77
Wa na jɔlɔgɔ ki ni, mi maa
Yɛnŋɛlɛ ma kagbɔgɔlɔ
ke sɛnrɛ yuun
Yɛnŋɛlɛ ma kagbɔgɔlɔ
ke sɛnrɛ yuun
1 Yurukɔɔlɔ to wi sɛwɛ yurugo, mbe yala Yedutun† 77.1: Yuuro 39.1 yurugo kɔlɔmɔ pi ni. Asafu Yɛnŋɛlɛ gbɔgɔyurugo.
2 Mi yɛn nala magala li yinrigi na gbele na Yɛnŋɛlɛ li yinri;
mi yɛn nala magala li yinrigi na Yɛnŋɛlɛ li yinri, jaŋgo li nuŋgbolo jan li logo na yeri.
3 Sanga ŋa ni mìla pye na jɔlɔ, mìla Yawe Yɛnŋɛlɛ li lagaja.
Yembinɛ li ni, mìla na kɛyɛn yi yirige wa naayeri na yɛnri li yeri, mi sila te;
mi sila yere ki na lere mbanla kotogo ki sogo na na.
4 Na mi kaa sɔnri Yɛnŋɛlɛ li wogo ki na, mi maa jɛɛn;
na mi kaa jatere piin li wogo ki na, na nawa pi ma tanga na na.
Wɔnmatigiwɛn laga.
5 Yɛnŋɛlɛ, mà ti a wɔnlɔwɔ pi gbaanri na na;
na jatere wì piri na na, mi se ya mbe para naa.
6 Mi yɛn na sɔnri piliye yan yì toro faa yi wogo na;
konaa wagati titɔnlɔwɔ ŋa wì toro wa fafafa wi wogo na.
7 Yuuro nda mìla pye na koo, mi maa nawa tuun ti na yembinɛ;
mi maa jatere piin ki kagala ke na wa na nawa,
mi maa na yɛɛ yewe na yuun fɔ:
8 Naga yɛn ma, we Fɔ wì je we na fɔ sanga pyew wi le?
Naga yɛn ma, we kala li soo ndanla naa fɔnŋgɔ wi le?
9 Naga yɛn ma, wi kagbaraga ki kɔ we kan wi le?
Naga yɛn ma, sɛnrɛ woro wi yeri wi yo we kan naa, sanga pyew fɔ tetete wi le?
10 Naga yɛn ma, Yɛnŋɛlɛ li fɛgɛ mbaa we yinriwɛ taa wi le?
Naga yɛn ma, wa li naŋgbanwa pi ni, li je mbaa we yinriwɛ taa wi le?
Wɔnmatigiwɛn laga.
11 Kona, a mì silan yɛɛ pye fɔ: «Ŋga ki yɛn nala jɔlɔ,
ko yɛn fɔ Yɛnŋɛlɛ na yaara ti ni fuun ti go na, li woro na yaraga ka kpɛ piin naa we kan.»
12 Mi yaa ka nawa to Yawe Yɛnŋɛlɛ ma kagbɔgɔlɔ ke na,
mi yaa kaa jatere piin ma kafɔnŋgɔlɔ ŋgele màa pye maga lɛ wa fafafa ke na.
13 Mi yaa ka ma kapyegele ke ni fuun ke jatere wi lɛ,
mi yaa ka sɔnri ma kagbɔgɔlɔ ke na.
14 E, Yɛnŋɛlɛ, ma koŋgolo ke yɛn kpoyi;
Yɛnŋɛlɛ liliin li yɛn ma gbɔgɔ paa mboro Yɛnŋɛlɛ ma yɛn?
15 Mboro ma yɛn Yɛnŋɛlɛ na li maa kafɔnŋgɔlɔ piin.
Mɔ̀ɔ yawa pi pye maa naga cɛngɛlɛ sanŋgala pe na† 77.15: Ɛki 15.11.
16 Mɔ̀ɔ woolo pe shɔ ma fanŋga ki ni,
poro mbele pe yɛn Zhakɔbu naa Zhozɛfu pe setirige piile wele.
Wɔnmatigiwɛn laga.
17 E, Yɛnŋɛlɛ, tɔnmɔ pìla ma yan.
Tɔnmɔ pìla ma yan ma yiri ma tin;
latijugo tɔnmɔ pìla yɛgɛyɛgɛ† 77.17: Ɛki 14.21.
18 Kambaara tìla tisaga lɛgɛrɛ kan fɔ jɛŋgɛ;
Yɛnŋɛlɛ làa wɔ, a yɛnŋɛlɛ gbaanra yiri,
ma yɛnŋɛlɛ yɛngɛlɛmɛ pìla pye na yɛngɛlɛ na kee paa wangala yɛn kɛɛ ki ni fuun ki na.
19 Ma yɛnŋɛlɛ gbaanra tìla yiri wa tifɛlinjolo li sɔgɔwɔ,
yɛnŋɛlɛ yɛngɛlɛmɛ pìla dunruya wi filige lagapyew pow;
tara tìla tigile fɔ ma yɛgɛ.
20 Màa ma konɔ li wɔ wa kɔgɔje wi nandogomɔ,
màa ma torosaga ki wɔ wa tɔnŋgbɔɔ pi nandogomɔ;
ɛɛn fɔ ma toroŋgɔlɔ, ma tuuro si yan.
21 Màa keli ma woolo pe yɛgɛ na pe yɛgɛ sinni paa simbaŋgbelege yɛn,
Moyisi naa Arɔn poro màa pye pe yɛkeele.