1 परमप्रभु यावेमी आं कली लोव़ पाप्‍तु। 2 मार लोव़ पाप्‍तु देंशा हना “ए मुर, अम्‍मोनी गे कोव़शा, मेको आन पर्बम आं लोव़ पावो। 3 अम्‍मोनी आन कली ‘परमप्रभु यावे आ लोव़ नेनीन। परमप्रभु, परमप्रभु यावेमी इन कली मार देंब देंशा हना, आं बाक्‍तीक ग्रांग्रा दिशो सेल्‍मेनु, इस्राएल रागी मुर मबाक्‍तीके सेल्‍मेनु नु यहूदा आ खिं ङा मुर ग्‍याइश्‍शा लाइक्‍चा पुंइसमानु, गेपुकी ग्‍येरसाक्‍नी। इजीकीएल ३६:२; बिलाप २:१६ 4 मोपतीके गो इन कली पूर्ब ङा मुर आन कली गेनन्‍नी। मिनु मेकोपुकीम इन दातेम आन लडाइ पाइब आन बाक्‍तीक सेल्‍नीम। मिनु इन दातेमीन आन ताम्‍बु कीनीम। मेकोपुकीम इन फल फुल जाइनीम। मिनु इन दूध तूनीम। 5 गो रब्‍बाह सहर कली दल‍ओंठ जोतीक नु अम्‍मोन कली क्‍यारश भेडा आन गोठ सेल्‍नुङ। मेना गेपुकीम गोन परमप्रभु यावे नङ, दे तुइक्‍नीनी’ ” देंत। 6 मारदे हना परमप्रभु यावेमी “गेपुकी इस्राएल रागी आ पर्बम इन गुइ फ्रोक्‍शा, खोइल थाइश्‍शो बाक्‍तीनी। मिनु इन थुंम ईख कुरशो नेल्‍ल ग्रुंइशा ग्‍येरसाक्‍नी। 7 मोपतीके गो आं गुइ गे इन पर्बम क्‍युक्‍नुङ। मिनु गो इन कली रागी रागी ङा मुर आन गुइम गेनुङ। मिनु गो जात जात ङा मुर आन दाते रे इन नें क्‍याम्‍नुङ। मिनु गो इन कली रागी नेल्‍ल रे क्‍‍याम्‍नुङ। गो इन कली खतम पोक्‍नन्‍नी। मेना गेपुकीम गोन परमप्रभु यावे नङ, दे तुइक्‍नीनी” देंत।

8 मिनु परमप्रभु, परमप्रभु यावेमी “मारदे हना मोआब रागीम ‘यहूदा आ खिं दा अर्को जात ङा मुर आन खिं खोदेंशो दुम्‍शो बाक्‍ब। यसैया १५:-; १६:-; येरमीया ४८:- 9 मोपतीके गो मोआब रागी ङा सांद ङा सहर रे गोशा बेथ-येशीमोथ, बाल-मेओन नु किरयथ-थाइम रागी रोक्‍सीशो सेल्‍नुङ। 10 गो मोआबी, अम्‍मोनी नु पूर्ब ङा मुर आन गुइम गेनुङमी। मिनु रागी रागी ङा मुर आन दातेम अम्‍मोन कली सुइम ममिम्‍नीम। 11 मिनु गो मोआब कली निसाफ पा सजाइ गेनुङ। मेना मेकोपुकीम गोन परमप्रभु यावे नङ, दे तुइक्‍नीम’ देंशो बाक्‍ब” देंत।

12 परमप्रभु, परमप्रभु यावेमी “एदोम रागीम यहूदा आ खिं ङा मुर आन कली क्‍येक्‍क लेत्‍ताक्‍व। मोपतीके मेको थाम्‍पा दोस ताइब दुम्‍त। इजीकीएल ३५:-; येरमीया ४९:७-२२; आमोस १:११-१२; ओबदिया १:-; भजन संग्रह १३७:७ 13 गो आं गुइ एदोम आ पर्बम क्‍युक्‍नुङ। मिनु मेकेर ङा मुर नु बी ब्‍यफ, क्‍यारश भेडा नेल्‍ल आन कली साइक्‍नुङमी। मिनु गो मेको कली मुर मबाक्‍तीके सेल्‍नुङ। मिनु तेमान रे देदान सम्‍म ङा मुर नेल्‍ल तरवारम साइक्‍चा पुंइसीनीम। 14 गो आं मुर इस्राएल रे पा एदोम कली क्‍येक्‍क लेत्‍नुङ। मिनु मेकोपुकीम आं गाइश्‍शो नु आं चुरशो खोदेंशो पा एदोम कली पाइक्‍नीम। मिनु मेकोपुकीम आं गाइश्‍शो नु चुरशो खोदेंशो पा क्‍येक्‍क लेत्‍नीम। मिनु मेकोपुकीमी परमप्रभु, परमप्रभु यावेमी क्येक्‍क लेश्‍शो बाक्‍ब, दे तुइक्‍नीम” देंत।

15 परमप्रभु, परमप्रभु, यावेमी “मारदे हना पलिस्‍तीपुकीम गेना हना यो जोरी सत्रु दुम्‍शा, क्‍येक्‍क लेत्‍ताक्‍म। आन थुंम ईख कुरशा, क्‍येक्‍क लेश्‍शा खतम सेल्‍‍तेक्‍म। यसैया १४:२९-३२; येरमीया ४७:-; आमोस १:६-८; सेफन्‍याह २:४-५ 16 मोपतीके गो पलिस्‍ती आन पर्बम आं गुइ क्‍युक्‍नुङ। मिनु गो केरेथी आन कली साइक्‍नुङमी। मिनु समुन्‍द्र आ नेक्‍था ङा बाक्‍तीक नेल्‍ल खतम सेल्‍नुङ। 17 गो मेको आन कली आं चुर‍शोम ठेयब सजाइ गेशा थाम्‍पा क्‍येक्‍क लेत्‍नुङमी। मिनु गो मेको आन कली क्‍येक्‍क लेत्‍तुनु, मेकोपुकीम गोन परमप्रभु यावे नङ, दे तुइक्‍नीम, देंशो बाक्‍ब” देंत।