1 Chamran, kal nare nan̰ dwar̰angə̂ kədənə̂ woni gələ̂gə kwandagə mani ɗi, dara anə̂ ocn̰ nendə woni gələ̂gə kwanandə mani da, Mãr̰ĩ ha alandə sariya waya ɗwoya kwanandə nə̂ ɗang day bam pad. 2 Pat ənda lə̂ pad də alang mani nə̂ i gə bərmə̂ day bə̂də̂ jiga jiga, gun alna mani nə̂ acn̰e managə gwale duwa gə waya lə̂ bə̂də̂ da, an̰ji i gun gə yə səw gasənani gə neyem yə̂ə̂ səw pad le. 3 Də hurbənagə lemde arjam bədə̂gələ̂ dara ba alnandə horəmbə̂ da, sədə̂gə gə doni pad kaw də i gə dwana lə̂ dəwə̂ me ca. 4 Yarnandə bərwa sən̰, an̰ji jorna nan̰e ya man de me ina i gale gə geche me nwagər̰ənaw daa ya man de kaw, i gə habda duwa gə ɓani yande me gun gaba yə̂ə̂ habda di ha gandəw mana gə dərə̂w urə̂. 5 Gun dilesəw kaw i yande me ca. Tandi i mani nə̂ ɓani yande ɗəm da, tandi ogə sədə ba də neyem ala mani nə̂ gechide nan̰. Ya anə̂ ocn̰ nəm de, duwa də ɓani yande kaw neyem ulə̂ kudəmi gə geche bam ɗəndang. 6 Dilese di kaw wun ya duwa de, i ciri də dama də nə̂ acn̰a duwa də hurə̂lə̂ doni ənda lə̂, me gawin̰ doni ənda pad gə acn̰a. I gə acn̰a gə ta di me, tandi meyendəndə bam yaa əndalə̂ bəra wala ənda ꞌyan̰a duwa-lə̂. Dwana dəra dədə meyanda nare bam ta di swa i managə duwa dədə budə̂ bam bə̂də̂ bərin̰ə̂lə̂.

7 Gun gə gəsage da, neyem paga mwagne nə̂ bam pad le me dirbi me mani woni n̰ara dodə̂ me, goche nə̂ kuray-yə̂ me ca, mani nə̂ ta di pad da, i gun gə gəsage me, pagəgə an̰ju. 8 Ɗəm da, gun mən tenene kaw neyem paga dilesəw bə̂də̂, tandi i mani nə̂ meyendə mana bam nə̂ gun neyem yidə dodə̂ bə̂də̂. Tandi ꞌwon i gə sam gaba ꞌya gun. 9 I gə dilesandə di me, də bow gə Aba ciri gə i abrandə di jilay me, i gandədə tandi me, də sərgə̂ng gə nare nə̂ Mãr̰ĩ bogə wunəw ya an̰ju de dige dige di me ca. 10 Bədə̂ng gə mən ta di gang me, anə̂ bow gə Mãr̰ĩ jilay me, bədə̂ng gə mən ta di anə̂ sərgə gə nare me ca, chamran, kal ina yande bə̂də̂. 11 Di mən anə̂ yə̂r bəla gə cha mən da, nimi duwa ꞌyol me ɗan̰ me ca mo? 12 Chamran, di mən anə̂ yə̂r dwaga da, neyem ya cwarna mo? Labaa guy neyem ya dwaga mo? Ina yande bə̂də̂ da bəla gə nimi duwa ɗan̰ da, gə ha udə̂ nimi nə̂ ꞌyole lə̂ bə̂də̂ ɗəm.

13 Gun mən dwar̰angə̂ wayna da ba i aba dərə̂n̰ naa me aba ꞌwacn̰a mani me ca da kaləw a gələnə̂ dərin̰ naa duwa di me ꞌwacn̰a duwa di me gə mani nə̂ ala nə̂ lade me gə asa gə dii dodə̂ me ca. 14 Ɗəm da, dusi də harni me, də wome me, halgəni me ina lə̂ dusərə̂ngə̂ da, kalna ꞌwaga sədə̂ng dara ba anə̂ i nare woni dərin̰ naa bə̂də̂ me sabna kulagə ɗərbənə̂ gwale səw di dodə̂ bə̂də̂ me ca. 15 Dərin̰ naa nə̂ ya ta de da, i nə̂ swa Mãr̰ĩ səwə̂ bə̂də̂, i nə̂ dodə̂ sən̰a dədə̂ me i dərin̰ naa nə̂ nə̂ gun gə gəsage duwa me i nə̂nə̂ sidan dəra me ca. 16 Dara managə harni me halgəni me inalə̂ da, mani nə̂ dodə̂ mad mad me nə̂ acn̰e nə̂ woy woy kaw ilə̂ me ca. 17 Ɗəm da gun gaba dərin̰ naa nə̂ swa Mãr̰ĩ-yə̂ da pii pa da i gun gə dusəw wusə me i gun gə hara gə labiya me i gun gə həlale me i gun gaba daya nare daa me i gun gaba ərmə̂ jaw me ca. I gun gə al mani nə̂ lade me i gun gə pii nare dərə̂gə bə̂də̂ me i gun gə lway gwale gə bu me dusəw da i jiga me ca. 18 Nare nə̂ hara gə həlala jwam da, cendi gəsə həlala jwam di managə tulə̂gələ̂ cap cap ya gun ba gəsə gə swagə̂ de me dərə̂gə nə̂ cendi n̰il gə da i mani nə̂ ala nə̂ təba di me ca.