14
अच्युनुपतिवाला क्येन तेरुप मेवु
1 तेपा रम्बु मेतुपतिवाला साङ नासाम तङ्नी ल्यामु की। तिवी ताम्ङेला क्येन ग्यकुप ति माकी। 2 ललाइ मीतिवी साप समातिवा तेरी साप गिवी सिनी तेपा किवी, यिने तेपा रम्बु मेतुपतिवा ललाइकी ङोछेलतिवा तिराङ साप गिवी सिनी तेपा किवी। 3 तुक क्यानी सापतिवी मासावुतिवाला मारे मातोङ। मासावुतिवी साङ सापतिवाला क्येन मातेर। च्यिलासिसिन कोन्छ्योककी तिवाला पेन नङ्गुप यिन। 4 मी यम्बी लावाला ठिम कितुप ति ख्युरुङ सु यिन? तीकी ज्यिन्दाककी राङ सु ल्यामु यिन, सु मेलोवा यिन सिनी तीला ठिम क्या नङ्गिवी। तीकी ज्यिन्दाककी राङ तीला दाल्जा क्या नङ्गिवी।
5 तमा ललाइ मीतिवी ङ्यिमा च्यिक ति ङ्यिमा यम्बा सिनाङ खक्छ्येवु यिन सिनी नासाम तोङ्गिवी, यिने मी यम्बातिवी तेरी ङ्यिमा ति च्यिक्पा राङ यिन सिनी नासाम तोङ्गिवी। तुक क्यानी तेरी मीतिवा दाक दाक्पी तेपा क्यावु ताम्ङेला तेन्तेन कि गोकिवी। 6 चुका मी तीकी ङ्यिमा च्यिकला ति खक्छ्येवु यिन सिनी तेन्गिवे, तीकी चोवो कोन्छ्योककी थोक्ला राङ तेन्गिवी। तमा चुका मी तीकी श सेवे, तीकी कोन्छ्योककी थोक्ला राङ सेवी। च्यिलासिसिन तीकी कोन्छ्योकला थुचिछे पुल्नी सेवी। चुका मी तीकी श मासावे, तीकी साङ कोन्छ्योककी थोक्ला राङ मासावी। तमा कोन्छ्योकला थुचिछे बुल्गिवी। 7 दाक्पु सु साङ रङगी थोक्ला तिराङ दी जम्बुलिङला सेन्बु मुलुवी, तमा रङगी थोक्ला तिराङ मिशिवी। 8 तुक क्यानी दाक्पु मिजी क्योङ्सिनाङ कोन्छ्योककी थोक्ला राङ क्योङ गोकिवी, शि गोसिनाङ कोन्छ्योककी थोक्ला राङ शि गोकिवी। तुक क्यानी दाक्पु शिसिनाङ सेन्बु देसिनाङ चोवोकी तिराङ यिन। 9 ख्रीष्ट साङ तीकी तेन्दोकला राङ टुङ्नी ङोसु लासुङ। तुक क्यानी ख्रीष्ट ति शेप ताङ ङोसु वोतुपतिवा ङ्यिकरकी चोवो च्युङ्सुङ।
10 ख्युरुङ च्यिला ख्योरो अच्युनुपतिवाला क्येन तेर्किवी? याङ्ना ख्योरो अच्युनुपतिवाला च्यिला मो बेप्किवी? दाक्पु तेरी ङ्यिम्ज्यिक कोन्छ्योककी ठिम तोङ्गुप दासाला थेङ्मा यी लाङ राङ गोकिवी। 11 ती तप्की कोन्छ्योककी सुङला दुक सिनी टि वे,
“चोवो कोन्छ्योककी दुक सुङ्गिवी,
ङ ङोसु वोतुप कोन्छ्योक यिन।
तुक क्यानी तेरी मीतिवा ङे दोङ्ला पुमुङ सला जुकिवी।
तमा तेरी मीतिवी ङला राङ कोन्छ्योक यिन सिनी सोवा देकिवी।”* १४:११ यशैया ४५:२३
12 तुक क्यानी दाक्पु मिरा रे रेकी रङगी काङ काङ क्यावे ती तेरी कोन्छ्योकला छ्या देन गोकिवी।
यम्बाला मेलोवा डोप लाका माकी
13 ती तप्की दाक्पु तफेन्ला च्यिककी च्यिकला क्येन मातेर। बोरु रङगी अच्युनुपतिवा युकुप लामला नर्तुक ग्यकुप ताम्ङे लपुप ताङ तिवाला तोक्सा छोकुप ताम्ङे मालाप सिनी तेन्तेन कितुप। 14 चोवो येशूला तेपा क्यावु तप्की दी ताम्ङे ति ङला तेन्तेन वे। साप समा ति चुका तिङ मेचेङ्गा मेवी, यिने चुका तीकी तीला मेचेङ्गा यिन सिनी नासाम तोङ्गिवे, तीकी थोक्ला मेचेङ्गा राङ डिवी। 15 दोजो ख्योरो सोवु समाकी ख्योरो अच्युनुपकी सेमला मेलोवा जेवी सिसिन ख्युरुङ तिवाला ङ्यिङ्ज्ये माक्यावु यिन। तुक क्यानी ख्योरो सोवु समाकी ख्योरो अच्युनुपतिवाला मेलोवा मातोङ। च्यिलासिसिन येशू ख्रीष्ट तिवी थोक्ला टुङ्गुप यिन। 16 ख्योरो क्यावु लाका ल्यामुला मी यम्बी मेलोवा सिनी क्येन मेतेर्शी। 17 च्यिलासिसिन कोन्छ्योककी ग्येल्खाप ति साप ताङ थुङ्गुपकी थोक्ला मिन, खोकी थु चाङ्माकी ओङला खोकी थोङ्दाङला टेङ्बु वोतुप ताङ लोदिमु ताङ सेम किर्मुकी थोक्ला यिन। 18 चुका मी तीकी तुका लाका क्यानी ख्रीष्टला शब्ज्यी बुल्गिवे, तीकी कोन्छ्योकला गा लोङ्गुप लाका किवी, तमा मीतिवी साङ तीला ल्यामु सिनी चिताङ किवी।
19 ती तप्की दाक्पु च्यिककी च्यिकला लोदिमु तेरुप ताङ च्यिककी च्यिकला रम्बु जोपला दाल्जा किटे कि गोकिवी। 20 साप समी थोक्ला कोन्छ्योककी क्या नङ्गुप लाकाला ना मातोङ। साप समातिवा तेरी चेङ्गा राङ यिन। यिने चुका समा सोसिमा मी यम्बाला मेलोवा जेवे, ती समा साप ति मेलोवा यिन। 21 श साप ताङ गुन्डुम छ्याङ थुङ्गुप ताङ यम्बा लाका काङ क्यासिनाङ ती लाका क्यावु तप्की मी यम्बाला मेलोवा जेवी सिसिन, तुक माक्यावु राङ ल्यामु यिन। 22 ख्योरो सेमला काङ तेपा क्यासिनाङ ती ति कोन्छ्योक ताङ ख्योरो पर्ला तिराङ ज्योक। खोरो सेमला शरुप दोके क्यानी रङला राङ क्येन मेतेरुप मी तीला मोलाम थोप्किवी। 23 यिने मी ललाइकी सेमला नाम्दोक क्यानी काङ रे च्यिक रे सोसुङ सिसिन तीला क्येन फोकिवी। च्यिलासिसिन तीकी साप ति तेपा नेसुर वावु मिन। तेपा माक्यानी क्यावु लाकातिवा तेरी दिक्पा यिन।