1 Ji dunba tamin kɔ, Nuhan dencɛilu Sɛmu ni Kamu ni Jafɛti ka dencɛilu sɔrɔn. Alu bɔnsɔn le ɲin di.

2 Jafɛti dencɛilu le ten: Komɛri, Makɔki, Madayi, Jaban, Tubali, Mesɛki a ni Tirasi. 3 Komɛri dencɛilu le Asikɛnasi, ni Rifati ni Tokarima ri. 4 Jaban dencɛilu le ten: Elisiya, Tarisisi, Kitimu a ni Dodanimu. 5 Jaban bɔnsɔn jɛnsɛnda ka wa i sii kɔɔji da la, a bɛɛ ni a la duu, a bɛɛ ni a la kuma kan, a bɛɛ ni a mɔɔilu, a bɛɛ ni a la jamana.

6 Kamu dencɛilu le ten: Kusi, Misiran, Puti a ni Kanaan. 7 Kusi dencɛilu le ten: Saba, Habila, Sabita, Rayema a ni Sabiteka. Rayema dencɛilu le Seba ni Dedan di. 8 Kusi dencɛ do le Namurudu ri. Wo le fɔlɔ kɛra fankatii ri duukolo kan. 9 A kɛra donso fadimanba ri Allabatala ɲana. Wo rɔ a ye fɔla doilu ma ko: «A kɛni donso fadimanba le ri, Allabatala ɲakɔrɔ iko Namurudu tɛrɛ ɲa mɛn ma.» 10 Namurudu kɛra faama ri. A fɔlɔma le ka a sii Babɛli ni Erɛki ni Akadi soilu kun na. So sawa wo bɛɛ tɛrɛ Sineyari jamana le rɔ. 11 A bɔra jamana wo rɔ ka wa Asiri jamana rɔ. A ka Ninibe ni Rehobotiri ni Kalasi 12 ni Resɛni soilu sii ka alu lɔ. Resɛni ye Ninibe ni Kalasi so fila le tɛ. So ba le wo ri.

13 Misiran kɛra mɛnilu benba ri, woilu le ten: Ludi bɔnsɔn, Anamu bɔnsɔn, Lehabi bɔnsɔn, Nafitu bɔnsɔn, 14 Paturusi bɔnsɔn, Kafitori bɔnsɔn a ni Kasiluhi bɔnsɔn. Filisitilu bɔra Kasiluhi bɔnsɔn le rɔ.

15 Kanaan dencɛ fɔlɔ le tɛrɛ Sidɔn di, ka Hɛti tuun wo la. 16-18 Mɔɔ mɛnilu fanan bɔra Kanaan dɔ, woilu le ten: Jebusikailu, Amɔrikailu, Kirikasikailu, Hifikailu, Arikiilu, Sinikailu, Arifadikailu, Semarikailu a ni Hamarikailu.

Kanaan bɔnsɔn jɛnsɛnda. 19 Alu la jamana ye damirala Sidɔn de ka wa Kerari fan fɛ, ka wa se foo Kasa. A ye wala Sɔdɔmu ni Kɔmɔri ni Adima ni Seboyimu fan fɛ, ka wa se foo Lesa. 20 Kamu bɔnsɔn de woilu ri, a bɛɛ ni a la mɔɔilu, a bɛɛ ni a kuma kan, a bɛɛ ni a la duu, a bɛɛ ni a la jamana.

21 Jafɛti kɔrɔcɛ Sɛmu fanan ka dencɛilu sɔrɔn. Sɛmu wo le kɛra Hebɛri bɔnsɔn bɛɛ benba ri. 22 Sɛmu dencɛilu le ten: Elamu, Asuri, Aripasadi, Ludi a ni Aramu. 23 Aramu dencɛilu le ten: Usi, Huli, Ketari a ni Masi. 24 Aripasadi wo ka Selasi sɔrɔn. Selasi ka Hebɛri sɔrɔn. 25 Hebɛri ka dencɛ fila sɔrɔn. Kelen tɔɔ ko Pelɛji ka a masɔrɔn duukolo ratalara a tele le rɔ. A doocɛ tɔɔ ko Jokitan. 26-29 Jokitan dencɛilu le ten: Alimodadi, Selɛfu, Hasamawɛti, Jeraki, Hadoramu, Usali, Dikila, Obali, Abimayɛli, Seba, Ofiri, Habila a ni Jobabu. Nba, woilu bɛɛ tɛrɛ Jokitan dencɛilu le ri. 30 Duu mɛn ye Mesa ni Sefari tɛ, alu ta le tɛrɛ wo bɛɛ ri. Yɔrɔ wo ye koyinkɛilu kɔrɔ telebɔ fan fɛ. 31 Nba woilu bɛɛ kɛra Sɛmu deni le ri, a bɛɛ ni a la mɔɔilu, a bɛɛ ni a la kuma kan, a bɛɛ ni a la duu, a bɛɛ ni a la jamana.

32 Nba, Nuhan dencɛilu bɔnsɔn de woilu ri, a bɛɛ ni a bɔnsɔn, a bɛɛ ni a jamana. Mɔɔ woilu le jɛnsɛnda ka kɛ jamana siyaman di duukolo kan ji dunba kɔ.