Be ta mluu Jesucristo ndoꞌ Juan, be ta tilaw yoo
Leꞌa dub angel ten Dios mluu ndoꞌ Juan be ta tlaw yoo zha na yamer initndoꞌ gizhliyo ncho nat, no xteꞌe gak tiemp inibeꞌe Dios. No ndab Dios ná xtaꞌan ukeꞌa Juan ndoꞌ isagaꞌad xkwaꞌa be xmen Cristo ndencho sa siꞌil nsaleaꞌ Asia, ndab Dios be ta wen ndun bexa no be ta lid leꞌa nak ndun bexa. Leꞌa gal be wizh lult leꞌa Dios utsaksi itea bexa na mbin be ta ugap, no yunchaꞌaw Dios itea be taꞌa. Leꞌa Apocalipsis ndadiꞌizh leꞌa Jesucristo uzheꞌeb ndap juers no uzheꞌeb siꞌil nak xa idub tiemp. No ndab‑a xteꞌe ilen Cristo unitndoꞌ xa itea be ta ugap nak, no leꞌa xa inibeꞌe.
1
Jesucristo mluu ndoꞌ Juan be ta tilaw yoo
1 Leꞌa sa ndee nkeaniꞌi be ta mluu Dios ndoꞌ Jesucristo, ndontsa uluu xa ndoꞌ bexa ndun tiꞌin ndoꞌ xa be ta sken yoo. Leꞌa Jesucristo cha mtuꞌub dub angel mbid uluu‑yá ndoꞌ naꞌ xa nsaleaꞌ Juan, dub xa ndun tiꞌin ndoꞌ Cristo. 2 Ta ugeaka gáp naꞌ leꞌa be ta uní naꞌ wa ta tenka Dios, no leꞌaka Jesucristo mluu ta wa ndoꞌ naꞌ. 3 Uzhebpa wen yoo ladna bexa na goꞌol be diꞌizh ten Dios ndee no isakyoꞌón bexa‑yá, leꞌa tiemp yoo be ta wa sken ilen.
Juan nidiꞌizh ndoꞌ be xmen Dios ndencho isagaꞌad gezh
4 Leꞌa naꞌ ndee Juan nidiꞌizh ndoꞌ bego nak isagaꞌad xkwaꞌa be xmen Jesucristo ndencho Asia. Leꞌa Dios xa na leꞌaka nak Dios nat no polta no idub tiemp ilen ndee, no isagaꞌad espíritu nde ndoꞌ sa nsob Dios, leꞌa bexa wa utsin gak ndoꞌ bega no gun bexa wen yoo ladna bega. 5 No Jesucristo li gun, leꞌa xa wa gaꞌal mluu xteꞌe wen nak Dios, no ndon ned xa mbin gan ndoꞌ gealgut, no leꞌa xa nak xa nibeꞌe ndoꞌ itea bexa nibeꞌe ndoꞌ gizhliyo. Leꞌa xa wa nkweaꞌ ladna beuna no mtsambiꞌi xa ladoꞌo beuna ndoꞌ be ke ten beuna no ten ten xa. 6 No myunno xa beuna dub xa nibeꞌe no dub uleꞌay ndun tiꞌin ndoꞌ Dios Xus xa. Idub tiemp yankea beuna Cristo xa ndon leꞌa nibeꞌe. Lika nak‑a.
7 Blaꞌach bega leꞌa xa ilen ndoꞌ xkaw,
nsea itea be men iniꞌí xa,
gast no bexa ndap ke mbit xa wa.
Nsea itea be ras men nde ndoꞌ gizhliyo
uzheꞌeb goꞌonno xa.
Ta ugeaka lika gak‑a.
8 Leꞌa Cristo Xa Nibeꞌe wa xa ndon leꞌa juert nak ndab: “Leꞌa naꞌ ndee nak Alfa nsea Omega. Nak naꞌ xa ned nsea xa lult ndoꞌ itea be taꞌa.” Leꞌa xa wa leꞌaka nak Dios nat no polta no idub tiemp ilen ndee.
Cristo mlundoꞌ ndoꞌ Juan
9 Leꞌa naꞌ ndee Juan nak beuna xmen Jesucristo. Leꞌa naꞌ nsatid gealkweaꞌ lak nsatid bega‑yá. No nak beuna bexa nibeꞌe Dios, no ndakno Jesucristo beuna nchaꞌuxik beuna ndoꞌ be gealkweaꞌ. Leꞌa ke na ndadiꞌizh naꞌ diꞌizh ten Dios, no ndadiꞌizh naꞌ xteꞌe nak ta ndun Jesucristo, ta weꞌe mtsaꞌab be men naꞌ isla nsaleaꞌ Patmos cuent dub xa nkea litgiꞌib. 10 Leꞌa ngol dub wizh doming leꞌa Espíritu ten Dios usen naꞌ. Cha weꞌe leꞌa lad tsoꞌo naꞌ mbín naꞌ dub ti men uzhebpa ugeꞌ cuent ti dub trompet, 11 ndab xa:
—Leꞌa naꞌ ndee nak Alfa nsea Omega, xa ned no xa lult ndoꞌ itea be taꞌa. Bkeꞌa ndoꞌ git be ta inaꞌ lu, cha btuꞌub‑a ndoꞌ isagaꞌad be gezh nde be xmen naꞌ sa nsaleaꞌ Asia. Leꞌa be gezh wa nsaleaꞌ Éfeso no Esmirna no Pérgamo no Tiatira no Sardis no Filadelfia nsea Laodicea.
12 Cha mgeaksoꞌ naꞌ lad tsoꞌo naꞌ, ná ton ta na li uníꞌi ndoꞌ naꞌ wa. Cha weꞌe uní naꞌ dub gaꞌad candeler ta oro. 13 Leꞌa tlaw be candeler wa uní naꞌ nsoꞌ dub xa cuent nluu dub men, nak xa dub lad koꞌol gast gendats xa ndakea‑yá. No nde dub sinch oro ta ladoꞌo xa. 14 Leꞌa gek xa no gichgek xa ndon nagud naꞌ, cuent naꞌ gich borreg ndon mbe xiꞌil naꞌ‑yá. Leꞌa be ngusndoꞌ xa cuent bealꞌ giꞌ naꞌ. 15 Leꞌa xoꞌo xa nduꞌu lak nduꞌu dub giꞌib guch ta bronce, dub ta tiꞌi utoꞌo len gor. Leꞌa ti xa ngen cuent sa nsalaꞌ kwaꞌal nits ndoꞌ dub geꞌdaꞌa. 16 Leꞌa ndoꞌ yaꞌa lad gaꞌal xa ndiꞌib dub gaꞌad ta cuent mbeal ndiꞌib gibeꞌa. Leꞌa toꞌo xa ntoꞌo dub spad top toꞌo na wach. Leꞌa idub ndoꞌ xa nluu cuent nluu wizh gor na uzhebpa ugiꞌi naꞌ bea.
17 Leꞌa gor uní naꞌ xa, cuent dub xa ngut ulayat naꞌ xan ndats xa. Leꞌa xa cha mxoꞌob yaꞌa lad gaꞌal xa tsoꞌo naꞌ, cha ndab xa:
—Lá izheb lu. Naꞌ leꞌa nak xa ned no xa lult ndoꞌ itea be taꞌa, 18 xa na nban. Leꞌa naꞌ ngut, parea leꞌa nat leꞌa naꞌ nban idub tiemp. No leꞌa naꞌ mas juert ndoꞌ gealgut no mas juert naꞌ ndoꞌ sa ndencho bexa ngut. 19 Bkeꞌa be ta uniꞌí lu wa no be ta ncho nat no be ta tilaw yoo. 20 Nat gáp naꞌ dub ta gol goꞌón lu, xteꞌe nak isagaꞌad mbeal ndiꞌib yaꞌa lad gaꞌal naꞌ ndee nsea isagaꞌad be candeler ndee wa: leꞌa isagaꞌad mbeal ndee nak isagaꞌad be angel nlaꞌach be xmen naꞌ ndencho isagaꞌad gezh wa; leꞌa isagaꞌad be candeler ta oro ta naꞌ lu ndee nak isagaꞌad xkwaꞌa be xmen na ndencho be gezh wa.