2 Naga yɛn ma, maa ki sɔnri tanga yɛn ma yeri wi le?

Naa mà yo fɔ: «Mi yɛn ma sin Yɛnŋɛlɛ li yɛgɛ na we!»

3 Mà yo naa fɔ: «Na mii kapege pye, yiŋgi tɔnli mi yaa ta wa ki ni? Yiŋgi ki yaa yɔn na kan† 35.3: Ŋga kì yo fɔ: Yiŋgi ki yaa yɔn na kan, ki mbe ya logo fɔ: Yiŋgi ki yaa yɔn ma kan.?»

4 Muwi mi yaa ma yɔn sogo,

mboro naa ma wɛnnɛ pe ni.

5 Ma yɛngɛlɛ ke kan ma naayeri wi wele jɛŋgɛ,

kambaara ti wele wa naayeri fɔ wa lege!

6 Na maga kapege pye, ko yaa yiŋgi jɔgɔ Yɛnŋɛlɛ li na?

Na ma kapere ti ka lɛgɛ, ko yaa yiŋgi pye Yɛnŋɛlɛ na?

7 Na maga pye mbe sin, ma yaa yiŋgi kan Yɛnŋɛlɛ li yeri?

Yiŋgi li yaa ta ma yeri?

8 Ma lewee yɛɛnlɛ poro wɛlɛ ma tipewe pi yaa la jɔlɔ;

maga pye mbe sin, ki yaa la ma lewee yɛɛnlɛ poro kala yɔngɔ.

9 Leele pe maa gbele, na pe jɔlɔfɛnnɛ paga jɔlɔgɔ taga pe na sa toro;

pe maa gbele na sagafɔ jaa wi pe shɔ fanŋga fɛnnɛ pe kɛɛ.

10 Ɛɛn fɔ lere kpɛ na ta mbe yo fɔ: «Na Dafɔ Yɛnŋɛlɛ li yɛn se yeri,

lo na li ma ti sɛnwee wi maa sɔnmɔ yuuro koo yembinɛ,

11 lo na li ma we naga ma we pye tijinliwɛ fɛnnɛ ma wɛ yan woŋgaala pe na,

ma we pye tijinliwɛ fɛnnɛ ma wɛ naayeri sannjɛrɛ ti na.»

12 Leele pe maa gbele na sagafɔ jaa, ɛɛn fɔ Yɛnŋɛlɛ laa pe yɔn sogo,

lepeele pe yɛɛ gbɔgɔwɔ pi kala na.

13 Kaselege ko na, pe yɛn na gbele wagafe; Yɛnŋɛlɛ li woro na nuru pe yeri,

Yawa pi ni fuun fɔ wi suu jatere wi tɛgɛ pe na.

14 Ɛɛn fɔ Yɛnŋɛlɛ li yaa ma yɔn sogo mɛlɛ, mboro ŋa mà yo ma woro nali yaan,

fɔ mɔ̀ɔ kala li le li kɛɛ, mali sige ma saa te.

15 Hɛɛn koni, mbege ta li naŋgbanwa pi woro na yaraga ka piin lere na,

a kì cɛn ndɛɛ naa sɛnwee wi ma yiri ma je li woro naga jate;

16 kì pye ma, Zhɔbu wùu yɔn ki yɛngɛ na sɛnwara yuun,

wi yɛn na sɛnlɛgɛrɛ yuun, nda ti yɛn jɛnmɛ fu.