13
Izirayɛli woolo pe tɔngɔkala
1 Kìla pye, na Efirayimu cɛnlɛ woolo paga para, lere pyew wi maa fyɛ na seri.
Pàa pye cɛnsagbɔgɔ na wa Izirayɛli tara,
ɛɛn fɔ pè kajɔɔgɔ pye, naa pàa yarisunŋgo Baali ki gbɔgɔ we.
Kì pye ma, a pè ku.
2 Koni pe yɛn na ka tari pe kapere ti na na kee yɛgɛ.
Pe yɛn na pe warifuwe wi yanni na yaara yanlɛrɛ gbegele yarisunndo,
na yarisunndo gbegele ma yala pe yɛɛra jatere wi ni.
Ki yaara ti ni fuun ti yɛn kapyɔ jɛnfɛnnɛ poro tunŋgo.
Pe maa ki yuun ti wogo na fɔ:
«Yaa saara woo ki yarisunndo ti yeri.»
Mɛlɛ sɛnwee piile mbe sa ya paa kɛyɛn waa warifuwe napire yanlɛrɛ yɔlɔgɔ mbaa ti shari?
3 Ki kala na, pe yaa ka kɔ mbe wɔ wa paa pinliwɛ yɔn kambaaga yɛn,
paa pinliwɛ mɛŋgɛ yɛn, ŋga ki ma yangara ma wɔ wa,
paa yarilire sigire yɛn, nda tifɛlɛgɛ ki mari lɛ wa yarilire sunsaga ma kari ti ni,
paa wirige yɛn, ŋga ki maa yinrigi fenɛtiri ni na kee.
4 Ma si yala, muwi mi yɛn Yawe Yɛnŋɛlɛ, ye Yɛnŋɛlɛ le,
maga lɛ yè yiri wa Ezhipiti tara.
Yee Yɛnŋɛlɛ la yɛgɛ jɛn na mi ma.
Shɔfɔ wa yɛgɛ woro wa na mi ma.
5 Mi we, mi ye jɛn wa gbinri wi ni,
sanga ŋa ni yàa pye wa tara nda tɔnmɔ woro wa.
6 Ɛɛn fɔ, naa pàa ka saa yaakara ta,
a pè si ka ma tin.
Naa pàa kaa ka ma tin sanga ŋa ni, a pe nɛɛ pe yɛɛ gbogo.
Kì pye ma, a pè si fɛgɛ na na† 13.5-6: Dete 8.11-17.
7 Ki kala na, mi fun mi yaa pye pe yeri paa jara yɛn, mbaa tuun pe na,
mbe pye pe yeri paa kamɔlɔ yɛn,
ŋa wì lara na pe singi wa konɔ.
8 Mi yaa jangari mbe to pe na, paa yɛgɛ ŋga na cɛngɛ jɔ urusi paga ki pyɔ wi lɛ le ki tanla ki ma jangari we.
Mi yaa ka pe lara ti walagi,
mbe pe ka paa jara nɔ yɛn.
Yanyaara ti yaa ka pe kɔɔnlɔ yuroyuroyuro.
9 Yoro Izirayɛli woolo, pè ye tɔngɔ,
katugu yè yiri na kɔrɔgɔ;
yè yiri na kɔrɔgɔ, mi ŋa mbe ya mbe ye saga we.
10 Ye wunlunaŋa wi yɛn se yeri san?
Wi pan wi ye shɔ wa ye cara ti ni fuun ti ni ye!
Ye teele pe yɛn se yeri?
Poro mbele yàa pye naga yuun pe wogo na fɔ:
«Ki yaga ma wunlunaŋa naa teele kan we yeri.»
11 Mìla wunluwɔ kan ye yeri naŋgbanwa ni.
Mi yaa kaa shɔ ye yeri naŋgbanwa gbɔɔ ni† 13.11: 1 Sami 10.17-24; 15.26.
12 Efirayimu cɛnlɛ woolo pe kajɔɔgɔ ki yɛn ma gbegele ma tɛgɛ.
Pe kapege ki yɛn ma yɔnlɔgɔ ma tɛgɛ.
13 Jɔlɔgɔ yaa to pe na paa yɛgɛ ŋga na jɛlɛ selara ma kaa yiri wi ni we.
Pinambyɔ tijinliwɛ fu fɔ wi.
Wi sesanga wì pan ma gbɔn,
ɛɛn fɔ wi woro na jaa mbe yiri wa wi nɔ lara.
14 Naga yɛn ma, mi ŋa Yawe Yɛnŋɛlɛ, mbe yɛnlɛ mbe ki leele pe shɔ kuulo tara ti yeri le?
Mbe yɛnlɛ mbe pe shɔ kunwɔ pi ni le?
E kunwɔ, ma fanŋga ki yɛn se?
Kuulo tara, ma jɔgɔwɔ shɔnrɔ ti yɛn se† 13.14: E kunwɔ, ma fanŋga ki yɛn se? Kuulo tara, ma jɔgɔwɔ shɔnrɔ ti yɛn se? Zhezu wi pitunŋɔ Pɔli wìla sɔngɔrɔ maga sɛnrɛ ti yo wa 1 Korɛn 15.55 laga ki ni, ma kɔrɔ fɔnŋɔ kan ki sɛnrɛ ti yeri, maga naga fɔ fanŋga woro kunwɔ pi ni.?
Mi se kaa pe wele yinriwɛ tawa ni naa.
15 Ali na ki ka pye Efirayimu cɛnlɛ woolo pè jiti yɛgɛ o yɛgɛ pe sefɛnnɛ nambala pe sɔgɔwɔ,
yɔnlɔ yirisaga tifɛlɛgɛ ŋga ki maa yaara waga ki yaa pan,
Yawe Yɛnŋɛlɛ li yaa li tifɛlɛgɛ ki yirige mbe yiri wa gbinri wi ni.
Ki yaa pan mbe pe puluyo yi waga,
mbe pe kɔlɔye pe waga.
Pe juguye pe yaa ka pan mbe pe yarijɛndɛ tɛgɛsaga yaara to naa pe yarijɛndɛ sɔnŋgbanga woro ti koli mbe kari ti ni.
†13:6 13.5-6: Dete 8.11-17
†13:11 13.11: 1 Sami 10.17-24; 15.26
†13:14 13.14: E kunwɔ, ma fanŋga ki yɛn se? Kuulo tara, ma jɔgɔwɔ shɔnrɔ ti yɛn se? Zhezu wi pitunŋɔ Pɔli wìla sɔngɔrɔ maga sɛnrɛ ti yo wa 1 Korɛn 15.55 laga ki ni, ma kɔrɔ fɔnŋɔ kan ki sɛnrɛ ti yeri, maga naga fɔ fanŋga woro kunwɔ pi ni.