1 ङे सिक्‍यावु ति काङ यिन सिसिन, कोन्‍छ्‍योककी थाक्‍छ्‍येन नङ्‍गुप अंश माथोपा सेक पुज्‍युङ टिक्‍पे वोतुप तप्‍की पुज्‍युङ ति तेरी नोरकी ज्‍यिन्‍दाक यिन्‍सिनाङ ती ति योक्‍पु दोके च्‍युङ्‍गिवी। 2 पपी नोवाला वोतुप तुजे माछेवा सेक तीला ल्‍हाप मी तीकी ओङला ती ति दे राङ गोकिवी। 3 ती दोके दाक्‍पु साङ टिक्‍पे वोतुप पेला ति फेन मोथोवु जम्‍बुलिङकी ल्हलुकी ओङला योक्‍पु दोके वोतुप्‍जा। 4 यिने तुजे छेसिमा कोन्‍छ्‍योककी खोरे सेवुला दी जम्‍बुलिङला तङ्‍नी पुम्‍पेजा यीकी खोक नेमा मोशाकी ठिमकी ओङला क्‍येसुङ। 5 तीकी तेन्‍दोक ति मोशाकी ठिमकी ओङला वोतुप मीतिवाला थर ज्‍यितुप ताङ दाक्‍पु कोन्‍छ्‍योककी थाक्‍छ्‍येन नङ्‍गुप पेजा च्‍युङ्‍गुपला यिन। 6 दाक्‍पु कोन्‍छ्‍योककी पुज्‍युङ यिन्‍दुप तप्‍की खोकी खोरे सेवुकी थु ति दाक्‍पी सेमला ज्‍याङ नाङ्‍सुङ। तुक क्‍यानी दाक्‍पी खोला “पपा कोन्‍छ्‍योक” सि थुप्‍किवी। 7 ती तप्‍की त ख्‍यिराङ योक्‍पु मिन, खोकी पुज्‍युङ यिनो। ख्‍यिराङ खोकी पुज्‍युङ यिन्‍दुप तप्‍की खोकी मुला वोतुप अंश तेरी ख्‍यिराङला थोप्‍किवी।

8 गोमाला ख्‍यिरा कोन्‍छ्‍योकला ङो माशेवु पेला जम्‍बुलिङला वोतुप ल्‍हलुतिवाला योक्‍पु दोके क्‍यानी शब्‍ज्‍यी क्‍यासुङ। 9 यिने त याङ ख्‍यिरा कोन्‍छ्‍योकला ङो शेनी वे, खोकी साङ ख्‍यिराङला ङो शेनी वे। यिन्‍सिनाङ ख्‍यिराङ च्‍यिला ओङ मेतुप ताङ फेन मोथोवु जम्‍बुलिङकी ल्हलुकी ओङला लोक्‍नी शब्‍ज्‍यी कितुप नो किवी? 10 तमा कोन्‍छ्‍योकला गा लोङ्‍गुपला ख्‍यिरा छेवा ताङ ल ताङ नाम ताङ लोला तेन्‍दुप लाका थोङ्‍नी 11 ङे दुक्‍पा क्‍यानी क्‍यावु लाका ति तेर्मेला डिते सिनी ङला पप लङ्‍गिनोक।

12 अच्‍युनुपतिवा, ख्‍यिराङ ङ दोके च्‍युङ्‍शी सिनी गोङ्‍बा शोयिन। च्‍यिलासिसिन ङ साङ ख्‍यिराङ दोके च्‍युङ्‍गुप यिन। ख्‍यिरा गोमाला ङला काङ साङ मेलोक्‍पा माक्‍या वे। 13 ङ अमोछ्‍यो वोतुप तप्‍की ङे ख्‍यिराङला थल्‍माला लेन ल्‍यामु ख्‍याप्‍टाक क्‍यावु ति छ्‍या राङ वे। 14 ङ अमोछ्‍यो वोतुप ति ख्‍यिरा थोक्‍ला खोक्‍पा ल्‍हावु दोके गल्‍सिनाङ ख्‍यिरा ङला ङ्‍यिङ्‍मर माक्‍या, मारे साङ माताङ। यिने देवाच्‍येनकी लेन क्‍योलुप थु ताङ ख्रीष्‍ट येशूला दोके ताङ्‍देन क्‍यासुङ। 15 तोजो पेला वोतुप ख्‍यिरा गा ति कनी गाल? च्‍यिलासिसिन ङला गोसिन ख्‍यिरा ङला रङगी मिक साङ तेन्‍नी तेर थुपुप ति यिन्‍जा। 16 काङ ङे ताम्‍ङे टेङ्‍बु लाप्‍नी के ख्‍यिरा मुला डला गलुप यिन रो? 17 यम्‍बा लेन ल्‍यामु मेटेङ्‍बुला क्‍योकुप मीतिवी ख्‍यिराङला ताम्‍ङे ल्‍यामु जोनी लुकिवी। ती ति तिवी सेम टेङ्‍बु क्‍यानी मिन, ङे मु नेसुर कुतुक पेनी खोप्‍रे ताम्‍ङेला ङर्मा जोपला यिन। 18 तिवी सेम टेङ्‍बुला ङर्मा वोसिन ङ ख्‍यिरा पर्ला वोतुप पेला तिराङ मिन, ङ मेतुप पेला साङ नरी ङर्मा कितुप गिवी। 19 ङे ङ्‍यिङ्‍ज्‍येवु आङातिवा, ख्‍यिराङ ति ख्रीष्‍टकी दोके मिजी माक्‍योङ्‍वा सेक ङ ति आङा क्‍येप पुम्‍पेजाला सुक ग्‍यपुप दोके छेटाङला ख्‍येल्‍नी दे गोकिवी। 20 ङ ख्‍यिरा मुला वोतुप यिन्‍सिन ख्‍यिराङला ङे ल्‍यामो क्‍यानी ताम्‍ङे कितुप्‍जा, यिने ङ थाक्‍रिङ्‍बु वोतुप तप्‍की ख्‍यला ख्‍यिला गाल्‍सुङ।

21 ख्‍यिराङ मोशाकी ठिमकी ओङला देतुप नो कितुपतिवाला ङ ताम्‍ङे यी टेयी। मोशाकी ठिमकी दाक्‍पुला काङ लोप्‍किवी ख्‍यिराङला छ्‍या वे? 22 कोन्‍छ्‍योककी सुङला दुक सिनी टि वे, “अब्राहामकी पुज्‍युङ पिन ङ्‍यी नोक। च्‍यिक ति योक्‍मी थाकाला क्‍येवु ताङ यम्‍बा ति खोरो पेर्मी थाकाला क्‍येवु नोक।” 23 योक्‍मी थाका नेमा क्‍येवु ति मी नोवा नेमा क्‍येवु नोक, यिने खोरो पेर्मी थाका नेमा क्‍येवु ति कोन्‍छ्‍योककी थाक्‍छ्‍येन नङ्‍गुप नेमा क्‍येवु नोक। 24 दी ताम्‍ङे ति पे नेसुर शेतुप यिन। च्‍यिलासिसिन दी पुम्‍पेजा ङ्‍यीकी तेन्‍दोक ति कोन्‍छ्‍योककी थाक्‍छ्‍येन नङ्‍गुप ताम्‍ङे ङ्‍यीकी कोर्ला यिन। कोन्‍छ्‍योककी थाक्‍छ्‍येन नङ्‍गुप ताम्‍ङे च्‍यिक ति सीनै रीला मोशाला सुङ्‍गुप ताम्‍ङे यिन। ती ति हागार यिन। ती हागार ति योक्‍मु यिन्‍दुप तप्‍की ती नेसुर क्‍येवुतिवा तेरी योक्‍पु यिन। 25 तमा हागार ति अराबिया लुङ्‍बी सीनै री दोके यिन। तमा ती ति तन्‍दाकी यरूशलेम दोके यिन। ती ताङ तीकी गिपातिवा ति तन्‍दा वोतुप यरूशलेमकी मीतिवा दोके यिन। तिवा तेरी योक्‍पु दोके मिजी क्‍योङ्‍गिवी। 26 यिने देवाच्‍येनला वोतुप यरूशलेमकी तेन्‍दोक ति योक्‍मु मिन, दाक्‍पी आमा यिन। 27 च्‍यिलासिसिन कोन्‍छ्‍योककी सुङला दुक सिनी टि वे,

28 अच्‍युनुपतिवा, ख्‍यिराङ साङ इसहाक दोके कोन्‍छ्‍योककी थाक्‍छ्‍येन नङ्‍गुप गिपा यिन। 29 ती पेला मी नोवा नेमा क्‍येवु तीकी कोन्‍छ्‍योककी थु चाङ्‍मा नेमा क्‍येवु तीला दुक्‍पा ताङ छेटाङ तेर्किनोक। ती दोके तन्‍दा साङ दाक्‍पी तुकै राङ थोङ्‍गिवी। 30 यिन्‍सिनाङ कोन्‍छ्‍योककी सुङला दुक सिनी टि वे, “योक्‍मु ताङ तीकी पुज्‍युङला तेन्‍नी तोङ। च्‍यिलासिसिन ती योक्‍मुकी पुज्‍युङला कोन्‍छ्‍योककी थाक्‍छ्‍येन नङ्‍गुप पुज्‍युङकी मुला नाम्‍साङ पपी अंश ति थोपुप ओङ मे।”* ४:३० उत्‍पत्ति २१:१० 31 तुक क्‍यानी ङे अच्‍युनुपतिवा, दाक्‍पु ति योक्‍मी थाकाकी ति मिन, कोन्‍छ्‍योककी थाक्‍छ्‍येन नङ्‍गुप अब्राहामकी पेर्मी थाकाकी गिपा यिन।