15
Yurugo ŋga Moyisi wo
naa Izirayɛli woolo
pàa kɔ ma Yɛnŋɛlɛ li sɔn
naa Izirayɛli woolo
pàa kɔ ma Yɛnŋɛlɛ li sɔn
1 Kona, a Moyisi naa Izirayɛli woolo pe ni, pè sigi yurugo ŋga ki kɔ ma Yawe Yɛnŋɛlɛ li gbɔgɔ ma yo fɔ:
Ye ti mbe yurugo kɔ mbe Yawe Yɛnŋɛlɛ li gbɔgɔ,
katugu lìli gbɔgɔwɔ pi naga.
Lì shɔnye poro naa pe lugufɛnnɛ pe jaanri wa kɔgɔje wi ni† 15.1: Naga 15.3.
2 Yawe Yɛnŋɛlɛ lo li yɛn na fanŋga ye,
lo li yɛn na yurukɔgɔ ki go ye.
Lo lìlan shɔ.
Lo li yɛn na Yɛnŋɛlɛ le, mi yaa li sɔn.
Lo li yɛn na tɛlɛye pe Yɛnŋɛlɛ le, mi yaa li gbɔgɔ.
3 Yawe Yɛnŋɛlɛ li yɛn malaga gbɔnfɔ gbɔɔ.
Li mɛgɛ koyi ŋga Yawe Yɛnŋɛlɛ† 15.3: Yuuro 118.14; Eza 12.2.
4 Yawe Yɛnŋɛlɛ lì Farawɔn wi malaga gbɔn wotoroye, naa wi maliŋgbɔɔnlɔ pe ni fuun pe jaanri wa kɔgɔje wi ni.
Kɔgɔje yɛɛn wì Farawɔn wi maliŋgbɔɔnlɔ wɛlimbɛlɛ pe li.
5 Tɔnmɔ mba pi maa yinrigi na tuun pì toro pe go na.
A pè tigi wa tɔnmɔ pi latijugo ki ni paa sinndɛlɛgɛ yɛn.
6 Yawe Yɛnŋɛlɛ, yawa gbɔɔ yɛn ma ni!
Ma yawa gbɔɔ po pɔ̀ɔn juguye pe tɔngɔ Yawe Yɛnŋɛlɛ.
7 Ma gbɔgɔwɔ mba pì wɛ yaraga ki ni fuun ki na pi fanŋga na,
mɔ̀ɔ juguye pe jaanri.
Mɔ̀ɔ naŋgbanwa kala li wa pe na,
a lì pe jɔgɔ paa yɛgɛ ŋga na kasɔn ma yan waga sogo we.
8 Ma wɔnwɔn tifɛlɛgɛ ki fanŋga na, tɔnmɔ pì gbogolo pi yɛɛ na.
Tɔnmɔ mba pila fuun pì gbogolo pi yɛɛ na paa mbogo yɛn.
Tɔnmɔ mba pila yinrigi na tuun pì liri wa kɔgɔje wi nandogomɔ.
9 We juguye pàa pye na yuun fɔ:
«We yaa taga pe na la pe puro, sa pe yigi.
We yaa sa pe kɛɛ yaara ti koli mberi yɛɛlɛ we yɛɛ na.
We yaa we tokobiye pe kɔlɔgi wa pe woforo ti ni mbe pe gbo.»
10 Ɛɛn fɔ, mboro wo na Yawe Yɛnŋɛlɛ, mɔ̀ɔ yɔn tifɛlɛgɛ ki fɛ,
a kɔgɔje wì pe li.
Pè tigi paa sunmu pyɔ yɛn wa tɔnŋgbɔɔ pi latijugo ki ni.
11 Yawe Yɛnŋɛlɛ, yarisunndo ti ni fuun ti ni, kikiin ki yɛn ma taanla ma ni?
Ambɔ wi yɛn paa mboro yɛn? Ma yɛn kpoyi ma yɔn fili.
Ki daga paa fyɛ ma yɛgɛ konaa paa ma sɔnni,
mboro ŋa ma maa kafɔnŋgɔlɔ piin we.
12 Kapyege nuŋgba mà pye ma fanŋga ki ni,
a tara tì si we juguye pe tɔn.
13 Ma ndanlawa pi kala na,
a mà woro mbele ma woolo we go shɔ,
ma yawa pi fanŋga na,
a maa we yɛgɛ sinni na kee we ni wa tara kpoyi nda ma yaa kan we yeri ti ni.
14 Cɛngɛlɛ sanŋgala kège wogo ki logo, a kaa seri fyɛrɛ ti kala na.
Fyɛrɛ gbɔrɔ Filisiti tara fɛnnɛ pe yigi.
15 Edɔmu tara teele pe sunndo wì kɔn pe na.
Mowabu tara teele paa seri fyɛrɛ ti kala na.
Kana tara fɛnnɛ pe ni fuun pè kotogo la.
16 Jatere pirindorogo naa fyɛrɛ gbɔrɔ la pe yigi.
Ma fanŋga ŋga mà tɛgɛ ma we saga kì pe yɔn ki tɔn pe na,
a pè pye paa sinndɛlɛgɛ yɛn.
Woro mbele ma woolo, fɔ a wè saa toro, Yawe Yɛnŋɛlɛ!
Woro mbele ma woolo, a mà we go shɔ, fɔ a wè saa toro.
17 Ma yaa kari we ni sa we pye we cɛn wa ma yanwiga ki na,
wa cɛnsaga ŋga mà gbegele ma yɛɛ kan ki ni Yawe Yɛnŋɛlɛ,
fɔ wa ma laga kpoyi ŋga mà kan ki ni.
18 Yawe Yɛnŋɛlɛ li yɛn wunluwɔ, fɔ sanga pyew.
19 Farawɔn wi shɔnye, naa wi malaga gbɔnwotoroye konaa wi shɔn lugufɛnnɛ pàa ye wa kɔgɔje wi ni sanga ŋa ni, Yawe Yɛnŋɛlɛ làa kɔgɔje tɔnmɔ pi sɔngɔrɔ maa wa pe na, a pì pe li. Ɛɛn fɔ, woro Izirayɛli woolo, wàa tanga tawara na ma kɔgɔje wi kɔn ma yiri.
20 Kona, a Arɔn wi njɔ Miriyamu ŋa wìla pye Yɛnŋɛlɛ yɔn sɛnrɛ yofɔ, wì si pimbile kpɛkpɛlɛkpɛ la lɛ nali gbɔɔn. A jɛɛlɛ sanmbala pe ni fuun pè si pan pimbigile kele ni ma taga wi na, na ke gbɔɔn na yoo. 21 A Miriyamu wì si yurugo le, a Izirayɛli woolo sanmbala pe nɛɛ ki shoo wi yɔn na fɔ:
Yaa yurugo koo Yawe Yɛnŋɛlɛ li kan.
Lùu gbɔgɔwɔ pi naga.
Lì shɔnye poro naa pe lugufɛnnɛ pe jaanri wa kɔgɔje wi ni, a wì pe li.
MBEGE LƐ WA KƆGƆJE YƐƐN
WI NA MBE SA GBƆN
WA SINAYI YANWIGA KI NA
WI NA MBE SA GBƆN
WA SINAYI YANWIGA KI NA
15.22–18.27
Laga ŋga pàa pye na yinri
Mara ki tɔnmɔ pi sɛnrɛ
Mara ki tɔnmɔ pi sɛnrɛ
22 Ko puŋgo na, a Moyisi wì si ti a Izirayɛli woolo pè yiri wa Kɔgɔje yɛɛn wi tanla ma kari wa Shuri gbinri wi ni. Pàa tanga pe piliye taanri pe sila tɔnmɔ ta mbe wɔ. 23 A pè si saa gbɔn wa laga ŋga pàa pye na yinri Mara. Tɔnmɔ mba pàa saa yan wa, pe sila ya mbe pa wɔ, katugu pìla pye ma sori. A pè sigi laga ki mɛgɛ taga naga yinri Mara (ko kɔrɔ wo ŋa sorowo). 24 Kona, a leele pe nɛɛ kɔngɔri Moyisi wi na, na yuun fɔ: «Yiŋgi we yaa wɔ?» 25 A Moyisi wì si Yawe Yɛnŋɛlɛ li yɛnri ŋgbanga li pe saga. A lì si kanŋgekɔngɔ ka naga wi na, a wì sigi lɛ maga wa wa tɔnmɔ pi ni; a tɔnmɔ pì si kanŋga ma tanla.
Yawe Yɛnŋɛlɛ làa kondɛgɛŋgɛlɛ naa kakɔnndɛgɛŋgɛlɛ kan Izirayɛli woolo pe yeri wa ki laga ki na. Làa pe wa ma wele wa fun, 26 mɛɛ pe pye fɔ: «Na ye kaa nuru jɛŋgɛ mi ŋa Yawe Yɛnŋɛlɛ, ye Yɛnŋɛlɛ na yeri, mbaa ŋga ki yɛn ma sin ki piin na yɛgɛ na, na yaga nuŋgbogolo jan mbaa na ŋgasegele ke nuru konaa mbaa tanri na kondɛgɛŋgɛlɛ ke na, pa mi se ka yama mba mìla wa Ezhipiti tara fɛnnɛ pe na pa wa ye na. Katugu muwi mi yɛn Yawe Yɛnŋɛlɛ na li maa ye sagala.»
27 Ko puŋgo na, a Izirayɛli woolo pè si kari ma saa gbɔn wa Elimu laga ki na. Puluyo kɛ ma yiri shyɛn la pye wa, konaa sɛngɛndire nafa taanri ma yiri kɛ ni. A pè si pe paara yinrɛ ti kankan wa tɔnmɔ pi tanla ma cɛn le.