं आ ङोंइती बाक्‍त। इजीकीएल ४३:१३

48 मिनु मेकोम आं कली परमप्रभु यावे आ खिं ङा पिंडीम चाक्‍ती। मिनु मेकोम पिंडी ङा थामपुकी पुक्‍तु। मेको निम्‍फा गे ५ कुबीत ब्रेम्‍शो बाक्‍तेक्‍म। आगा ओव़तीक ठेयब लाप्‍चो ३ कुबीत ब्रेम्‍शो बाक्‍त। मिनु मेको आ आगा ङा गारो ३ कुबीत ब्रेम्‍शो बाक्‍ताक्‍स। 49 मेको पिंडी २० कुबीत लाइश्‍शो नु १२ कुबीत ब्रेम्‍शो बाक्‍त। मेकेर लचा कली १० ओटा थेंका बाक्‍तेक्‍म। मिनु निम्‍फा गे थाम का का बाक्‍त। १राजा ७:२१