1 Penga niyan, timindeg se kedita dan netipon, aw nengibing dan ki Jesus doton te gobirnador si Pilato. 2 Migdimanda dan tepad ki Jesus, kagi dan, “Kinità day se otaw seini megsamok peden te pongan day, so migtoladà sikandin te eked kepakay aw mayad kay te mihoras diyà te gobirno te Roma. Migpelingo-lingo heman sikandin Misiyas, sìyan selotan lomowan kenami.”

3 Mig-insà si Pilato diyà kandin, “Sikona lay se Selotan te menge Judiyo?”

Timaba si Jesus, “Ee. Benal se kagi nikaw.”

4 Minikagi si Pilato diyà te menge pengolo te simbahan aw doma otaw netipon kidoen, “Wedad palos salà te otaw seini kinità ko.”

5 Meneng labi dan pa migleges kandin, kagi dan, “Gayed sikandin egsamok te kedita te otaw, so yan se ipegtoladà din kidoen te kebelad te Judiya, lekat te Galiliya taman dini.”

6 Pegdineg i Pilato kenyan, mig-insà kandan aw si Jesus se sakop te probinsya te Galiliya. 7 Pegketaga-taga din te lekat si Jesus te probinsya nesekopan i Herod, impeibing din doton kandin, so kidoen heman si Herod te Jerusalem te aldaw sìyan. 8 Pegkità i Herod ki Jesus, ontò neluba, so tapay den sikandin dimineg tepad ki Jesus, aw nenamay den te ibeg din komità kandin aw menge kepelahan inangen i Jesus. 9 Yan se doun te medita se in-insà i Herod diyà ki Jesus, meneng wedà palos taba. 10 Migpedapag se menge pengolo te simbahan aw menenoladà te punù, aw neopal dan migdimanda tepad kandin. 11 Gayed nebebayat si Herod aw kedita te sondalo din, aw migpelingo-lingo dan te pegsagman dan kandin iling te pegsagman dan te selotan. Penga niyan, pineseolan i Herod si Jesus te ontò mèpiya saol iling te ekasan te selotan, aw impelikò din doton ki Pilato. 12 Pineokit kenyan, migpesigelakay si Herod aw si Pilato, so tapay dan egpedindilay.

13 Nayan, migtipon si Pilato te kedita te pengolo te simbahan, aw menge obanen te Judiyo aw otaw netipon kidoen. 14 Minikagi sikandin, “Pegpengibing niyo te otaw seini dini kanak, minikagi kaw te migsamok sikandin te kedita te otaw. Na, kinità niyo den te mig-insà a kandin, meneng wedad palos salà din kinità ko iling te indimanda niyo tepad kandin. 15 Wedad heman salà din kinità i Herod, so impelikò din sikandin dini kenitadon. Na, eneng-enengi niyo ini. Wedad palos ininang din te mepakay sikandin ipelumun aw imetayan. 16 Yan se doun te olò ko sikandin ipebadas, aw penga niyan ipelowà.”

[ 17 Nayan, kelikit te Pista te Pegpelowà, gayed ipelowà din diyà kandan se sebad otaw kineleboso.] 18 Meneng migbelobansag se kedita dan, “Imetayi se otaw seini. Pelowai si Barabas.”

19 Na, si Barabas se nekeleboso pa, so sikandin se pengolo te otaw minato te gobirno kidoen te Jerusalem, aw doen heman otaw inimetayan din.

20 Ibeg i Pilato megpelowà ki Jesus, aw yan todà din dan inikegiyan. 21 Meneng migbelobansag dan, “Imetayi sikandin. Lensangi diyà te kros.”

22 Te iketelo peg-ikagi i Pilato, minikagi sikandin, “Meneng wedad palos medaet ininang din. Wedad palos salà din kinità ko te mepakay sikandin ipelumun aw imetayan. Yan se doun te olò ko sikandin ipebadas, aw penga niyan ipelowà.”

23 Meneng gayed dan migbelobansag te dakel se kagi dan, so ontò dan ibeg te keilangan ilansang sikandin diyà te kros amon matay. Yan dinaeg dan si Pilato, so ontò dakel se kagi dan. 24 Penga niyan, minikagi si Pilato te tomanen din se ibeg dan. 25 Yan impelowà din lekat te keleboso se otaw pinemallì dan, sìyan otaw minato te gobirno aw nemonò. Meneng si Jesus se impeibing din amon imetayan, so yan se ibeg dan.

26 Penga niyan, inibing te sondalo si Jesus lekat te balay i Pilato. Kidoen te dalan, kinità dan se tege Sirene ngadan din si Simon kaling dimateng lekat te saka. Lineges dan sikandin neniang te kros aw timetondog ki Jesus.

27 Ontò medita se otaw timaking ki Jesus, aw medita heman se bayi ontò migkelag tandà te lano dan kandin. 28 Meneng miniling si Jesus aw minikagi, “Sikiyo bayi tege Jerusalem, ikà niyo egkelag tandà te kelimahan domateng diyà kanak. Meneng keilangan megkelag kaw tandà te kelimahan metoman domateng diyà kenyo aw menge batà niyo. 29 Penenalan kaw kanak. Doen aldaw domateng aw mikagi se otaw te labi pa meluba se menge bayi wedad palos batà dan. 30 Te aldaw sìyan, tomawal se otaw diyà te menge bontod, kagi dan, ‘Bonboni kay niyo. Imetayi kay niyo.’ 31 Aw medaet se kelimahan dimateng den diyà kanak pengkey wedad salà ko, labi pa medaet se kelimahan domateng diyà te otaw doen salà te modi aldaw.”

32 Dowa heman se doma otaw inibing dan amon imetayan doma din, so ontò medaet se ininang dan. 33 Pegdateng dan doton te bontod iningedanan Tòlan te Olo, inlansang dan sikandin diyà te kros. Inlansang heman se dowa otaw medaet kidoen te tangkil din, aw si Jesus diyà te tengà-tengà. 34 Migtawal-tawal si Jesus tepad te menge otaw miglansang kandin diyà te kros, kagi din, “Amà, pegwedadi se salà dan, so wedà dan ketegahi aw eden se ininang dan seini.”

Penga te peglansang dan ki Jesus diyà te kros, pigtalad-talad dan se penenaktun linowas din, aw migbonot dan aw eden se penenaktun meabat te teg sebad-sebad kandan. 35 Timengteng kandin se kedita te otaw netipon kidoen. Meneng se menge obanen te Judiyo, migbaet-baet dan kandin, kagi dan, “Migtabang sikandin te doma otaw netigdaan amon eked dan pa kematay. Kitaen tadon den aw meketabang sikandin te kandin pegkeotawun amon eked kematay. Kitaen tadon heman aw benal sikandin se Misiyas insogò te Timanem, sìyan tapay pinemallì din.”

36 Migtompuyus heman se menge sondalo kandin. Dimoton dan kandin amon ipeinem dan kandin se bino sinengedan te wayeg. 37 Minikagi dan, “Aw ontò ka Selotan te menge Judiyo, tebangi se kamno pegkeotawun.”

38 Doen heman solat insawol doton diatas te olo din, kagi niyan, “Seini se Selotan te menge Judiyo.”

39 Se sebad otaw medaet impetangkil ki Jesus, migtompuyus sikandin, kagi din, “Petega-tegahi kay te ontò ka Misiyas. Tebangi se kamno pegkeotawun, aw tebangi kay heman.”

40 Meneng migsagda se sebad, kagi din, “Ikà egtompuyus te Timanem. Keilangan megselsel ka diyà te Timanem, so onawa se pelumun dimateng den diyà kenitadon. 41 Keilangan ipelumun ki den, so yan se detengan te medaet ininang ta. Meneng wedad palos medaet ininang te doma ta seini.”

42 Penga niyan, minikagi sikandin diyà ki Jesus, “Keidowi a bag aw lomowan ka.”

43 Minikagi si Jesus, “Eneng-enengi se kagi ko kamno. Kwani seini, megdoma ka kanak doton te langit.”

44 Pegkealas dosi te aldaw, migkengitngit se langit aw tanà lamig alas tris te meapon, 45 so wedà senang se aldaw. Tigkan heman nelisì se kayad kidoen te tengà-tengà te dakel simbahan te Jerusalem. 46 Penga niyan, timawal si Jesus te dakel se kagi din, “Amà, isalig ko den se pedowan ko diyà kamno.”

Penga te peg-ikagi din kenyan, nematay sikandin.

47 Kinità te kapitan te sondalo se kepelahan neinang te pegkematay i Jesus, aw dimuyun sikandin te Timanem, kagi din, “Ontò mèpiya se otaw sìyan.”

48 Nayan, se kedita te otaw netipon kidoen, pegkità dan te kedita niyan neinang, migsiolì dan aw dinapì dan se kagpa dan tandà te lano dan. 49 Meneng se kedita te sigalak i Jesus aw menge bayi timaking kandin lekat te Galiliya, timindeg dan te kenà mediyò te kros, aw kinità dan se ininang kandin.

50-51 Nayan, doen otaw si Jose tege Arimatiya sakop te probinsya te Judiya. Mèpiya otaw sikandin, aw gayed eg-inang te metòlid, aw egpeliman te peglowan te Timanem. Pengkey sikandin se sebad obanen diyà te menge obanen eglowan diyà te menge Judiyo, meneng wedà tandù diyà te medaet piglalang te menge doma din obanen, sìyan ininang den dan diyà ki Jesus. 52 Dimoton sikandin ki Pilato aw pinemoyò din se lawa i Jesus amon ilebeng din. 53 Penga niyan, inabat din se lawa lekat te kros, aw ginakes din iyan te sapot, aw inlebeng din kidoen te lebeng kaling ininang diyà te pangpang, aw wedad pa palos inlebeng. 54 Agpet den somallep se aldaw, aw keeldawan niyan se Sebado aw aldaw te peg-etod.

55 Peglebeng i Jose ki Jesus, timelokon heman se menge bayi timaking ki Jesus lekat te Galiliya. Kinità dan heman se lebeng aw pegsawol te lawa din kidoen. 56 Penga niyan, minolì dan aw migtegilan dan te menge kemolò te lana metinadeg isawol dan diyà te lawa te nematay. Aldaw te Sebado, mig-etod dan, so yan se punù ingkeliwat i Moises.