1 Nba, Allabatala ka a fɔ Nuhan yɛ ko: «I ye don kulunba kɔndɔ, i ni i la denbaya. N da a yen ko i kelenpe le telenni n ɲakɔrɔ adamaden bɛɛ tɛma. 2 I ye sobo seniman suu bɛɛ ta i fɛ, a cɛman wɔrɔnwula ni a musoman wɔrɔnwula. Sobo mɛn seniman tɛ, i ye wo suu bɛɛ fanan ta, cɛman kelen ni musoman kelen. 3 I ye kɔnɔ suu bɛɛ fanan ta, cɛman wɔrɔnwula ni musoman wɔrɔnwula, sa alu siya kana tunu duukolo kan. 4 A ra to tele wɔrɔnwula ma. Wo wa dafa, n di sanci lana duukolo kan. Sanci wo ri tele binaanin ni su binaanin kɛ nali la. Wo ri kɛ sababu ri. Fen mɛnilu danni n bolo, wo bɛɛ ri halaki ka bɔ duu kan.» 5 Allabatala ka Nuhan jamari ko ko la, a ka wo bɛɛ kɛ.

6 Nba, ka a tɛrɛn Nuhan sɔrɔn da san kɛmɛ wɔɔrɔ bɔ, ji dunba nara duukolo kan. 7 Nuhan ni a dencɛilu ni a muso ni a dencɛilu musoilu, alu bɛɛ donda kulunba kɔndɔ kosa alu ri kisi ji dunba ma. 8 Wo lon, sobo mɛnilu seniman a ni mɛnilu seniman tɛ, a ni kɔnɔilu ni nimafen misɛn mɛnilu ye taamala duu ma, 9 wo bɛɛ fila fila nara Nuhan ma, a cɛman ni a musoman. Alu bɛɛ donda kulunba kɔndɔ, iko Alla ka Nuhan jamari ɲa mɛn ma. 10 A tele wɔrɔnwulana, sanci nara duukolo kan.

11 Nuhan sɔrɔn san kɛmɛ wɔɔrɔna, wo karo filana tele tan ni wɔrɔnwulana, ji bondon mɛn ye duu kɔrɔ, wo tera ka ji bɔn duu kan. Sankolo ji bondon fanan da lakara. 12 Wo rɔ, sanci ba nara duu kan. A ka tele binaanin ni su binaanin kɛ, a ma tɛɛ. 13 Sanci nara lon mɛn, wo lon kelen Nuhan ni a dencɛilu donda kulunba kɔndɔ. A dencɛilu le tɛrɛ Sɛmu ni Kamu ni Jafɛti ri. Nuhan muso donda alu fɛ, a ni a dencɛilu muso sawa. 14 Nimafen suu bɛɛ donda kulunba kɔndɔ alu fɛ. Waa rɔ soboilu wo, kolofenilu wo, nimafen misɛn mɛnilu ye taamala duu ma, a ni kɔnɔilu wo, kawa ye fen fen na, woilu suu bɛɛ donda. 15 Nba, fen fen ye a nilakilila, wo bɛɛ fila fila donda kulunba kɔndɔ Nuhan fɛ. 16 Nimafen suu bɛɛ donda, cɛman ni musoman, ikomin Alla ka jamarili kɛ ɲa mɛn ma. Alu bɛɛ donda tuma mɛn na, Allabatala ka kulunba da tuun Nuhan ma.

17 Nba, sanci ka tele binaanin kɛ, a ye nala duukolo kan. Ji siyayara ka kɛ ji dunba ri, ka kulunba kɔrɔta ka bɔ duu ma. 18 Ji yɛlɛra ka siyaya kosɛbɛ. Kulunba funda ji kan ka wa. 19 Ji tora yɛlɛla kojuuya foo ka koyinkɛ bɛɛ latunun fan bɛɛ san kɔrɔ. 20 Ji yɛlɛra koyinkɛ woilu kun na ka se fo nɔnkɔn ɲa tan ni loolu, ka koyinkɛ latunun fewu! 21 Nimafen bɛɛ faara duukolo kan. Kɔnɔilu wo, kolofenilu wo, waa rɔ soboilu wo, nimafen misɛnilu wo, mɛnilu ye taamala duu ma, mɔɔilu wo, alu bɛɛ faara. 22 Fen fen ye duukolo kan, ni a ye a nilakilila, wo bɛɛ faara. 23 Allabatala ka duukolo nimafen bɛɛ halaki wo ɲa le ma. Mɔɔilu wo, soboilu wo, kɔnɔilu wo, ni nimafen misɛn mɛnilu ye taamala duu ma, alu bɛɛ halakira ka bɔ duukolo kan. A tora Nuhan dɔrɔn de ma, a ni mɛnilu tɛrɛ a kun kulunba kɔndɔ. 24 Ji ka tele kɛmɛ ni biloolu kɛ duukolo kan, a ma majii.