1 No ndab Jesús:

—Leꞌa naꞌ gáp ndoꞌ bego leꞌa ncho bexa nde ndee naꞌanpa cha gat gast iniꞌí bexa gal tiemp inibeꞌe Dios ndoꞌ gizhliyo no juers siꞌil ten xa.

2 Ngol sxoꞌop wizh leꞌa Jesús mbiꞌi Pedr no Jacob no Juan, ukea bexa dub bet gaꞌap sa naꞌan men. Leꞌa sa wa leꞌa Jesús cha mtixndoꞌ ndoꞌ gaꞌal bexa wa. 3 Leꞌa xab Jesús ndon nlaꞌbealꞌ no ndon mbe xiꞌil mnaꞌ‑yá, ni dub bexa nsat lad lá ndun gan lita mbe inaꞌ‑yá. 4 Zha leꞌa sa wa mlundoꞌ Elí no Moisés ndeyadiꞌizhno Jesús. 5 Weꞌe leꞌa Pedr cha ndab ndoꞌ Jesús:

—Mech, uzhebpa wen nde beuna sa ndee. Gundeꞌe besa chon ramad: dub‑a ná ten go, leꞌa stub‑a ná ten Moisés, nsea stub‑a ná ten Elí.

6 Leꞌa be xmen Jesús wa uzhebpa mzheb, ta weꞌe ngi li ndab Pedr. 7 Weꞌe leꞌa dub xkaw cha ulen sa nde bexa. Leꞌa lat xkaw wa ulen ti Dios ndab:

—Leꞌa ta ndee Xiꞌín naꞌ. Naꞌ nkweaꞌ ladna xa. Bsakyoꞌón bega ta ndab xa.

8 Cha uxax mwiꞌi be xmen Jesús gangeak, parea leꞌa sa wa yá naꞌanla ton ndebe, nabtsa Jesús nsoꞌ sa wa.

9 Leꞌa ngol gor na nchaꞌlayoꞌo bexa bet wa, leꞌa Jesús ndab ndoꞌ bexa:

—Naꞌan ton ndoꞌ ná gudiꞌizh bega ta na li uniꞌí bega wa, gast gal gor na leꞌa naꞌ, Xa Myak Men Ndoꞌ Gizhliyo, iban ndoꞌ gealgut.

10 Weꞌe leꞌa bexa wa lá ngudiꞌizh‑a, nabtsa yon bexa ndadiꞌizh, ndab bexa:

—¿Xteꞌe nak ta ndab xa leꞌa xa iban ndoꞌ gealgut zha?

11 Leꞌa bexa wa cha unabdiꞌizh ndab bexa ndoꞌ Jesús:

—¿Xtaꞌan ndab be mech ten ley leꞌa Elí ned ilen, weꞌeta ilen Cristo xa utuꞌub Dios zha?

12 Leꞌa Jesús cha ukaꞌab ndab:

—Ta ugeaka leꞌa Elí nedka ilen ndontsa list kwe be men. Leꞌa lak nkeaniꞌi diꞌizh ten Dios, leꞌa naꞌ, Xa Myak Men Ndoꞌ Gizhliyo, sianpa gealkweaꞌ iní, no uxelad be men naꞌ. 13 Leꞌa naꞌ gáp ndoꞌ bega, leꞌa Elí wa mbiꞌidla. Ná leꞌa be men ugap mbinno xa lakta nlad bexa, lakka nkeaniꞌi diꞌizh ten Dios cuent ten xa wa.

14 Leꞌa gor na myach Jesús no schon xmen xa sa nde staplaga xmen xa wa, weꞌe leꞌa bexa uniꞌíla leꞌa be men kwaꞌad ndela wats bexa wa. Leꞌa be mech ten ley ndeyotoꞌono stapla be xmen Jesús. 15 Leꞌa gor uniꞌí be men wa Jesús cha ngwanseana bexa, cha uxax ngwaꞌinidiꞌizh bexa ndoꞌ Jesús. 16 Leꞌa Jesús cha unabdiꞌizh ndab:

—¿Xtaꞌan ndeyotoꞌo bega zha?

17 Leꞌa dub xabgiꞌi ukaꞌab ndab:

—Mech, leꞌa naꞌ ndee ndalno dub meꞌed bgiꞌi ten naꞌ ncho mbi bxin len ladoꞌo na. Leꞌa mbi bxin wa leꞌa mbin mud meꞌed. 18 Leꞌa gor na nsen mbi bxin meꞌed baꞌ, leꞌa meꞌed nlayat, nsea nlen bchiꞌin toꞌo meꞌed, no ndaw meꞌed ndeay meꞌed, cha lá nteꞌalta meꞌed. Leꞌa naꞌ unaꞌab ndoꞌ be xmen ga kontuꞌub mbi bxin wa, ná leꞌa bexa lá ngun gan.

19 Leꞌa Jesús cha ndab ndoꞌ be men wa:

—¡Ndidotsa ngeꞌ ladna bega Dios! ¿Ploxá tiemp yoꞌo naꞌ lat bega zhaga? ¿Sta ploxá tiemp uxik naꞌ ndoꞌ bega zhaga? Utseano bega meꞌed bgiꞌi baꞌ sa ndee.

20 Weꞌe cha mbiꞌi bexa meꞌed wa wats Jesús. Leꞌa gor na uniꞌí mbi bxin wa Jesús, leꞌa ta wa cha udingeꞌ meꞌed wa ndoꞌ yo, naxbixte meꞌed, nsea toꞌo meꞌed cha ulen bchiꞌin. 21 Leꞌa Jesús cha unabdiꞌizh ndoꞌ xus meꞌed ndab xa:

—¿Polta ulen‑a zha?

Leꞌa xus meꞌed cha ndab:

—Zha tuzhta meꞌed baꞌ. 22 Sian biaj leꞌa mbi bxin ntsaꞌab meꞌed baꞌ ndoꞌ giꞌ no len nits, ndontsa gat meꞌed. Ná tal leꞌa ga sun gan, blats ladna go besa gokno ga besa.

23 Leꞌa Jesús cha ndab:

—¿Xteꞌe ndab lu “tal leꞌa ga sun gan”? Leꞌa xa na ndangea ladna Dios, itea taꞌa syoꞌo gan.

24 Weꞌe leꞌa xus meꞌed wa cha ugeꞌ ndab:

—Naꞌ ndangeaka ladna Dios. Gokno ga naꞌ, ndontsa mas gungea lad naꞌ.

25 Leꞌa gor na uniꞌí Jesús kwaꞌadpa be men nseabewiꞌi, weꞌe cha uteyo Jesús mbi bxin wa ndab xa:

—Lu nak mbi bxin ndun ngwaꞌad no mud meꞌed ndee, gáp naꞌ ndoꞌ lu utoꞌo. Ni lá yachta lu len ladoꞌo meꞌed ndee.

26 Leꞌa mbi bxin wa cha uzheꞌeb utezhat, no mas ngotbixte meꞌed. Cha utoꞌo mbi bxin len ladoꞌo meꞌed wa. Leꞌa meꞌed wa cuent meꞌed ngut nax, gast kwaꞌad be men ndab leꞌa meꞌed wa ngutka. 27 Ná leꞌa Jesús cha usen yaꞌa meꞌed, cha ngwaste meꞌed.

28 Tsoꞌo wa uyoꞌo Jesús len dub niꞌi sa wa, cha unabdiꞌizh be xmen Jesús, ndab bexa ndoꞌ Jesús:

—¿Xtaꞌan lá ngun besa gan igontuꞌub besa mbi bxin baꞌ zha?

29 Leꞌa Jesús cha ndab:

—Leꞌa be ltsaꞌa mbi bxin wa lá yoo gan itoꞌo xagaꞌ, nkiꞌin lá gaw bega dub tiemp no mas gudiꞌizhno bega Dios ndontsa sun bega gan kontuꞌub bega be mbi bxin wa.

30 Leꞌa gor na mkaꞌan bexa sa wa, cha nchaꞌtid bexa distrit Galilea. Ná leꞌa Jesús lá nlad iniꞌí be men leꞌa bexa ndesea sa wa, 31 geal leꞌa Jesús nluu be xmen na, ndab xa:

—Leꞌa naꞌ, Xa Myak Men Ndoꞌ Gizhliyo, yak cuent ndoꞌ yaꞌa be men. Leꞌa bexa wa gut naꞌ, parea gal wizh yon leꞌa naꞌ iban ndoꞌ gealgut.

32 Leꞌa bexa wa ni lá yakbeꞌena ta ndab xa wa, ná leꞌa bexa nzheb inabdiꞌizhta xteꞌe gab ta wa.

33 Cha ulayaꞌ bexa Capernaum mlanseaꞌ bexa ta niꞌi. Cha unabdiꞌizh Jesús ndoꞌ be xmen xa, ndab xa:

—¿Xtaꞌan nseabe yadiꞌizh bega nes wa zha?

34 Leꞌa bexa cha xetsa ute, geal leꞌa bexa nseaꞌbe yadiꞌizh ná ton mas nsak. 35 Leꞌa Jesús cha usob, cha utezh xa isatibtop bexa wa, cha ndab xa:

—Tal leꞌa dub bega nlad gak xa mas nsak, leꞌa xa wa nsabndoꞌ yak xa lult, no gun xa tiꞌin lat bega.

36 Cha usen Jesús dub meꞌed, cha msoꞌ xa meꞌed tlaw bexa, cha udiꞌid xa meꞌed wa, ndab xa:

37 —Leꞌa tal ton dub xmen naꞌ utsin gak xa ndoꞌ dub meꞌed nak cuent meꞌed ndee, leꞌa xa wa cuentkata ndoꞌ naꞌ utsin nak. Leꞌa xa na utsin nak ndoꞌ naꞌ wa, leꞌa xa wa utsinga nak ndoꞌ xa mtuꞌub naꞌ.

38 Leꞌa Juan cha ndab ndoꞌ Jesús:

—Mech, leꞌa besa uniꞌí dub men ndantiꞌin leaꞌ go gor na ngontuꞌub xa be mbi bxin. Ná leꞌa besa cha mka guntiꞌinta xa leaꞌ go, geal leꞌa xa naꞌanpa no nkeseano beuna.

39 Leꞌa Jesús cha ndab:

—Lá uka bega gun xa ta wa. Leꞌa tal ton dub xa ndantiꞌin lea naꞌ gun dub uyon, leꞌa xa wa naꞌanpa cha inisi naꞌ. 40 Leꞌa tal ton naꞌanpa ndakloo ndoꞌ beuna, leꞌa xa wa dubtsa nak no beuna. 41 No tal ton guntiꞌin lea naꞌ usaꞌa xa masa dub vas nits goo bega ta na nak bega xmen naꞌ, leꞌa naꞌ gáp ndoꞌ bega leꞌa Dios usaꞌaka ta wen nsabndoꞌ ikaꞌa xa wa.

42 ’Leꞌa tal ton utsabgix dub xa ndangea ladna naꞌ ndoꞌ ta ugap, leꞌa xa wa mas dub gealkweaꞌ siꞌil iniꞌí ndoꞌ dub xa nkea dub geꞌ siꞌil gen na, cha utsaꞌab be men xa len nitsdoꞌo. 43 Tal leꞌa dub yaꞌa bega utsabgix bega, ndi ulobtoꞌog bega‑yá. Mas wen yoo bega wats Dios moch bega, ndoꞌ itop yaꞌa bega yaꞌ bega infierno ndoꞌ giꞌ lá nyuꞌu, 44 sa na nde mgeas lá ndat, nsea giꞌ nunk lá nyuꞌu. 45 Ná tal leꞌa dub xoꞌo bega utsabgix bega, ndi ulobtoꞌog bega‑yá. Mas wen yoo bega wats Dios nsea dubtsa xoꞌo bega, ndoꞌ itop xoꞌo bega yaꞌ bega infierno ndoꞌ giꞌ naꞌanpa nyuꞌu, 46 sa na nde mgeas lá ndat, nsea giꞌ nunk lá nyuꞌu. 47 No tal leꞌa dub ngusndoꞌ bega utsabgix bega, uloꞌo bega‑yá. Mas wen yoo bega wats Dios nsea dubtsa ngusndoꞌ bega, ndoꞌ itop ngusndoꞌ bega cha yaꞌ bega infierno, 48 sa na nde mgeas lá ndat nsea giꞌ nunk lá nyuꞌu.

49 ’Leꞌa Dios guntiꞌin giꞌ ndontsa umbiꞌi gak bega ndoꞌ Dios, lak ndantiꞌin men sed gor na nsaꞌa xa man xnab ndoꞌ Dios. 50 Leꞌa sed dub ta wen, parea tal leꞌa sed itoꞌo ta utix ten na, ¿xteꞌema yak utix‑a stub biaj zha? Gok bega cuent sed utix, nsea utsin gok bega ndoꞌ be men ltsaꞌa bega.