2 Koni jatere ŋa wi yɛn na ni, wi yɛn nala wɔnrɔgi mbe yɔn sogomɔ kan,

na nawa mba pì tanga na na mi se ya mbege kun na yɛɛ ni.

3 Mì jɛrɛgi sɛnrɛ ta logo, nda ti yɛn nala tifaga,

ɛɛn fɔ tijinliwɛ jatere ŋa wi yɛn na yeri, mi yaa yɔn sogomɔ kan ma yeri wo ni.

4 Ki daga maga jɛn fɔ maga lɛ wa fafafa,

maga lɛ Yɛnŋɛlɛ lì sɛnwee wi da laga tara ti na,

5 lepeele pe cew tawa pila mɔ,

lere ŋa wila la fyɛ Yɛnŋɛlɛ yɛgɛ wi nayinmɛ pi ma pye wagati jɛnri ni.

6 Ali na wi ka tɔnlɔ fɔ sa gbɔn wa yɛnŋɛlɛ na,

ali na wi go ki kaa jiinri wa kambaara ti na,

7 wi yaa ka kɔ mbe wɔ wa paa wi yɛɛra koŋgaraga ki yɛn,

kona mbele pàa pye naa yaan, pe yaa kaa yuun fɔ: «Wi yɛn se yeri?»

8 Wi yaa ka toro paa wɔɔnrɔ yɛn, wi se ka yan naa,

wi yaa ka kɔ mbe wɔ wa, paa yɛgɛ ŋga na lere ma kaa yariyanra yan yembinɛ we.

9 Mbele pàa pye naa yaan, pe se kaa yan naa,

wi cɛnsaga woolo pe se kaa yan naa.

10 Wi pinambiile, ki pe ndanla ma pe mbɛn, pe yaa fyɔnwɔ fɛnnɛ pe kɛɛ yaara ti sɔngɔrɔ pe na;

yarijɛndɛ nda wìla ta, wo jate wi kɛɛ ki yaa ti sɔngɔrɔ pe na.

11 Wi kajeere tìla pye fanŋga ni paa wi lefɔnrɔ sanga wi yɛn,

konaa ki ni fuun, ti yaa ka pinlɛ mbe ye wi ni wa fanga, wa tara ti ni.

12 Tipege kìla tanla wa wi yɔn,

fɔ wi maga tɛgɛ wa wi ŋgayinnɛ li nɔgɔ.

13 Wi maga tɛgɛ ki ma mɔ, wila yɛnlɛ mbege yaga,

wi maga yigi maga yaga wa wi yɔn.

14 Ɛɛn fɔ ki yaakara ti yaa kanŋga, mbe fɔngɔ wa wi lara ti ni;

ti yaa kanŋga mbe pye wɔɔgɔ shɔnrɔ wa wi nawa.

15 Yarijɛndɛ lɛgɛrɛ nda wì li leele pe yeri, wi yaa kari tuguru;

Yɛnŋɛlɛ li yaa ka ti ni fuun ti yirige mberi wɔ wa wi lara.

16 Wɔɔgɔ shɔnrɔ wìla pye na mugu,

ki kala na, mɛrɛgɛ ki yaa kaa nɔ mboo gbo.

17 Wi se ka sɛnrɛgɛ naa nɔnɔ lɛgɛrɛ yan tila fuun naa,

paa gbaan tɔnmɔ nakoma lafogo tɔnmɔ yɛn.

18 Yaraga o yaraga wì ta, wi yaa kaga sɔngɔrɔ mbege kan, wi se kaga li;

safari ŋa wila waa, wi se ka ki tɔnli wi tanwa pi li.

19 Katugu wìla fyɔnwɔ fɛnnɛ pe tɔnyɔgɔ, fɔ ma pe kɛyɛn yi yaga waga,

wìla pe yinrɛ ti shɔ pe yeri fanŋga, wii ka kan nuŋgba.

20 Kìla pye yaraga naa yɛnlɛ tin,

ɛɛn fɔ wi se ya yaraga ŋga ki wogo kì gbɔgɔ wi yeri ki shɔ jɔgɔwɔ pi yeri.

21 Wi yɛgɛmbatinwɛ pi kala na, wi sila yaraga ka kpɛ yaga kuu toro;

ki kala na, wi fɛrɛwɛ pi se mɔ.

22 Ali mbege ta yarijɛndɛ lɛgɛrɛ yɛn wi yeri, nandangawa yaa gbɔn wi na;

jɔlɔgɔ ki cɛnlɛ pyew ka yaa to wi na.

23 Na wi kaa wi fuŋgbolo li yinni sanga ŋa ni,

ko sanga wo ni, Yɛnŋɛlɛ li yaa pye naŋgbanwa gbɔɔ ni wi ni,

pi yaa to wi na paa tisaga yɛn, mbe pye wi yaakara.

24 Na wi ka fe mbe shɔ tugurɔn maliŋgbɔnyaara ti kɛɛ,

sandiga tuguyɛnrɛ wanla yaa wi sun mboo furu.

25 Na wi ka ki wanla li tile mbeli kɔw wa wi pɔgɔlɔ,

na wi ka ki wanla numala pyembye wolo li tile mbeli kɔw wa wi lara ti na,

kona sunndo kɔngɔ kunwɔ wogo yaa to wi na.

26 Diwi gbɔlɔ li yɛn ma tɛgɛ wi kan, mboo yarijɛndɛ ti jɔgɔ;

kasɔn yaa wi sogo, ŋga sɛnwee ma wigi gbɛri.

Yaraga o yaraga kì koro wa wi go ki ni, kasɔn yaa ki ni fuun ki sogo.

27 Wi kolomɔ pi yaa jɛn wa yɛnŋɛlɛ na,

tara ti yaa yiri wi kɔrɔgɔ mbe yo wi yɛn jɔgɔfɔ.

28 Wi go yarijɛndɛ ti yaa ka pɛ mbe wɔ wa,

Yɛnŋɛlɛ li naŋgbanwa pilige ki na, pe yaa kari koli mbe kari ti ni.

29 Ko ki yɛn tasaga ŋga Yɛnŋɛlɛ li yɛn na kaan lepee wi yeri,

ko kɔrɔgɔ ko Yɛnŋɛlɛ lì wɔ ma tɛgɛ wi kan.