Kalata ya Paulo ku
Bagalatiya
Bupandulushi.
Libuku lya Agalatiya lyalalembwa ne Paulo 1:1 ni kalata njalalembela ku mibungano ya ba Galatiya cindi nacimbi pakati pa 48-57 A D Bagalatiya ni bantu balikwikala mu Loma mucimpansha ca Galatiya. Bantu beshikuyanda kwinshibishisha bintu baliya bumboni bwakwishiba cena nkwalikuba Paulo pacindi mpwalikulemba kalata iyi, nomba minshi ibili ya Efenso ne Kolinto emisena ilayeyelwanga.
Paulo walalembela baklistu Baciyuda ne Bagiliki mu mibungano ili mu Galatiya. Makamaka walalemba kwambeti ciyisho cabwepeshi calikwambeti baklistu balikuyandika kukonkela milawo ya Ciyuda ya mu Cipangano ca Kaindi, makamaka makani a kupalulwa. Palikuba likoto lyabantu pakati pa baklistu balikukwiweti beshiciyuda balikuyandeti bantu babula kuba Bayuda belela kupalulwa. Ncito yakuba mutumwa ya Paulo baliya kwishoma. Paulo walakwabilila ncito yakendi pakubambila calenshika 1:11 mpaka 2:14 Kayi walakkwabilila mulumbe pa kusansulula kwambeti lupusho lukute kucanikowa mulushomo muli Yesu Klistu. 2:16 Ni nkumbo sha Lesa nshakute kulesha, nteco ncobakute kwinsa bantu.
Mitwi ya makani
Paulo latatikinga kalata yakendi pa kupa mitende mibungano Mugalatiya 1:1-5
Lino Paulo lalyambanga ncalikuba kaindi, nekukwabilila kusunguluka nkwakute kwa kwiyisha, nekubalesha kwambeti walelekesha kwikala mubuyumi bwakukonkela milawo, itasebense 1:6 mpaka 2:21
Cakonkapo lasansululunga ncito sha mulawo, ne nkumbo mulupulusho 3-4
Kayi lapanga malailile a bwikalo bwaina bwaciklistu, 5:6-10
Paulo lapwishinga kalata yakendi ne mitende nekubasengeti bayeyengeti kusandulwa ne Lesa kuba muntu walinolino kulayandikinga kupita milawo, mbuli mulawo wa kupalulwa 6:11-18
1
1 Njame Paulo mutumwa, ndiya kusalwa ne bantu nambi kupitila mu muntu sobwe, nsombi ndalasalwa ne Yesu Klistu, kayi ne Lesa Bata balamupundusha kubafu. 2 Ame pamo ne baname abo bali pamo nenjame, tulamupanga mitende mibungano ya mucibela ca Galatiya. 3 Kwina moyo ne lumuno lwa Lesa Bata ne Mwami Yesu Klistu lube nenjamwe. 4 Yesu walaliyaba pacebo cakwambeti atulubule ku bwipishi bwetu, kayi walatupulusha kufuma kubuyumi bwaipa bwacino cindi.Walensa bintu mbyalikuyanda Lesa Ishetu. 5 Bulemeneno butapu bube kuli Lesa cindi conse. Amen.
Mulumbe Waina ni umowa
6 Ndakankamananga pakuboneti mulapatukunga kufuma kuli Lesa walamukuwa kwelana ne kwina moyo kwa Klistu, mulatatiki kukonka mulumbe naumbi, 7 mulumbe ngomulakonkelenga nte mulumbe waina sobwe. Nsombi kuli bantu nabambi balayandanga kumufulunganya pakusandula Mulumbe Waina ulambanga sha Klistu. 8 Nomba uliyense, nambi njafwe nambi mungelo lafumu kwilu wisakumukambaukila Mulumbe Waina wapusana ne ngotwalamukambaukila, uyo ashinganwe.
9 Mbuli ncotwalambapo kendi kayi ndabweshengaponga kwambeti muntu uliyense weshi akamukambaukile mulumbe wapusana ne Mulumbe Waina ngotwalamwambila, uyo abe washinganwa.
10 Sena pakwamba bintu ibi ndayandangeti bantu bansuminishe? Sobwe, nsombi kwambeti Lesa ansuminishe. Sena ndayandanga kwambeti nkondweleshe bantu? Nendalikuyanda kukondwelesha bantu, nendalabula kuba musebenshi wa Klistu.
Kusalwa kwa Paulo kuba mutumwa
11 Mobanse, kamuleka ndimwambile, Mulumbe Waina uyo ngonkute kukambauka nkaukute kufuma kubantu sobwe. 12 Nkandalautambula kufuma kubantu sobwe, kayi kuliya muntu walanjiyisha, nsombi ni Yesu Klistu mwine ewalanjubulwila Mulumbe uwu.
13 Mwalanyumfwa bwikalo bwakame bwakaindi mpondalikuba mumpaililo ya Ciyuda. Ndalikuba muntu walikupensha mubungano wa Lesa kwakubula inkumbo, kayi ndalikuyandishisha kuwonongelalimo. 14 Ndalikupita baname bangi balikuba bamushimba wakame pakwinsa bintu bya mpaililo ya Ciyuda, kayi ndalikuba walibenga pakukonka miyambo ya bashali betu.
15 Nsombi Lesa walampatula kantana nsemwa, kayi mukwina moyo kwakendi walankuweti ndimusebensele. Lino mpwalayanda 16 kundesha Mwanendi kwambeti njenga akukambauka Mulumbe Waina ulambanga sha endiye kubantu bamishobo naimbi, ndiya kuyapo kumuntu naumbi kwambeti ampeko mano. 17 Kayi nkandalayapo ku Yelusalemu kuya kubona balatanguna kuba batumwa kantana mba umo wa endibo. Nsombi ndalaya ku Alabiya kayi ne kubwelela ku Damasiko. 18 Mpopalapita byaka bitatu ndalaya ku Yelusalemu akunyumfwa makani kuli Petulo, ndalekalako masuba akwana likumi ne asanu. 19 Nkandalabonapo mutumwa naumbi, nsombi enkowa Jemusi mukwabo Mwami.
20 Ncondalembenga nicakubinga, kayi neye Lesa ucinshi kwambeti nkandabepenga sobwe.
21 Kufumapo ndalaya ku cibela ca ku Siliya ne ku Kilikiya. 22 Pacindi ico bantu ba mumibungano ya ku Yudeya nkabalikunjishiba ame sobwe. 23 Balikunyufwowa mbyobali kwamba bantu eti, “Usa muntu walikutupensha lakambaukunga lushomo ndwalelesha kushina!” 24 Neco balalumbaisha Lesa pacebo ca njame.