1 Polo Sailasi Timodi niki tepoma꞉ iki Desalonaika siosi pa꞉ta꞉ dupiki tameiya꞉ wape pea tapaasoma꞉me. Ikita꞉ Koda꞉ nika꞉ Apa꞉ make Yesu Ketiso nika꞉ Tekehali tieke ame̱le̱ halememe. 2 Apa꞉ Koda꞉ make Tekehali Yesu Ketiso ipilikana꞉ma꞉ a꞉ta꞉ma꞉ homolo tamba꞉ mina꞉la꞉eki make a꞉nda꞉ peliaasa꞉eki make iki pa꞉ta꞉ kina꞉e.

3 Nika꞉ kametonuo. Iki pa꞉ta꞉ hone witolo hata꞉ Koda꞉ pa꞉ta꞉ keiyae pi lo hamonoe. Ota꞉ dupiki pi lo haloma꞉ ekina꞉ teketa꞉ ika꞉ hone tulaleme ekita꞉ ota꞉ anekema꞉ daela꞉me. Kutupa mo ika꞉ pukima꞉ homa꞉ alualu pelemeeki make daeya tieke ya꞉la꞉me. 4 Koto peleme ekina꞉ nikita꞉ mo siosi paeyao pa꞉ta꞉manu ta꞉na꞉ma꞉ puki na hake hata꞉ ika꞉ pi lawao haloma꞉me. Ika꞉ pi lawaasome ekita꞉ ika꞉ a꞉nda꞉ tunkuliki halima꞉ iki tekipuleke laaseme ekimanu make mandane ka꞉nda꞉ peaasa꞉ haumanu tukiki pa꞉ta꞉ tonka꞉na꞉ ikana꞉ma꞉ taka꞉lao hata꞉ hone tu alo haleme ekina꞉ lawaasoma꞉me.

5 Koto pu haleme hau manuta꞉ Koda꞉ma꞉ niki tikitiki yao telipealo pa꞉la꞉eki peneme yaasa꞉eki doe. Ikana꞉ma꞉ mo Koda꞉na꞉ Kilu Tombuao Hala꞉eki mea tialuekema꞉ do ka꞉nda꞉ pa꞉la꞉ ekimanu mea tu haleme ekina꞉ yenkita꞉ kota꞉ pa Koda꞉ma꞉ iki ipika꞉ Kilu Tombuao Hala꞉ alena꞉ tukiki pa꞉ta꞉ hamena꞉ ipikana꞉ma꞉ iki ana꞉na꞉ ana꞉ lalieke. 6 Koda꞉ma꞉ pulu pa꞉la꞉ hauta꞉ ota꞉ tikitiki hau pilieke. Kutupa mo iki pa꞉ta꞉ ka꞉nda꞉ma꞉ homaasa꞉ hau pimi wanda꞉hali pa꞉ta꞉ ipikana꞉ma꞉ iki make ka꞉nda꞉ma꞉ homawalieke. 7 Kutupa iki niki paeyaona꞉ ka꞉nda꞉ pa꞉la꞉eki ipikana꞉ma꞉ yoka꞉ mea baalieke. Koda꞉ma꞉ kutu piki hauta꞉ Tekehali Yesu ipika꞉ honkopu tieke haasa꞉ enisolomanu tonka꞉na꞉ hepeni mina꞉pa꞉lao opolo epemeka꞉na꞉ kutu pilieke. 8 Kota꞉ ikana꞉ma꞉ta꞉ Koda꞉ hone na pa꞉la꞉ wanda꞉hali make Tekehali Yesuna꞉ Pi Seliapo na opiki wanda꞉hali make ika꞉ hoke yenki haluekema꞉ ti uleke talo talo haena꞉ ipilimikie. 9 Koto wanda꞉hali ika꞉ tanda pa꞉la꞉ yenkita꞉ dupa. Hoetolo hoetolo haena꞉ hao halimikie. Koto ekina꞉ Tekehali ame̱le̱ make ipika꞉ honkopu seliapo haasa꞉eki taapuna꞉ na hake tekilipa hao halimikie. 10 Mo ponka꞉di pilu wieke nate opolo epea꞉ka꞉na꞉ta꞉ Tekehalina꞉ wanda꞉hali paeyaoma꞉ ipiki biki yeiya꞉ laena꞉ make ipiki pa꞉ta꞉ hone tulaaseme wanda꞉halima꞉ ipiki pa꞉ta꞉ ta꞉na꞉ma꞉ homena꞉yeke Tekehali ipilieke. Nikana꞉ma꞉ iki pa꞉ta꞉ waloma꞉ opua꞉ hone tulao haeme ekina꞉ iki make mo hande wanda꞉hali ame̱le̱ mandakena꞉ mombilimikie.

11 Nikana꞉ma꞉ koto ekina꞉ hone witolo hata꞉ Koda꞉ pa꞉ta꞉ ikina꞉ yeni peawao haloma꞉me. Koda꞉ma꞉ ipika꞉ hau ikana꞉ma꞉ puemena꞉ wi lea꞉ ekina꞉ ikana꞉ma꞉ koto tupa꞉ ota꞉ ana꞉na꞉ hamena꞉ lena꞉ Koda꞉ pa꞉ta꞉ meme pea yeni peawao haloma꞉me. Koda꞉ma꞉ ikana꞉ma꞉ epeke haumanu puluekema꞉ witeleme hone paeyao ipika꞉ welema꞉ puemena꞉ lena꞉ kutupa make ika꞉ hone tulaaso pitelemeeki pu paeyawaena꞉ yeni peawao haloma꞉me. 12 Koda꞉ma꞉ kutu pia꞉ka꞉na꞉ta꞉ ikana꞉ma꞉ nika꞉ Tekehali Yesuna꞉ biki yeiya꞉ lalimikie. Kutupa ipikana꞉ma꞉ iki make kutu pilieke. Kutupa nika꞉ Koda꞉ make Tekehali Yesu Ketiso ipilika꞉ a꞉ta꞉ma꞉ homolo tamba꞉ minelepe ekima꞉ta꞉ koto tupa꞉ pilipipikie.