13
Baji bisa haya kul
1 Ba nda ay ga šenney šelaŋ kaŋ borey gʼi šelaŋ hala ka šenney šelaŋ kaŋ almalaykey gʼi šelaŋ,
amma nda ay si baa boro* 13.1 Bajoo woo ti: boro ma baa boro, ma baa Irkoy.,
ay ga hima nda guuru kaŋ ga kara-kara de, wala haya kaŋ ga dunduŋ de.
2 Koyne mo nda ay duu annabitaray,
de ay ga sirrey kul bay, de ay duu bayraa kul,
de mo nda ay duu naanay beeri kaŋ ga kate ya hin ka tondi honduyaŋ ganandi,
amma nda a gar ay si baa boro, ay manʼti baffoo.
3 Ba nda ay gʼay almaanoo kul zamna heraykoyney se,
de ay gʼay kunturoo noo i mʼa ton† 13.3 «i mʼa ton», hantum fooyaŋ ga nee «hala ya duu ka bolsay».,
amma nda a gar ay si baa boro, a si haya kul hanse ya ne.
4 Baji ga suuri, a ga boori,
a si canse, [baji] si bolsay, a si fooma,
5 a si goy meera tee, a si nga boŋ nafaa ceeci,
a si dukur, a si dori dii,
6 a si ɲaali nda šerretaray jaŋay,
a ga ɲaali nda cimi.
7 Baji ga hinžee haya kul ra, a ga naanay haya kul, a ga haya kul naata, a ga haya kul muɲe.
8 Baji si ben abada.
Annabitaray ga kaa ka ben, šenney ga kaa ka naŋandi, bayray ga kaa ka ben.
9 Sohõ bayray jere bara ir se, ir annabitaraa manʼti kala jere.
10 Amma waati kaŋ woo kaŋ ga timme kaa, woo kaŋ ti jere ga kaa ka ben.
11 Waatoo kaŋ ay ga tee zanka kaccu, ay ga šelaŋ sanda zanka kaccu,
ay ga miile sanda zanka kaccu, ay ga hongu sanda zanka kaccu.
Waatoo kaŋ ay tee aru, ay benandi nda zankakaccutaray hayey.
12 Sohõ diji‡ 13.12 Waatoo din dijey si tee kala guuru ra. Woo se boro si dii a ra ka boori. nda ir ga dii, a si kaaray,
amma ir ga kaa ka dii moo nda moo.
Sohõ ay bayraa manʼti kala jere,
amma ay bayraa ga kaa ka timme sanda takaa kaŋ nda Irkoy gʼay bay.
13 Haya hinzaa kaŋ ga cindi ne:
naanay, nda naata, nda baji,
amma hayey wey kul ibeeroo manʼti kala baji.