11
पङ्बु तेरुप मिरा ङ्यीकी कोर्ला
1 ती ज्युक्ला ङला तपुप थिक्शिङ दोके लकाम च्यिक बिन्सुङ। तमा तीकी ङला दुक सिक्यासुङ, “ख्युरुङ लानी कोन्छ्योककी ल्हङाङला गल्नी ल्हङाङ ताङ छोठी ति तोप! तमा ते खोला सोवा देकुपतिवा तेरी टङ्गा ग्योप! 2 यिने ल्हङाङ फिला वोतुप लेङाङ ति माताप, च्यिलासिसिन ती ति मिरिक कुतुक कुतुककी मीतिवाला बिन्दुप यिन। तिवी तीला ल खल ङ्यी ताङ ङ्यी सेक चाङ्मा वोतुप यरूशलेम ग्येसाकी लेप्नी ग्येला किवी। 3 तमा ङ मिरा ङ्यीला पङ्बु तेरुप ओङ बिन्नी तोङ्यिनो, तिवी भाङ्ग्रा कोन्नी* ११:३ ती भाङ्ग्रा कोन्दुप तेन्दोक ति दिक्पा ने सेम ग्युरुपकी थोक्ला यिन। ङ्यिमा तोङ्डा यी ताङ सयी ङ्यी ताङ खल टुक सेक नम्दर शेकितो।” 4 ती पङ्बु तेरुप मिरा ङ्यी ति जम्बुलिङला ग्येला कितुप चोवो कोन्छ्योककी चिप्ला वोतुप जैतुनकी दोङ्बु ङ्यी ताङ मेलाङ ङ्यीतिवा यिन। 5 दोजो मी ललाइकी तिवाला ना तोङ्गुप नो क्यासिनाङ तिवी ख नेसुर थेन्दुप मेकी तिवी डतिवाला ना तोङ्गिवी। तमा सी तिवाला ना तोङ्गुप नोकिवे, तिवाला तुक राङ क्यानी सेकिवी। 6 कोन्छ्योककी तिवाला सुङ ख्याप्टाक कि मच्यिवा सेक्ला तिवी छ्यर्वा मग्यक्शी सिक्यासिमा छ्यर्वा मग्यप्नी नाम्खर कि ज्यितुप साङ तिवाला ओङ वे। तमा छ्युला ठक डो ज्यितुप ताङ तिवी नो वोतुप पेला जम्बुलिङला नेजु मेलोक्पा नम्बा कुतुक कुतुक वुङ ज्यितुप साङ तिवाला ओङ वे।
7 तमा ती पङ्बु तेरुप मिरा ङ्यीतिवी पङ्बु तेरुप लाकातिवा तेरी छेसिमा छासे तिङ्मु वोतुप मुक्तुम नेसुर सेम्ज्येन च्यिक थेन्गिवी। ती सेम्ज्येनकी तिवाला थमु ग्यप्नी तिवी खला ग्येल्नी तिवाला सेकिवी। 8 तमा तिवी रोतिवा ति ग्येसा ग्येर्पुकी लाम नेवा क्युर्किवी। ती ग्येसाकी मिङ ति सदोम याङ्ना मिश्र साङ सिनी ज्याङ वे। ते तिवी चोवोला साङ ग्यङ्शिङला कल्नी सेतुप यिन। 9 ङ्यिमा सुम ताङ फेका सेक गिपा कुतुककी मीतिवा ताङ मिरिक कुतुककी मीतिवा ताङ ग्येताम कुतुककी मीतिवा ताङ लुङ्बा लुङ्बाकी मीतिवी तिवी रोतिवाला ल्हेवी। तमा सुला साङ ती रो ति मुक्तुम ग्यक मिज्यिवी। 10 तमा ती पङ्बु तेरुप मिरा ङ्यीला सेतुप थोङ्सिमा जम्बुलिङकी मीतिवा कशेन गा किवी। तमा तिवी च्यिककी च्यिकला ङ्येम्बा तेर्टी चेवी। च्यिलासिसिन ती पङ्बु तेरुप मिरा ङ्यीतिवी दी जम्बुलिङकी मीतिवाला छासे छ्येर्पा बिन्नोक। 11 यिने ङ्यिमा सुम ताङ फेका यी ज्युक्ला कोन्छ्योक नेमा वावु मिजीकी उ ति तिवी नाङ्ला शुसुङ। तमा तिवी काङ्बा चुनी लासुङ। ती थोङ्सिमा मीतिवा कशेन ज्यिवा क्यासुङ। 12 तमा देवाच्येन नेमा कशेन थोर ग्यप्नी “दे केला शोक।” सिक्यावु ति ती पङ्बु तेरुप मिरा ङ्यीतिवी थोसुङ। तमा तिवी डतिवी ल्हयी ल्हयी तिवा मुक्पी पर्ने केला देवाच्येन ने गाल्सुङ। 13 ती पेला राङ सयी ग्यिर्पो यी ग्यप्सुङ, तमा ग्येसा छो च्यिथम्बाला छो च्यिक ति तला ग्यप्नी मी तोङ्डा दिन शिसुङ। तमा यम्बा सेन्बु लुवु मीतिवा छासे ज्यिवा क्यानी देवाच्येनकी कोन्छ्योकला मोवा क्यासुङ।
14 छेटाङ ङ्यिवा ति छेसुङ। ल्होसा, त येलुङ छेटाङ सुम्बा ति वुङ्यिन वोतो।
ग्येलिङ दिन्बा
15 येलुङ देवाच्येनकी लेन क्योलुप थु दिन्बा तीकी खोरो ग्येलिङ पुसुङ। ती ज्युक्ला देवाच्येन नेमा थोर ग्यप्नी दुक सिरुप वोरु यी ग्येर्पु तेन्सुङ,
“जम्बुलिङकी ग्येल्खाप ति दाक्पी चोवो कोन्छ्योक ताङ खोकी ख्रीष्टकी ग्येल्खाप च्युङ्सुङ।
त खोकी नरीकी नरी ग्येला क्या नङ्गितो।”
16 ती ज्युक्ला कोन्छ्योककी चिप्ला दाक दाक्पी ग्येल्ठिकला देतुप गोमा कितुप मी छ्ये खल ज्यिक ताङ ज्यीतिवा सला खवुतुङ्मा देनी दुक सिनी कोन्छ्योकला सोवा तेक्सुङ,
17 “ओ, गोमाला नेज्यु नरी लुवु ताङ तन्दा साङ ज्यु वोतुप ओङ छ्येवु कोन्छ्योक,
ङ्यिराङ कोन्छ्योकला थुचिछे बुलिन।
च्यिलासिसिन कोन्छ्योकला ओङ ग्येर्पु वे,
तमा जम्बुलिङला ग्येला कितुप गो चुन नाङ्सुङ।
18 मिरिक कुतुक कुतुककी मीतिवी ङ्यिर्मु क्यासुङ,
त चोवो ङ्यिर्मु कितुप तुजे ति छेसुङ।
तमा शेपतिवाला ठिम कितुप तुजे साङ छेसुङ।
तमा चोवोला शब्ज्यी कितुप लुङ्तेम्बातिवा ताङ तेपा कितुपतिवा ताङ चोवोला ज्यिवा कितुप छ्ये छ्युङा तेरीला छ्यक्तक तेरुप तुजे साङ छे वे।
जम्बुलिङ ना तोङ्गुपतिवाला पर्च्या तोङ्गुप तुजे साङ छे वे।”
19 तमा देवाच्येनला कोन्छ्योककी ल्हङाङ पेसिमा ती नाङ्ला खोकी थाक्छ्येन नङ्गुप तेर्गाम ति थोङ्सुङ। ते चिलाम ग्यपुप ताङ सम्डुक ग्यकुप वोरुतिवा थोसुङ। तमा सयी ग्यकुप ताङ सेर बोम्बु बोम्बुतिवा ग्यप्सुङ।