1 Nə dàn wuuu nə ga, nə kʋ́ʋ̀ wàrɩ̀ nə dànɩ̀. Nə nɩ də nə mɛ, sə nə ya Atɛnə wa yəbə cɩcɩ. 2 Kʋ mʋ̀ nə pɩn, nə ma tʋn Timote á con. Ʋ yɩ nə nubiu Kərisə yɩrɩ, ʋ nə tʋŋa ʋ pɩn Yɩɩ nə. Ʋ də swɩ̀n Zwezi-Kərisə sʋywáŋʋ́ tə ʋ bɩrɩ. Nə tʋn wá á con, sə ʋ bà ʋ kwè aba ʋ pa á zɩgɩ dɩ̀àn, sə á kə á waa Zwezi nə wuuu. 3 Nə pɩ̀à, sə á lìù mama dàn ká dʋgʋ Yɩɩ cwəŋə tə, càn zənzən tə yɩrɩ, nə nə wulə tə wa. Á tətə yə̀ə́ də, kʋ yoo təntə mɛ, sə kʋ tʋn nə mʋ̀ lɩ̀à tə yɩra, Yɩɩ nə kúrí. 4 Máŋá tə wa, nə nə yɩn á con, nə yà dí yáá nə swɩ̀n á con də, ba wá kə càn zənzən nə nə. Á də yə̀ə́ də, kʋ mʋ̀ máŋá təntə dàń nə yí. 5 À dàń nə kʋ́ʋ̀ wàrɩ̀ à pɩ́nɩ́, à dànɩ̀ á yoo wa. Kʋ mʋ̀ nə pɩn, à ma tʋn Timote á con. À tʋn wá, sə ʋ bà, ʋ na nətʋ tə, á tə nə keni á waa Zwezi nə wuuu. Fən yà jə nə də, *Sɩtana nə wá bà ʋ də́də́n aba, sə ʋ yigu aba ʋ pa á tʋn yokʋkwɩʋn. Də kʋ nə jigə nətʋ, ʋ wá pa nə tʋtʋŋɩ tə mama jì tʋtʋ.

6 Sɩ́ʋ́n nə, Timote pìí ʋ nan á con, ʋ bà nə con. Ʋ swɩ̀n ʋ bɩrɩ nəba də, yìə̀n tə mama ziən á con. Ʋ swɩ̀n də, á keni á waa Zwezi nə wuuu. Ʋ bɩrɩ nəba, nətʋ á nə sonu də, nətʋ tə á nə tə lìí nə yoo zəni zəni máŋá mama. Ʋ bɩrɩ nəba, nətʋ tə, á nə pɩ̀à, sə á pìí á na nəba, ndə nə də nə pɩ̀à, sə nə na aba nətʋ. 7 Nə nubɩa-ba, kʋ mʋ̀ dàń nə pɩn, nə wʋwalʋ tə mama wa, də nə càn zənzən tə mama wa, nə bɩcanɩ zùrì, də á nə ken á waa Zwezi nə. 8 Á zɩga dɩ̀àn *Yuu-Tiu nyiən tə wa. Kʋ mʋ̀ nə pɩn sɩ́ʋ́n nə, nə mɩɩ kʋ́ʋ̀ pìí kʋ siŋə cɩ́gá cɩ́gá. 9 Bɛ̀eɛ̀e won nə, nə wá tʋn, nə ma kə Yɩɩ lɛ̀eɛ̀e á yɩrɩ? Nə wàrɩ̀ nə nyɩna Yɩɩ lɛ̀eɛ̀e nə kəni nə zwɛ̀e, pupwən tə yɩrɩ, nə nə jə á yuu wa Yɩɩ yáá con. 10 Tɩtɩn də yɩcaʋ mama, nə yàá lòrì Yɩɩ cɩ́gá cɩ́gá, sə ʋ pa nəba cwəŋə, sə nə pìí nə na aba nə yɩ́á wa. Nə pɩ̀à nə súrí won tə, kʋ tə nə mùrì aba, á nə keni á waa Zwezi nə, yoo wa.

11 Nə nyɩna Yɩɩ tətə, də nə Yuu-Tiu nə wá kwɛn cwəŋə, sə nə wànɩ́ nə bà nə na aba. 12 Yuu-Tiu wá pa á sonu tə, á nə swə duən tə súrí wuuu. Yá, sə kʋ sonu tə wànɩ́ kʋ yí lɩ̀à tə duən tə mama, ndə nə sonu tə yiri tə nə, nə nə swə aba. 13 Yuu-Tiu nə wá pa á zɩgɩ dɩ̀àn. Ʋ wá pa, á ya ʋ lɩ̀à tə ʋ nə tɩ, cʋna dàn ká ya á yuu wa, lìù nə wá cəgə aba kʋ yɩrɩ, ba nə wá caga á nii nə tə yɩrɩ, nə nyɩna Yɩɩ yáá con kʋ máŋá tə wa, nə Yuu-Tiu Zwezi nə wá pìí ʋ bà də lɩ̀à tə mama, ba nə yɩ Kərisə nə tɩ.